संविधान विरुद्ध हिन्दूवादीत
धर्मनिरपेक्षता अनुमोदन यायेत हाथ्या
येँ (सन्ध्या टाइम्स)/ दशेय् न्हूगु संविधान जारी यायेगु खँ पिहां वयाच्वंगु इलय् लाक्क अन्तरिम संविधानय् उल्लेख यानातःगु धर्मनिरपेक्षता विराध यासें हिन्दू कट्टरतावादीतय्सं नेपाःयात हिन्दू राष्ट्र हे यायेमाः धइगु माग यासें ततःधगुं ज्याझ्वःत यायेगु तयारी यानाहःगु खँ सीदुगु दु ।
म्हिगः उमिसं येँया खुल्लामचंय् छगू र्याली यासें हिन्दू जागरण सभाया नामय् छगू सम्मेलन याःगु खः । उगु सभाय् न्ववाःपिं वक्तातय्सं नेपाःयात हिन्दू राष्ट्र घोषणा मयासे संविधान जारी यात धाःसा उकियात थःपिंसं स्वीकार मयायेगु तकं ख्याच्वः बिउगु खः ।
मुलुकयात हिन्दू राष्ट्र हे घोषणा यायेमाः धइगु माग यासें आः थ्व पुचलं संविधानसभाय् तकं कडा रुपं खँ तयेगु तयारी यानाच्वंगु खँ सीदुगु
दु । उमिसं धर्म निरपेक्षतायात अनुमोदन यायेत नं सभासद्तय्त हाथ्या नं बिउगु खः । संवैधानिक समितिइ थौंकन्हय् आदिवासी जनजातितय्सं थःपिनि माग पूवंकेत अवरोध पिकया च्वं थें आः हिन्दूराष्ट्रवादीतय्सं नं अवरोध पिकयाः थःगु खँ तयेगु तयारी यानाच्वंगु खँ सूत्रं धाःगु दु ।
हिन्दूराष्ट्रवादीतय्सं येँय् याःगु र्यालीइ स्थानीय नेवाःतय्त बाजं थाकाः चाःहीकूगु कारणं थुमिगु पहुँच नेवाः लागा दुने नं थ्यनेधुंकूगु खँ पर्यपेक्षकतय्सं याना हःगु दु ।
