सक्रिय जुया वःपिं धार्मिक कट्टरपन्थीत

देशय् संविधान तयार यानाः पित बीगु ई न्ह्यःने थ्यंलिसे मेमेपिं यथास्थितिवादीत थें नेपाःयात हिन्दू राष्ट्र हे घोषणा यायेमाः धकाः लगे जुयाच्वंगु पुचःत नं सक्रिय जुया वःगु दु। उमिगु सक्रियता जेठ १४ न्ह्यःने थ्यंलिसे धमाधम हे तच्वया वइगु संकेत नं पिहां वःगु कारणं थ्व छगू धर्म निरपेक्षता पक्षधरतय् लागिं चिन्ताया विषय जुइफु।
नेपाः परम्परांनिसें हिन्दू राष्ट्र घोषित जुयाच्वंगु देय् मखु। थ्व खास यानाः पञ्चायती व्यवस्थां राज यानाच्वंगु इलय् विक्रम संवत् २०१९ सालय् तत्कालिन जुजु महेन्द्रं थम्हं हे दयेकाः जारी याःगु संविधानय् जक उल्लेख जुयाच्वंगु विषय खः। व स्वयां न्ह्यः नेपाःयात गबलें नं हिन्दू राष्ट्र धायेगु मयाः। थज्याःगु पञ्चायती व्यवस्थां जबर्जस्ती लादे यानातःगु हिन्दू राष्ट्रयात थौं गणतन्त्रया इलय् नं लागू हे यायेगु खःसा देशय् वःगु परिवर्तनया छुं नं अर्थ मदु। थौं हिन्दू राष्ट्रया नामय् वःगु नाराया लिउने हिन्दू जुजुयात हानं पुनर्स्थापना यायेमाः व देशयात जुजुया हे शासन अन्तर्गत तयेमाः धइगु गन्ध पिहां वयाच्वंगु दु। उकिं हिन्दू राष्ट्रया नामं पिहां वयाच्वंगु थ्व सःयात मात्र धार्मिक रुपं जक स्वयेगु गल्ती जुइ ।

थ्व खः कि नेपालय् हिन्दू माने याइपिं मनूतय् बाहुल्यता दु। तर बाहुल्यता दयेवं वयात हिन्दू राष्ट्र हे धायेमाः धइगु आवश्यकता मदु। नेपाः धार्मिक रुपं नं आपालं विविधता दुगु देय् खः। थज्याःगु देशय् सम्पूर्ण मुलुकयात हे छगू धर्मया नामं म्हसीका बीबलय् अन च्वंपिं मेगु समुदायया म्हसीका तना वनीगु स्वाभाविक खः। उकिं नेपाःयात थौंया आधुनिक युगय् नं छगू धर्मया नां बियाः चिना तयेगु पाय्छि पलाः मखु ।

More Stories Like this