वैशाख १४ य् नेपाल बन्द !
नेवाः-ताम्सालीङ बन्दयात मेपिनिगु नं समर्थन
येँ (सन्ध्या टाइम्स)/नेवाः-ताम्सालिङ संयुक्त संघर्ष समितिं आः वइगु बैशाख १४ गते आह्वान याना तःगु नेवाः व ताम्सालिङ प्रदेश बन्द ज्याझ्वः आः वयाः नेपाल बन्दया हे रुपय् हिलावनीगु जूगु दु ।
थीथी आदिवासी जनजाति संगठन नापं बहिष्करणय् लानाच्वंगु समुदायपाखें प्रतिनिधित्व यानाच्वंपिं थीथी दल नापं स्वतन्त्र सभासद्तय्सं नेवाः-ताम्सालिङ बन्द आह्वानयात समर्थन यानाः थःथःगु लागा नं वकुन्हु हे बन्द यायेगु धकाः घोषणा याःगुलिं वकुन्हुया नेवाः व ताम्सालीङ बन्दं नेपाल बन्दया रुप कायेत्यंगु खः ।
संविधानसभाया संवैधानिक समितिंनिसें सदनय् तकं राज्यपाखें बहिष्करणय् लाःपिं आदिवासी जनजाति, दलित, मुस्मां, मधेसी नापं थीथी समुदायया मागयात संवोधन यायेमाः धासें संसदय् संघर्ष न्ह्याका वयाच्वंपिं चीधंगु दल नापं सभासद्तय्सं सतक संघर्षया झ्वलय् अथे बन्द यायेत्यंगु दु ।
दलित जनजाति पार्टीया नायः नापं सभासद् विश्वेन्द्र पासवानं 'सन्ध्या टाइम्स' लिसे खँल्हासें नेवाः व तामाङतय्सं गुकथं १४ गते बन्द आह्वान यात उकियात समर्थन यानाः थःपिंसं नं बन्द यायेत्यनागु जानकारी बियादिल। वय्कलं दलित जनजाति पार्टीया प्रभाव तराईया वीरगन्जं पूर्वपाखे व भैरहवां पश्चिमपाखेया तराई बन्द यायेगु जुइ धयादिल ।
अथे हे संघीय लोकतान्त्रिक राष्ट्रिय मञ्चया सभासद् रुक्मिणी चौधरीं थःपिंसं लिम्वुवान क्षेत्र बन्द यायेगु जुइ धयादिल। अथे हे थारू राष्ट्रिय परिषद्पाखें थरूहट प्रदेश बन्द याइगु जानकारी नं वय्कलं बियादीगु दु। वय्कलं कन्हय् संसदया मुँज्या दुगुलिं थःपिनिगु माग संवोधन मयात धाःसा संसदय् सशक्त कथं दनेगु जुइ धकाः नं धयादिल ।
बन्दया समर्थनय् सांसद्तय् जुलुस
नेपाः राष्ट्रिय पार्टीया सभासद् बुद्ध साय्मिं १४ गतेया बन्द ज्याझ्वःया समर्थनय् राज्यपाखें बहिष्करणय् लाकातःपिं समुदायया प्रतिनिधित्व यानाच्वंगु चिचीधंगु स्वंगू दल नापं स्वतन्त्र सभासद्त जानाः बैशाख १३ गते सांसद्तय्गु जुलुस पिकायेगु जुइ धयादीगु दु ।
येँया माइतिघर मण्डलां नेवाः-ताम्सालिङ प्रदेश बन्दया समर्थनय् पिहां वइगु सांसद्तय्गु उगु जुलुसय् थीथी राजनीतिक दलया आदिवासी, जनजाति, दलित, मुस्मां, मधेसी नापं थीथी समुदायया सांसदतय्सं ब्वति कयादी धकाः सांसद् साय्मिं धयादीगु दु। वय्कलं सार्थक संविधानया निंतिं थःपिंसं आन्दोलन यानाच्वनागु खः धयादिल ।
