संविधानसभाया म्याद बारे हानं चिउताः?

यदि जेठ १४ गते बियातःगु इलय् हे संविधान जारी याये मफुत धाःसा छु यायेगु? संविधान जारी यायेगु ई न्ह्यःने थ्यंलिसे गज्याःगु संविधान पिकायेगु धइगु खँ सिबें नं इलय् संविधान मवल धाःसा छु यायेगु धकाः चर्चा शुरु जूगु दु। निदँया दुने संविधान दयेकेगु धकाः थःपिंसं हे क्वःछिउगु ई दछि थपे यानाः स्वदँ यायेधुंकाः नं आः हानं मेगु ई थपे यायेगु खँ आः न्ह्यःने वयाच्वंगु दु। आः हानं दछि ई थपे जुल धाःसा संविधान दयेकेगु ई प्यदँ जू वनी। तर संविधान दयेकेगु भाला कयाः संविधानसभाय् थ्यंपिं नेतातय्सं क्यनाच्वंगु पहः स्वयेबलय् थुमिसं प्यदँय् नं न्हूगु संविधान दयेकाः नइ धाये फुगु अवस्था मदु। निदँया दुने दयेके धकाः प्रतिवद्ध याःगु संविधान वयां निदुगं ई कयाः नं दयेके मफुत धाःसा नेतातय्गु थ्व ति नालायकीपन मेगु छुं दइ मखु ।

जेठ १४ गते संविधान वइ मखुत धकाः फुक्क धइथें पार्टीया निगूगु तह तकया नेतातय्सं धया हयेधुंकूगु दुसा शीर्ष धाःपिं नेतातय्सं न्ह्याथे यानाः नं १४ गते हे संविधान पिकाये धकाः जनतायात ध्वं लानाच्वंगु हे दनि। प्रधानमन्त्री झलनाथ खनालं चाहिं जेठं संविधान वइगु सम्भावना मंत, उकिं आः छु यायेमाली धकाः राष्ट्रिय सहमति दयेकेत आह्वान शुरु याना हःगु दु। नेतातय्गु थ्व अतिकं लज्जा मचाःगु ज्या खः। यदि संविधान दयेकेगु ज्या यायां हे ई मगाःगु खःसा अज्याःगु अवस्थाय् म्याद थपे यायेगु पाय्छि नं खः। तर संविधान दयेकेगु ज्या हे गबलें मयासे ई मगात धकाः म्याद थपे यायेगु धइगु तप्यंक हे जनतायात ध्वं लानाः राष्ट्रया धुकुती डाँका मारे यायेगु खः। नेतातय्त जनतां 'डाँका'या दर्जाय् मतयेमा ।

More Stories Like this