जि करण

सुरेन्द्र महर्जन 'सुविन'

छिकपिंसं जितः म्हमसिल थें। खनेत ला पक्कां हे खं।
छिकपिंसं जक मखु, शायद जितः देश विदेशया यक्व यक्व हे मनूतय्सं खं। गन गन टि.भी. दु, अन अन च्वंपिंसं जितः खनेधुंकल। अय्नं जितः सुनानं पक्का नक्सां म्हमसिउ। थ्व ला जिं नं सिउ। अझ जिगु नां करण धकाः ला झन हे सीमखु। छु याये थःथःगु भाग्य, गुलिं खनाः नं म्हमसिउ, गुलिं खने हे मदुसां हलिमय् बय्बय् ।

थौं जिगु बुदिं, ह्याप्पी बर्थ डे ।

लिक्क च्वंम्ह जिमि पासां जक चीसकं ग्याग्यां जितः जन्मदिंया भिंतुना बिल। बिचरा जि अले जिमि पासा। निम्हं नापं तःधी जुया, म्हिता, तर समस्या ला गबलें मजू, तर व हे का मालिकं गथे धाल अथे हे याये माःगु, गन हुँ धाल अन हे वने माःगु, दँ धाःसा दन, फ्यतु धाःसा फ्यतुत। थ्व नं थःथःगु भाग्य हे का ।

हत्तेरि का, उगुंथुगुं खँ ल्हानाः छिकपिंत जि सु धयागु ला धाये हे ल्वःमन का। जि 'करण', तिंख्यलय् सिपाहींतय्सं गया जुइपिं अनेक सलत मध्ये छम्ह, भचा हाकु हाकु भचा सियु सियु धाःम्ह तःधिसे च्वंम्ह सँ ताःहाकःम्ह, म्ह सलक्क च्वंम्ह। म्हसिल ला? गनं खं थें च्वन ला? बसय् वनाबलय् झ्यालं जकं खंगु खः लाकि? वा टि.भी.इ जकं खंगु? लुमं मजुल ला? जिं ला तिंख्यलय् वइपिं ततःधं धाःपिं मनूत म्हमसिउ, धासेंलि छिकपिंसं जितः वहे 'करण' धकाः गथे म्हसी?

न्हाचः नं धाये धुन हला थौं जिगु बुदिं धकाः। भाग्य धाये ला, दुर्भाग्य धाये ला। नेपाः गालय् प्रजातन्त्र दिवस धाःकुन्हु हे जिगु नं जन्म जूगु खः। दुर्भाग्य हे धाये माली, सल जुयाः जन्म कयाः छुकिया भाग्य धायेगु। प्रजातन्त्र दिवस कुन्हु हे जन्म जूसां जि गबलें स्वतन्त्र मजू।
न्हापा न्हापा ला जितः तिंख्यलय् हइगु तसकं न्ह्याइपु ताः। प्रजातन्त्र दिवस धाइ, मनूत नं हूलहूल वइ, तिंख्यलय् चाकःहीक च्वनाः स्वयाच्वनी। यक्वसिनं ला जिमित हे स्वया च्वनी। ल्याय्म्हचाबलय् जोश नं यक्व दु, मेपिं सलसिबें छु कम धकाः छ्यं हे धधस्वाकाः उखेथुखे स्वयेगु। थःगु हे म्हय् च्वंम्ह सिपाहींचा नं उलि झ्यातु मताः। रंगीचंगी ध्वाँय्चात तिया तइगु। माइकं म्येँ हायेकाः प्याखं नं ल्हुया जुइगु। अले हाकुसे, सलक्क च्वंम्ह मोटरं दक्वसियां क्वक्वछुनाः नमस्ते यायेमाःम्ह मनू वइ। चट्ट थःगु थासय् च्वंच्वनी। नापनापं वया कलाःम्ह व काय् म्ह्याय् ला जुइ नि। इपिं नं वइ। दुरवीनं तातापाक्क च्वंगु जिमिगु कला कौशल स्वइ। सिधल कि व हे फूर्ति नक्सां वनी। दथुइ भाषण नं याइ। सल जात, छु धाःगु बांलाक थूगु मखु। अय्नं सिधयेकाः दक्वसिनं लापा थाइगुलिं बांलाक हे धाःगु जुइ धइगु मति ।

दँदँ थथे हे वन। तर अचानक छगू प्रजातन्त्र दिवसय् व सलक्क च्वंगु गाडीं मेम्ह हे पिहां वल। कलाःम्ह नं मेम्ह हे, मस्तमिस्त नं मेपिं हे। यक्व बुद्धि मदुसां जिगु दिमाग नं गजब हे जुल। छु जूगु थ्व? जिं ला छुं हे सीके मफुत। न्हापा वइम्ह सिबें भचा ल्ह्वं तर भचा ख्वइ ख्वाः वःम्ह का। न्हापायाम्ह थें उलि न्हिउ ख्वाः मवः। तर शान बान धाःसा न्हापायाम्ह थें हे का। बिचरा जि, सल जात न खत। ततःधंपिं मनूतय् छु छु जुल छु सिउ? न सित, न स्यात हे का। जितः ला छु, वहे ज्या, वहे कु ला खःनि। न्ह्याम्ह वःसां कुबी हे माः ।

