नाइजेरियाया राष्ट्रपतिलय् गुडलक विजयी

Posted on Tue Apr 19, 2011 10:47 am NST

नाइजेरियालय् नकतिनि क्वचाःगु मतगणना कथं देय् राष्ट्रपति पदय् जोनाथन गुडलक विजयी जूगु दु । वय्कलं निर्वाचनय् कुतुवंगु मत ल्याःया ५७ प्रतिशत मत प्राप्त यानादीगु खः । उगु लिच्वःयात गुडलकया प्रतिद्वन्द्वी मुहामदु बुहारीं धाःसा निर्वाचनय् धांधली जूगुलिं लिच्वः अवैध जूगु दावी या:गु दु । तर अन्तर्राष्ट्रिय पर्यवेक्षकतय्सं निर्वाचन निष्पक्ष जूगु खँ धा:गु दु ।

निर्वाचन प्रमुखं निर्वाचनया लिच्वः घोषणा यायेवं नाइजेरियाया उत्तरी क्षेत्रय् हिंसा ब्वलंगु दु । बुहारीया समर्थकत दुगु मुस्लिम बाहुल्य क्षेत्रय् निर्वाचन लिच्वःया विरुद्ध प्रर्दशन सुरु जूगु खः ।

हिंसा ब्वलनेवं नकतिनि राष्ट्रपतिलय् निर्वाचित गुडलकं विनाकारण जुयाच्वंगु हिंसा दिकेत इनाप यानादीगु दु । हिंसाया हुनिं अन आपालं मनूत घाःपाः जूगु खँ अन्तर्राष्ट्रिय संस्था रेड क्रसं धाःगु दु ।