मन्त्रीत लित सःतेगु तयारी
माओवादीया निर्णय थौं जुइगु
येँ (सन्ध्या टाइम्स)/माओवादी गृह मन्त्रालय समेत कयाः सरकारय् दुहां वनेगु लाकि आः सरकारय् च्वनाच्वंपिं मन्त्रीतय्त तकं लित सःतेगु धइगु खँयात कयाः थौं अन्तिम वार्ता जुइगु खँ धाःगु दु ।
म्हिगः माओवादी अध्यक्ष प्रचण्ड व प्रधानमन्त्री झलनाथ खनाल दथुइ जूगु वार्ताय् अध्यक्ष प्रचण्डं गृह मबीगु खःसा थःपिं सरकारय् वये फइगु सम्भावना तसकं म्हो जक दु धासें यदि गृह मबिल धाःसा आः सरकारय् वना च्वंपिं प्यम्ह मन्त्रीतय्त नं लित सःतेगु जुइ धकाः ख्याच्वः बियादीगु खः ।
थुकिया बारे अझ विस्तृत वार्ता यायेत थौं एमाले व माओवादी दथुइ हानं बैठक च्वनेत्यंगु दु। सूत्रया कथं यदि थौंया वार्ता ताःमलात धाःसा कन्हय् तकया दुने माओवादी मन्त्रीत सरकारं पिहां वइगु सम्भावना यक्व दु। माओवादी मन्त्रीतय्त नं उकिया लागिं तयार जुयाच्वनेत पार्टीं अनौपचारिक रुपं धायेधुंकूगु दु ।
आः सरकारय् वनाच्वंपिं मन्त्रीतय्त लित सःतेधुंकाः वयां लिपा माओवादीं सरकार बारे छु यायेगु धइगु खँय् धाःसा लिपा जक निर्णय याइ धाःगु दु। सम्भवतः सरकारं पिहां वयेधुंकाः माओवादीं पिने हे च्वनाः जक जूसां सरकारयात समर्थन यायेगु ज्या यायेफु धाःगु दु ।
उखे एमाले दुने खड्ग ओली व माधव नेपाल पुचलं धाःसा छुं जुयाः माओवादी सरकारं पिहां वन धाःसां प्रधानमन्त्री झलनाथ खनाल ग्यायेम्वाः धकाः आश्वासन बियाच्वंगु खँ धाःगु दु। छुं जुयाः माओवादी सरकारं पिहां वन धाःसा खनालयात हे प्रधानमन्त्री दयेकः नेपाली कांग्रेसया समर्थन कायेगु जुइ धकाः आश्वासन बियाः पलाः न्ह्याकाच्वंगु खँ धाःगु दु ।
गृह बारे हानं गोप्य सम्झौता
गृह मन्त्रालय माओवादीयात बीगु खँय् माओवादी अध्यक्ष प्रचण्ड व प्रधानमन्त्री झलनाथ खनाल दथुइ हानं मेगु गोप्य सम्झौता जूगु खँ धाःगु दु। म्हिगः वालुवाटारय् वय्कःपिनि दथुइ जूगु वार्ताय् अज्याःगु गोप्य सम्झौता जूगु खँ सूत्रं धाःगु दु। उगु सम्झौताय् गृह मन्त्रालय माओवादीयात छु प्रक्रियां लःल्हायेगु धइगु खँ जूगु दावी नं सूत्रं याःगु दु। सम्झौता गोप्य जूगु कारणं प्रधानमन्त्री झलनाथ खनालं गृह मन्त्रालय माओवादीयात बीगु खः लाकि मखु धइगु सवालय् म्हिगःनिसें सुयातं छुं मधाःगु खँ नं धाःगु दु। वय्कलं गृहया मामिलाय् थःपिं मिले जुयाः वनेगु जुइ जक धयादीगु दु ।
