नेवाःतय् भविष्य व नेवाः युवा

सुरेश खड्गी

सही नेतृत्वया अभावं नेवाः जाति असंगठित व अराजनीतिक जुयाः हरेक क्षेत्रय् लिउने लाना वनाच्वंगु वर्तमान अवस्था खः। यदि थ्व स्थितियात पने मफुत धाःसा नेवाः जातिया पतन निश्चित जू। नेपाःन्यंकं हे पृथ्वीनारायण शाहं नेपाः एकीकरण याये न्ह्यः तक नं अप्वः काल खण्ड हरेक दृष्टिं सम्पन्न नेवाः जाति आः धाःसा हरेक क्षेत्रय् लिउने लाना वनाच्वंगु दु। नेवाः धाल कि व्यापारी थुइकेगु जमाना आः मदु, व थासय् आः मारवाडी व ब्रम्हू, क्षेत्रीं थाय् काये धुंकल। राज्यया हरेक ख्यलय् सक्षम जूगु नातां दुगु व राज्यया हरेक अंगय् आः मुख्यत ब्रम्हू क्षेत्री व मेमेपिंसं नं थाय् कायेधुंकल। थःगु मौलिक प्रविधि विकास यायेत व प्रविधि निकासा नं यायेत दक्ष जनशक्ति उत्पादन याये फुगु अवस्था आः मदु। राजनीतिक अग्राधिकार मदयेकं अज्याःगु जनशक्ति उत्पादन जुइ फइ मखु धयाः नं झीसं बांलाक थुइके माःगु दु। अथे जूगुलिं आः मुख्यत राजनीतिक अग्राधिकार मदु, गुगु झीत मदयेकं मगानाच्वंगु दु। आः दुसा गास बास कपासया समस्या व्याप्त जू। राजनीतिक रुपय्, आर्थिक, उत्पीडन, भौगोलिक, समस्या व जातीय उत्पीडन जक व्याप्त जू ।

देय्या राजधानीइ च्वनाः नं झीके राजनीतिक चेतना मदु उकिसनं नेवाःतय्के छगू ल्वय् दु राजनीति याये मजिउ धइगु। राजनीतियात घृणा यायेगु थ्वपाखें तापाना वनेगु। थुकिं यानाः थःगु जातियात हे घाटा जुयाच्वंगु दु।
थौंया राजनीतिक हल व नेतातय्गु बिचाः व एजेन्डात ठिक मजू धायेवं समग्र राजनीतिपाखें बिसिउँ वनेगु मखु बरु थःगु बिस्कं राजनीतक विचाः व व कथंया थःगु राजनीति न्ह्याकेगु हे ठीक जुइ। झीसं न्हूगु विचाःया निर्माण यायेगु खः। बिचाः निर्माण यायेबलय् थःगु न्हापाया इतिहासया नं बांलाःगु बांमलाःगु पक्षया बारे वैज्ञानिक ढंगं बस्तुनिष्ठ रुपय् समिक्षा याये फयेमाः। झी इतिहासय् गनथाय् लाक त्वःफित, गनथाय् लाक कमजोर जुल व गनथाय् लाक्क गल्ती यात व आः छु यायेमाः धइगु सीकाः नेवाः जातिया राजनीति युग ल्वःगु न्हूगु बिचाः नापं न्ह्याकेफइ। अथे जूगुलिं राजनीतियात फोहोरी खेल धयाः घृणा यायेगु, वितृष्णा यायेगु धइगु थःगु जातिया सर्वनाश यायेगुली न्ह्याः वनेगु पलेसा न्हूगु विचार सहित राजनीति सक्रिय जुइगु आवश्यक जू। राजनीति फोहोरी खेल मखु, थ्व जीवन भर ल्वाना च्वनेमाःगु युद्ध खः संघर्ष खः धयाः झीसं थुइकेमाः। निरन्तर संघर्ष हे छगू जातियात मेपिं स्वयां विशिष्ट जातिया रुपय् विकास याइ ।

संघर्षपाखें सु तापाइ, थाके जुइ वया पतन निश्चित जू। जीवन धइगु हे संघर्ष खः। हानं थ्व नं झीसं लुमंके संघर्ष यायेगु हे मानवया सर्वपरी धर्म खः। संसार छगू कुस्तीया अखडा खः। झी मल्वात धाःसा प्रतिद्वन्द्वीं झीत प्रहार याइ बुकी। झि मल्वायेवं झी बुइगु मखु मेपिं त्यायेवं झी स्वतः जुइ। थः जुयाः राजनीति झी मवनेवं मेपिंसं त्याकी धइगु स्वाभाविक खः। झीगु थ्वहे राजनीतिपाखें बिसिउँ वनेगु प्रवृत्तिं थौं झी सम्पन्नतापाखें विपन्नताय् उन्मुख जुया वनाच्वंगु दु। राजनीति अधिकार लगायत सांस्कृतिक आर्थिक सामाजिक रुपं झी पतन उन्मुख जुया वनाच्वंगु दु। आः झीसं थुकियात पनेमाः। पनेगु ई वयेधुंकूगु दु लिबाका च्वने मजीधुंकल। संविधानसभाया चुनावी लिच्वलं नं झी निरन्तर पतन उन्मुख जुयाच्वंगु संकेत बियाच्वंगु दु। संविधान सभाय् झीगु उपस्थिति नं न्यून जू। उकिं नं नेवाः जातिया प्रस्ट भिजन दुपिनिगु उपस्थित खास हे मदु ।

नेवाः राजनीतियात गुगु कथं संगठित यायेगु, गुकथं थुकिया राजनीतिक अधिकार स्थापित यायेगु, वैचारिक रुपय्, मौलिक रुपय् थ्व जातियात गुकथं हाकनं सम्पन्न यायेगु धइगु भिजन दुपिं नेतृत्व वर्गया थौं आवश्यक जुयाच्वंगु दु। सकलें नेवाः ल्याय्म्हत थुखेपाखे वये माःगु दु। नेवाः जातिया नेतृत्वया व थाय् खालि जुयाच्वंगु दु। ल्याय्म्हतय्सं संघर्ष यायेगु खः धाःसा व थासय् तक थ्यंके फइ। व थाय् तक थ्यंकेत तसकं अःपु केवल भिजनया आवश्यक जू नापं निरन्तर धैर्यता व लगनशील जुयाः संघर्ष यायेगु खुबी दयेमाः। खालीगु थासं सकलें ल्याय्म्हतय्त पियाच्वंगु दु। झीसं अन थ्यंकेत कुतः यायेगु मखुला?

More Stories Like this