कंसाकार त्याःसां षडयन्त्रकारी मबूनि

अन्ततः नेपाल वायुसेवा निगमया कार्यकारी अध्यक्ष सुगतरत्न कंसाकारयात अख्तियार दुरुपयोग अनुसन्धान आयोगं भ्रष्टाचारया द्वपनय् तयातःगु मुद्दायात विशेष अदालतं खारेज यासें वय्कः लगायत थुकी ल्हाः दु धयातःपिं मेपिं नं सकसितं सफाई बिउगु दु। अदालतया थ्व फैसलां भाजु कंसाकारं याःगु ज्या वास्तवय् भ्रष्टाचार मखु धइगु पुष्टि जूगु दु। थुकियात वय्कःया नैतिक विजयया रुपय् कायेमाः। वास्तवय् वय्कलं निगमया लागिं विमान न्यायेगु धकाः न्ह्याकूगु प्रक्रिया गलत मखु जुयाच्वन धइगु खँ नं थुकिं प्रमाणित याना बिउगु दु ।

विशेष अदालतया फैसलां सुगतरत्न कंसाकारयात विजयी ला याना बिउगु दु तर वय्कःयात थुकी फँसे यायेगु ज्याय् सक्रिय जूपिं षडयन्त्रकारीत धाःसा अझ नं पराजित जूगु मदुनि। उमिसं कंसाकारयात भ्रष्टाचारया द्वपनय् फँसे यानाः जेलय् समेत तया बिउगुया मुख्य कारण धइगु हे नेपाल वायुसेवा निगमयात विमान न्याके मबीकेत खः। आः कंसाकारं मुद्दा ला त्याकल तर निगमया लागिं न्हूगु न्यायेगु धकाः वय्कलं कुतः हे याःसां नं प्राविधिक रुपं थ्व सम्भव धाःसा मदयेधुंकल। वय्कः लत्या ति लिपा हे रिटायर्ड जुइत्यंगु दु। न्हूगु विमान न्यायेगु लागिं पहल हे याःसां नं ई मगाः। वय्कःयात ठ्याक्क हे विमान न्यायेगु लागिं ज्या मयासें मगाःगु अवधि तक जक मुद्दाय् फँसे यानाः मेथाय् लाका बिउगु कारणं निगमयात विमान न्याके मबीकेगु शक्तिं अतिकं 'क्यालकुलेटिभ' पलाः ल्ह्वंगु खनेदु। थ्व छगू प्रक्रियाय् कंसाकारयात खास हानी ला मजुल, तर निगमं विमान न्यायेगु ज्या धाःसा छले जुल ।

More Stories Like this