उद्यमि व्यवसायीतय् न्हूम्ह नायःपाखें आशा

देय्या दकलय् तःधंगु औद्योगिक व्यापारिक संगठन नेपाल उद्योग वाणिज्य महासंघया निर्वाचनं नांजाःम्ह उद्योगपति सुरज वैद्ययात न्हूम्ह अध्यक्ष ल्यःगु दु। न्हापा न्हापा सहमतिं अध्यक्ष ल्ययेगु परम्परा जुया वयाच्वंगु महासंघय् थुगुसी न्हापांखुसी पूरा प्यानल दयेकाः पदाधिकारीतय् निर्वाचन जूगु खः। थुकी छगू निगू त्वःताः आपालं पदय् वैद्य पुचः हे त्याना वःगु कारणं महासंघय् ज्या यायेत वय्कःयात सहज अवस्था दइगु विश्वास यायेफु ।

तर थौं देय् गुगु संक्रमणकालं न्ह्याः वनाच्वंगु खः थ्व इलय् नेपाल उद्योग वाणिज्य महासंघया अध्यक्ष जुइगु धइगु अःपुगु ज्या धाःसा मखु। राजनीतिक कारणं यानाः उद्योग व्यवसाय चौपट जुयाच्वंगु ला द हे दु। उकिया नापनापं प्रचण्ड रुपं लागू जुयाच्वंगु लोड शेडिंग व मजदूरतय्सं इलय् ब्यलय् यानाच्वनीगु हडतालं व्यवसायीतय्सं छुं याये धकाः कुतः याःसां नं याये फइगु अवस्था मदु। उखे औद्योगीकरणपाखे तीव्र गतिं न्ह्याः वनाच्वंगु जःलाखःला देय् चीन व भारतलिसे यायेमालीगु प्रतिस्पर्धां नेपाःया औद्योगिक भविष्यया बांलाःगु तस्बीर खिचे यानाच्वंगु मदु।
थज्याःगु सकसपूर्ण अवस्थाय् उद्यमि व्यापारीतय् न्हूम्ह नेतां मुलुकया औद्योगिक ख्यःयात न्ह्यःने न्ह्याकेगु सिबें आः ल्यनाच्वंगु अवस्थायात जक मस्यंकुसे ल्यंका तये फुसां तःधं जुइगु खँय् शंका मदु। अथे खःसां छगू जोश व जाँगर ज्वना वःम्ह न्हुम्ह नायलं ध्वस्त जुयाच्वंगु ख्यःयात सुधारया छुं ज्या याइ ला धकाः उद्यमितय्सं आशा याइगु धाःसा स्वाभाविक खः। थ्व ई चिचीधंगु उपलब्धीं हे यक्व लबः कायेमाःगु ई खः ।

More Stories Like this