लीनहार्डया लुमन्तिइ
अष्ट्रियाय् च्वनाः नं जन्मकाछि नेपाःया प्राचीन साहित्यया अध्ययन अनुसन्धानय् थःगु जीवन पानावंम्ह प्राध्यापक सिग्फ्रेड लीनहार्डया लुमन्तिइ थौं अप्रिल १३ कुन्हु नेपालभाषा साहित्यकार व विद्वानपिनिगु संस्था च्वसापासां छगू बिचाःहायेकयगु ज्याझ्वःया आयोजना यात।
नेपालभाषा अकादेमीया चान्सलर सत्यमोहन जोशीजुं द्वलंद्वः माइल तापाक निसें वय्कलं पश्चिमी मुलुकय् नेपाःया प्राचीन कालीन साहित्यया म्हसिका जक बियादीगु मखसे, अझ स्वयम् नेवाःतयत हे न) छिमिगु साहित्य थुलि ग्यं धकाः क्यनाबियादिल। वय्कलं ३५०दँ न्ह्यः जुजु सिद्धीनरसिंह मल्लजुं च्वयाबिज्याःगु श्रीकृष्णका दाफा भजनत रोमनआखलं च्वयाः नेपाःया साहित्य र संगीतया धुकूया प्रचार विश्वन्यंक यानादिल धकाः लुमंकादिल।
वय्कलं लीनहार्डया अध्ययनशिलता र प्रतिवद्धतापाखें प्रभावित जुयाः दक्वं थःथःगु मांभाय्या संरक्षणय् छधी छपाँय् जुइमाः धकाः नं धयादिल।
भाषाविद् डा. तेजरत्न कंसाकारजुं लीनहार्डजुं अति मूल्यवान् नेपालभाषा प्राचीन साहित्य ल्हातिंच्वयातःगु सफूत मुंकाः उकिया अनुवाद न्हापंयाना पश्चिमी विश्व न्ह्यःने हयादिल धयादिल। वय्कया कथं लीनहाडजु मदियेव नेपालभाषा साहित्य अनुसन्धानया ख्यः हे ह्याकुं वंगु दु।
च्वसापासाया कजि पद्मरत्न तुलाधरजुं थौंकन्हय्या असहज अवस्थाया हुनिं थःगु मांभाय् त्वःता वनाच्वंपिं नेवाःतय्सं लीनहार्डजु पाखें प्रेरणा कयाः न्ह्यांवनेत इनाप यानादिल। अले वय्कलं लीनहार्डलिसें मेमेपिं नेवाःभाय्या अध्ययनय् थःत पानावंपिं विदेशीतय्गु बारे छगू सफू हे पिथनेमाःगु खँ नं कनादिल।
अथे हे मल्ल के सुन्दरजु व काशीनाथ टमोटजुं लीनहार्डजु लिसेया ई लुमंकाः वय्कःलिसे स्वापू दूगु ईयात लुमका दिल। लिसें अन थौंकन्हय् अमेरिकाय् च्वनाच्वनादीम्ह भाषाविद् डा. कमलप्रकाश मल्लजुं छ्वयाहयादीगु शोक प्रस्ताव व कवि दुर्गालालजुं च्वयादीगु चिनाखँ नं ब्वना न्यंकेगु ज्या जूगु खः।
लीनहार्डजुं सन् १९४९य् भियना विश्वविद्यालयं विद्यावारिधी यानादीगु खः धाःसा विभिन्न प्राज्ञिक संघसंस्थाय् आवद्ध जुयाः सन् १९९२ निसें लण्डन स्थित एकेडेमिया यूरोपीयाया बोर्ड सदस्य तकं जुयादिल। थःगु जीवनकालय् डेनमार्कया भाजु हान्स योर्गेन्सन पाखें प्राप्त जूगु नेवाः भाय्या सफू ब्वनाः नेवाःत व उमिगु नेपालभाषाया अध्ययन यायेत लालागित लीनहार्डजुं मेमेगु विषयलिसें नेपालभाषा साहित्य, धर्म, संस्कृति बारे दर्जन स्वयाः यक्व सफूत व कार्यपत्र च्वयादीगु दु। वय्कःया न्हापांगु नेपाभाषाया सफू मणिचुडावदानेव्रत सन् १९६३य् प्रकाशित जुलसा अन्तिम सफू स्वयम्भुपुराण, मिथ अफ नेपाल सन् २००९य् प्रकाशित जूगु खः।
सन् १९२४ अगष्ट २४मा अष्टियाको सेन्ट भिएट एड ग्लानय् बूम्ह लीनहार्डया निधन गत मार्च ६ कुन्हु जूगु खः ।
News Location:
Related Stories
नेपालभाषा विज्ञ लिनहार्ड मन्तMore Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
