माओवादी दुने नं लोभीपापी ब्वलन खनिं

आखिर झिंस्वद्वः मनूतय् हि बहाः वयेकाः सत्ताय् थ्यंकः वःगु पार्टी माओवादीं नं जनताया हियात राजधानीया सतकय् धः तज्यानाः बाः वइगु लः ति हे सम्मान मयायेधुंकल खनिं। यदि जनतां माओवादीया लागिं बाः वंकूगु हियात भचा जक लुमंकूगु खःसां थौं थ्व पार्टीयात मन्त्रीतय् नां ल्ययेगु ज्याय् थपाय्धंगु सकस मजुइगु खइ। छगू ला मन्त्रिमण्डलय् छ्वयेमाःपिं स्वयां नं अप्वः मनूतय्सं मन्त्री जुइगु इच्छा व्यक्त यानाः पार्टी दुने बांलाक हे ब्वलना वयेधुंकूगु लोभीपापी प्रवृत्तिया छ्याताहां च्वंक हे प्रदर्शन जुल। मेखे, एमालेयाके ल्वानाः काये मानिगु गृहमन्त्री पदय् नं सु वनेगु धकाः पार्टीया शीर्ष नेतातय् दथुइ हे ब्वलंगु कचवनं माओवादी पिनें स्वयेबलय् छगू हे जक पार्टी खःसां दुनें दुनें थ्व तःकू हे पार्टीया सतः जुइधुंकल धइगु खँ नं बांलाक हे खने दयेधुंकल। माओवादी नेतातय्के ब्वलना वःगु थ्व सत्तालोलुप वास्तवय् उमिगु दुने तीव्र रुपं विकास जुया वःगु वैचारिक व त्यागी भावनाया स्लखनया संकेत खः। माओवादी खुल्ला राजनीतिइ वयेवं हे छुं अनुदारवादी मनूतय्सं थ्व पार्टी नं एमाले थें हे वैचारिक व चारित्रिक पतनया लँय् वनी धकाः भविष्यवाणी याःगु खः। तर उमिसं याःगु भविष्यवाणी स्वयां नं याकनं हे माओवादी थौं उगु पतनया दिशाय् ब्वाँय् वनाच्वंगु आभास पिहां वयाच्वंगु दु। थ्व सम्पूर्ण परिवर्तनह्यमि जनताया लागिं चिन्ताया विषय खः।
ई अझ नं दनि, माओवादीं थःत सुधार यायेमाः। थः दुने हे थज्याःगु लोभी चरित्र ज्वनाः मुलुकयात परिवर्तन याये धायेगु जनतायात सीक सीक हे झंगः लायेगु जक खः। माओवादीं जनतायात लुमंके माल ।

More Stories Like this