सुदया म्याद हानं खुला थप

माओवादीयात भारतं अझ न्ययेकीगु जुल

येँ (सन्ध्या टाइम्स)/ई स्वयां याकनं नेपाः त्वःताः भारत लिहां वनीन धकाः बय्बय् जूम्ह नेपाःया निंतिं भारतीय राजदूत राकेश सुद आः वयाः ई सिबें नं अप्वः च्वनीगु खँ सीदुगु दु ।

वय्कः थ्वहे अप्रिल महिनाया दुने म्याद फुनाः लिहां वनेमाःगु खःसां न्हू वइम्ह राजदूतया प्राविधिक कारणं यानाः वय्कः मेगु खुला ति अझ हे नेपालय् राजदूत जुयाः च्वने मालीतिनिगु खँ सूत्रं धाःगु दु ।

छखे न्हूम्ह राजदूत छ्वया हयेत भारतय् प्राविधिक समस्या ब्वलनाच्वंगु व मेखे स्वयम् राजदूत सुद नं राजदूत जुयाः च्वने चाहे जुयाच्वंगु कारणं भारतीय परराष्ट्र मन्त्रालय वय्कःया म्याद थपे यायेत सहमत जूगु खँ नं विज्ञ सूत्रं धाःगु दु ।

सूत्रया कथं राजदूत सुद धुंकाः न्हूम्ह राजदूत जुयाः वयेत्यंम्ह जयन्त प्रसाद नेपाः वयेवं हे अवकास काइम्ह जूगुलिं न्याला खुलाया लागिं राजदूत छ्वया हयेगु पाय्छि मजुइगु तायेकाः भारतं मेम्ह हे मनू मालाच्वंगु दु। उकिं मेम्ह मनू मलूतले सुदयात हे तया तइगु खँ नं धाःगु दु। न्हूम्ह मनू मालेधुंकाः वयात राजदूत दयेकाः छ्वया हयेगु प्रक्रिया पूरा यायेत हे निला धइथें ई मालीगु जूगुलिं आः सुद हे मेगु खुला थन च्वनीगु सम्भावना दुगु दावी सूत्रया दु ।

उखे सुद नेपाः च्वनाच्वंत्तले न्हू दिल्लीं नेपालय् माओवादीयात अझ दमन यायेत पलाः ल्ह्वनीगु नं अनुमान याना हःगु दु। सुदं नेपालय् च्वनाः यानाच्वंगु ज्या बांलाः मजू धकाः धायेगु याःसां नं माओवादीयात 'साइज' य् हयेत वय्कलं म्हितादीगु भूमिकयात धाःसा भारतया माओवादी विरोधी प्रशासकतय्सं ययेकूगु खँ धाःगु दु । नेपालय् संविधान पित बीगु म्याद न्ह्यःने थ्यंलिसे सुदया भूमिका झन अप्वयेफु धाःगु दु ।

कन्हय् कृष्णा
थ्वहे झ्वलय् कन्हसंनिसें नेपाः भ्रमणय् वयेत्यंम्ह भारतीय विदेशमन्त्री एमएस कृष्णां नं राजदूत सुदया थपे जुइत्यंगु अवधिया बारे खँल्हाबल्हा यानादीगु खँ धाःगु दु। सुद नेपालय् च्वनाः माओवादी प्रति कडा नीति काल धाःसा झन् अःखः लिच्वः लाः वनीगु जकं मखु ला धकाः अध्ययन यायेत नं भाजु कृष्णा नेपाः वयेत्यंगु खँ सूत्रं धाःगु दु। अथे खःसां कृष्णाया थ्व भ्रमण संविधान जारी जुइगु मिति जेठ १४ न्ह्यःने वःगु सन्दर्भलिसे स्वाः धाःगु दु ।