पासपोर्ट मियाः नइपिं सभासद्त

थःपिंत राज्यं सुविधा कथं बियातःगु ह्याउँगु पासपोर्ट कर्पिन्त प्रयोग याके बिउगु द्वपनय् निम्ह सभासद्तय्त ज्वंगु घटनां संविधानसभाय् संविधान च्वये धकाः वयाच्वंपिं सकलें हे सभासद्तय् प्रतिष्ठाय् घाः लाका बिउगु दु। थःपिंत बियातःगु कुटनीतिक पासपोर्ट प्रयोग याकाः मनूतय्त विदेश छ्वयेगु ज्या याकूपिं सभासद्पिं गायत्री साह व विश्वनाथप्रसाद यादवयात प्रहरीं ज्वंगु खः। थ्व सभासद्तय्सं थःपिनिगु पासपोर्ट कर्पिन्त मियाः दुरुपयोग बारे प्रहरीयाके गाक्कं हे प्रमाण दुगु कारणं उमिसं उकियात राजनीतीकरण यानाः बचे जुइगु उपाय नं मदु ।

थ्व स्वयां न्ह्यः छम्ह सभासद्यात घूस काःगु द्वपनय् ज्वनाः कारवाही समेत याःगु खः। आः पासपोर्ट मीगु ज्याय् नं सभासद्त सक्रिय जूगु खँ पिहां वःगु कारणं थुकिं संविधानसभाया सकलें सभासद्तय्त हे लज्जित याना बिउगु दु। जनताया लागिं ज्या याये धकाः जनताया हे मतं त्याना वःपिं सभासद्तय्सं याना जूगु थज्याःगु ज्या वास्तवय् छुं नं कथं क्षम्य मखु। सभासद् जूगु वापत वय्कःपिंत सामान्य स्वयां तसकं अप्वः सरकारं हे भत्ता बियातःगु दु। उलिमछि भत्ता कयाः नं मगानाः अझ गैरकानुनी ज्याय् लगे जूगुलिं वय्कःपिंत न्ह्याक्व हे आलोचना याःसां मगाः। थज्याःगु ज्याय् जूगु कारवाहीयात राजनीतीकरण यात धकाः सरकार लिचिले मजिउ। अज्याःपिं सभासद्तय्त हद दर्जाया हे कारवाही यायेमाः। लिसें सम्बन्धित पार्टीतय्सं नं थज्याःगु खँय् राजनीति यायेगु पलेसा अज्याःगु ज्या याःपिं सभासद्तय्त पार्टीगत कारवाही यानाः राजनीतिक शुद्धीकरणया ज्याय् मेपिंत नं प्रेरित यायेत तिबः बीमाः ।

More Stories Like this