तर गजबनक्सां याइ। व मनू नं स्वदँ प्यदँ सिबे मवल। छन्हु अथे हे दिवसय्, अथे हे सलक्क च्वंम्ह मोटरं गंसिचाम्ह बुराम्ह तःधिसे च्वंम्ह मनू पिहां वल। न्हापां ला जि झसंग हे वन नि सा। दछिं हे अपाय्च्वं ल्ह्वंम्ह चट्ट च्वंम्ह मनू गथे जुयाः गंसि व बुरा जुल धकाः। तर गन खः धकाः? ताउत स्वयाः तिफ्यात का, व ला मेम्ह हे मनू धकाः। अथे हे व बुरा वये धुंकाः मेगु नं गजबगु हे जुल नि। न्हापा जूसा दछि छक्वः जक तिंख्यलय् दिवस धकाः हइगु जिमित तर आः ला दछि हे निक्वः स्वक्वः हइगु। छु छु दिवस धाल धाल। बरा जुयाः ला छु खः मसिउ, जिं ला धाये नं मसः, लुमं नं मजू, छु दिवस छु दिवस?

बुरा हे जूगु हे ला खइनि, जि नं। मिखां नं न्हापाथें यक्व ति
याये मफु, सः नं उलि छुटे याये मफु। अथे जुयाः हे खः वा धात्थें हे खः, अनं लिपा ला अथे दिवस धाक्वपतिं जिं ला फरक फरक हे मनूत व सलक्क च्वंगु गाडीं पिहां वः थें च्वं। गबलें गजक्क च्वनाः चश्मा तयावःम्ह वइगु, गुबलें चीधिकचाम्ह ग्वाय् च्वामुसे च्वंम्ह वइगु। मनू न्ह्यात्थे हे च्वंम्ह वःसां भाषण बीगु धाःसा न्हापां न्हापां वइम्ह थें हे बीगु धया। मनूतय् खँ जुयाः जिं छुटे याये मफुगु ला, धात्थें दँ दँ तक सः जक फरक यानाः व हे खँ धयाच्वंगु। जिं ला मसिउ बाः ।

न्ह्याम्ह हे वःसां जिगु कर्म व हे ला खः। थःगु म्हय् सिपाहीं तयाः ब्वाँय् जुइगु। जवं खवय्, खवं जवय्, तिंन्हुइगु, फ्यतुइगु। व वापत जि त्यात धकाः जिगु म्हय् गइम्ह सिपाहीं पुरस्कार काइगु। जि स्वःगु स्वलं का। जिगु भागय् ला व हे घाँय्, व हे चाना ला खःनि। जितः अथे जुयाः न्हापा थें उलि न्ह्याइपु मताया दिवसत नं। म्हाइपुयाः जवंखवं स्वया झन हे म्हाइपु। व हाकुगु सलक्क च्वंगु गाडी च्वना न्ह्याथें जाःम्ह मनू वःसां, न्ह्यागु हे भाषण बिउसां तिंख्यः चाकःहीक च्वनाः स्वइपिं मनूत झिदँ झिंन्यादँ न्ह्यः खनागु खः। अथे हे तुंथें च्वं। न्हापा चिचीजाःगु सिमन्टिया बारे लिउने च्वनाः, सिमाय् च्वय् च्वय्, घ्वात्तुघ्वानाः, धित्तुधिनाः दिवस स्वयाच्वनीगु। थौं सिमन्टिया बारय् थासय् नँयागु तजाःगु बारय् लिउने च्वनाः अथे हे घ्वात्तुघ्वानाः, धित्तुधिनाः स्वयाच्वनी। स्वये हे मयया वनापुसे च्वंक। व तःजाःगु बारय् दुने, तःजाःगु मञ्चया च्वय् च्वंपिंसं छुं धाइला, छुं याइला, बांलाःगु छुं बी ला धइगु आसय् चःति वयेक, तुति त्यानुक दनाः आशाकुति मिखां स्वयाच्वनी। दक्व दिक्व सिधयेका थःगु चःति हुहुं वनी, थुगुसी ला छुं मजुल, मेगु पटकय् ला छुं जुइ ला? धइथें खँल्हाल्हां नयपित्याका लिहां वनी ।

थौं हाकनं दिवस हं, छु दिवस जिं मसिउ। बुरा जूगुलिं जि तिंख्यलय् वने नं म्वाःल। शायद थौं हाकनं अनं व ताहाकःगु, हाकुगु सलक्क च्वंगु गाडीं सुं मेम्ह हे कुहां वल जुइ। अथे हे भाषण यात जुइ। अले मनूत अथे हे बारं स्वयाच्वन जुइ। मनूतय्गु खँ, मेगु ला जिं यक्व सिउ।
थ्व जिगु बाखं नं मखु, जीवनी नं मखु। दंदं तिंख्यलय् वनाच्वनागु, थौं मवनाबलय् म्हाइपुयाः च्वयागु खँ जक खः। आखिर पशु न खत, बानी गन तनी धकाः, ज्या मदुसा तिंख्यलय् वने ला धइथें च्वनीगु ।

थपाय्हाकः धाये धुंकाः आः ला छिकपिंसं जितः म्हसिल जुइ नि, जि सु धकाः, जि 'करण' ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया