उपसमितिया म्याद बारे अन्यौल

येँ (सन्ध्या टाइम्स)/न्हूगु संविधान च्वयेगु ज्याय् वयाच्वंगु थीथी विषयया विवादत समाधान याना वनेगु धकाः माओवादी अध्यक्ष प्रचण्डया नेतृत्वय् दयेकूगु संवैधानिक समिति अन्तर्गतया उपसमिति थौंकन्हय् थुलि अलपत्रय् लानाच्वंगु दु कि उकुन्हु तिनि म्याद फूगु थ्व समितिया म्याद हानं थपे जूगु खः लाकि मखु धइगु खँय् तकं दलतय् दथुइ अन्यौल ब्वलंगु दु ।

थौं सुथय् च्वंगु सर्वदलीय बैठक लिपा संचारकर्मीलिसे खँ ल्हासें माओवादी उपाध्यक्ष नारायणकाजी श्रेष्ठ प्रकाशं उपसमितिया म्याद थप यायेधुंकल धयादीगु दु। म्याद गुलि तक थप जूगु धकाः न्यंगु न्ह्यसःया लिसः धाःसा नेता श्रेष्ठं बियामदी। अथे हे एमाले नेता माधव नेपालं नं उप समितिया म्याद थप जुल धयादीगु दु। तर चिचीधंगु दलया नेतातय्सं धाःसा उपसमितिया म्याद थप जूगु मदुनि धयाहःगु दु। सद्भावना पार्टीया सभासद् सरिता गिरी व नेपाः राष्ट्रिय पार्टीया सभासद् बुद्ध साय्मिं थौंया सर्वदलीय बैठकं उपसमितिया म्याद थप यायेगु ज्या मजू धयादीगु दु ।

वय्कःपिंसं थौंया बैठक अनौपचारिक जक खः धासें बैठकं छुं नं निर्णय याःगु मदु धयादिल। थ्व स्वयां न्ह्यः नं छक्वः उप- समितिया म्याद थप याःगु खःसा थपे जूगु म्यादया दुने छक्वः तक हे उपसमितिया बैठक मच्वँसे अथें हे म्याद फुनावंगुलिं आः नं यथास्थितिइ म्याद थप याये मजिउ धकाः थःपिंसं विरोध यानागु खँ चिचीधंगु दलया नेतातय्सं धयादीगु दु। थौंया सर्वदलीय बैठकय् प्रम झलनाथ खनाल व माओवादी अध्यक्ष नापं उपसमितिया संयोजक प्रचण्ड तकं उपस्थिति जुयादीगु मदु। न्हापा थपे याःगु थ्व उपसमितिया म्याद वंगु वैशाख १ गते तक क्वचाःगु खः। वयां लिपा थ्व उपसमितिया म्याद थपे यायेगु खः वा मखु धइगु खँय् चर्चा जुयाच्वंसां म्याद थपे यायेगु ज्या धाःसा मजुयाच्वंगु खः। तर थौं धाःसा म्याद थप जुल वा मजुल धइगु खँ अन्यौल जूगु दु ।