भातृ संगठन विघटनया विवाद तच्वल
कांग्रेस ज्याकुथी नाराबाजी
येँ (सन्ध्या टाइम्स)/थौं सुथय् नेपाली कांग्रेस केन्द्रीय कार्य समितिया बैठक च्वनाच्वंगु इलय् पिने धाःसा थीथी भातृ संगठनया कार्यकतातय्सं ज्याकू हे घेरे यासें नाराबाजी याःगु दु ।
कांग्रेसया थीथी भातृ संगठनत विघटन यायेगु धकाः वःगु प्रस्तावयात थौं अन्तिम निर्णय यायेगु धकाः केन्द्रीय कार्यसमितिया बैठक पार्टीया केन्द्रीय ज्याकू सानेपाय् च्वनाच्वंगु खःसा कार्यकर्तातय्सं अन हे वनाः नाराबाजी याःगु खः ।
उगु बैठकय् पार्टीया महामन्त्री प्रकाशमान सिंहं भातृ संगठनत विघटन यायेगु प्रस्ताव तःगु दु धकाः कांग्रेसया नेतातय्सं धाःगु दु। उगु प्रस्तावयात कयाः कांग्रेया केन्द्रीय नेतातय्गु दथुइ बिवाद जुयाच्वंगु दु ।
नेपाल तरुण दल व महिला संघयात नं विघटन यायेमाः धकाः प्रस्ताव हयेवं नेतातय् दथुइ उकथंया विवाद ब्वलंगु खः। कांग्रेसया बरिष्ठ नेता नापं पुलांम्ह प्रधानमन्त्री शेरबहादुर देउवा पक्षधर कार्यकर्तातय्सं थौं पार्टी कार्यालय पिने नाराबाजी याःगु खः। सभापति सुशील कोइराला पक्षधर नेतात आःया अवस्थाय् पाटीया फुक्क हे भातृ संगठन विघटन याना वनेगु पक्षय् दुसा देउवा पक्षधर उकिया विपक्षय् दनाच्वंगु दु ।
छुं दिं न्ह्यः जक च्वंगु केन्द्रीय कार्यसमितिया बैठकय् संस्थापन पक्षं नेपाल विद्यार्थी संघ विघटनया प्रस्ताव हयाः पारित याःगु दुसा देउवा पक्षधरं धाःसा उगु बैठक हे बहिष्कार याःगु खः ।
नेपाल विद्यार्थी संघ विघटन याये धुनेवं पार्टीया निगू पक्ष दथुइ ल्वापु झन झन तच्वयावःगु खःसा निगुलिं हे पक्षं ब्यागलं ब्यागलं कथं केन्द्रीय सदस्यतय्गु भेला तकं याये धुंकूगु दु। निगुलिं हे पक्षं थःपिनिगु अडान थौं च्वनीगु केन्द्रीय कार्य समितिया बैठकय् तयेगु धकाः तकं तयारी यानावःगु खः ।
भातृ संगठनत मध्ये नेपाल विद्यार्थी संघयात विघटन यायेगु प्रस्ताव वयेवं हे नेविसंघया अध्यक्ष प्रदिप पौडेलं राजीनामा बियादीगु खःसा अनं लिपा धाःसा पार्टीया केन्द्रीय कार्यसमितिया बैठक देउवा पक्षं बहिस्कार याःसां नं नेवि संघ विघटनया प्रस्ताव पारित यानाछ्वःगु खः।
थ्वहे दथुइ कांग्रेस सभापति सुशील कोइरालां भातृ संगठनत मध्ये नेपाल तरुण दल व महिला संघया अध्यक्षयात नं फोन यानाः राजीनामा बीत निर्देशन बियादीगु खः। तर इमिसं धाःसा उकियात अस्वीकार यासें राजीनामा मबीगु खँ धया वयाच्वंगु दु। तरुण दल व महिला संघया अध्यक्षपिं देउवा पक्षयापिं खः। देउवा पक्षं थ्व ज्यायात थःपिंत समाप्त याना छ्वयेगु षडयन्त्र कथं थुइकाच्वंगु दु ।
