नेवाःया मुद्दाय् सदन स्थगित
चीधंगु दलया सभासद्पाखें सदनय् नाराबाजी
येँ (सन्ध्या टाइम्स)/संसदय् न्हापांखुसी राज्यं लिउने लाकातःगु जातीय पुचःतय् नापं नेवाःतय् मुद्दायात समेत कयाः म्हिगः संसद हे अवरुद्ध यायेगु ज्या जुल। नेपाः राष्ट्रिय पार्टीया सभासद् बुद्ध साय्मि लगायत स्वंगू चीधंगु पार्टीया प्यम्ह सभासद्तय्सं म्हिगः सदनय् नाराबाजी यासें सदनया कारवाही हे अवरुद्ध याना बिउगु खः ।
वय्कःपिं प्यम्ह सभासदतय्सं प्रस्तावित १४ प्रदेशया नक्साय् नेवाः प्रदेशयात बियातःगु लागा तसकं चीधं जूगुलिं उकियात संशोधन यायेमाः, उगु प्रदेशय् दुथ्याकातःगु सुनकोशी व नारायणी प्रदेश खारेज यायेमाः धइगु माग यासें सदनय् नाराबाजी यानादीगु खः। अथे हे राज्यं लिउने लाकातःपिं समुदायया मागयात संविधान च्वज्याय् थाय् बीमाः, तःधंगु दलतय्सं थः यत्थे याये दइ मखु, सार्वजनिक सेवाय् ९० प्रतिशत अग्राधिकार दयेमाः धइगु नारा नं थ्वयेकूगु खः। सदनया कारवाही शुरु जुइवं हे नेपाः राष्ट्रिय पार्टीया बुद्ध साय्मि, दलित जनजाति पार्टीया विश्वेन्द्र पासवान, संघीय लोकतान्त्रिक राष्ट्रिय मञ्चया रुक्मिणी थारू व स्वतन्त्र सभासद् सदर मियाँ सभामुखया न्ह्यःने वयाः नाराबाजी याःगु खः। नाराबाजीया हे झ्वलय् प्यम्हेस्यां प्रतिनिधित्व यासें रुक्मिणी थारूं थःपिंसं नाराबाजी यानाः सदन अवरुद्ध यायेमाःगु कारण बारे कनादीगु खः ।
वय्कःपिनिगु नाराबाजी लिपा सभामुखं वैशाख ९ गते तकया लागिं सदन स्थगित यानादीगु खः। वय्कःपिंसं वंगु छुं न्हि न्ह्यवंनिसें संवैधानिक समितिया बैठकय् नं नारा थ्वयेकाः बैठक अवरुद्ध याना वयाच्वंगु खः ।
सभासद् बुद्ध साय्मिं थःपिनि माग पूरा मयाःतले थ्व अभियान निरन्तर न्ह्याकां तुं च्वनेगु खँ कनादीगु दु ।
प्रमयात नेवाः व तामांगया ज्ञापनपौ
थ्वहे झ्वलय् अखण्ड नेवाः प्रदेश व ताम्सालीङ प्रदेशया सुनिश्चितताया माग यासें वइगु वैशाख १४ गते नेवाः व ताम्सालीङ बन्द यानाः राज्ययात दवाव बीत्यंगु ज्याझ्वः बारे प्रधानमन्त्रीयात जानकारी बीगु ल्याखं म्हिगः नेवाः-ताम्सालीङ संयुक्त संघर्ष समितिपाखें प्रम झलनाथ खनालयात छगू ज्ञापनपत्र लःल्हात। निगुलिं जातीय प्रतिनिधित वनाः प्रम खनालयात उगु ज्ञापनपत्र बियाथकूगु खः ।
