नेपालभाषाया विद्वान प्रो. लीनहार्डया बिचाः मुँज्या

नेवाः पुलांगु नेपालभाषा व थ्वया कला धर्म व साहित्यया विद्वान प्रो. सिग्फ्रेड लीनहार्ड मदुगुया लुमन्ती च्वसापासाया ग्वसालय् थौं छगू बिचाः मुँज्या जुल ।

च्वसापासाया नायः भाजु पद्मरत्न तुलाधरया सभाध्यक्षय् जूगु उगु बिचाः मुँज्याय् नुगः खँ प्वंकादिसें नेपालभाषा एकेदमिया चान्सलर सत्यमोहन जोशीं झी नेवालं नेवाःयात म्हसीके मफु वय्कलं नेवाःयात म्हसीका दिल । विश्वय् नेवाःतय्गु सृजनात्मक साहित्य ब्वयेगु झ्वलय् झीगु पुलांगु काव्ययात "द नेवारी गीति मंजरी" व "द सङ्गस् अफ नेपाल" या नामं गुकथं न्ह्यब्वल थुकिं नेपालभाषायात राष्ट्रया गौरव कथं हे च्वन्ह्याकेगु ज्या जूगु दु धयादिल ।

भाषाविद् डा. तेजरत्न कंसाकारं लीनहार्डं नेपालभाषाया ख्यलय् यानादीगु योगदानयात कयाः चर्चा यानादिल । अथेहे मेम्ह भाषाविद् भाजु काशीनाथ तमोटं वय्कः नेपालभाषा सम्बन्धी १० गू सफू व १५ पू ति च्वसु पिदनेधुंकूगु खँ कनादिल ।

थकथं हे नेवाः देय् दबूया संरक्षक भाजु मल्ल के सुन्दरं लीनहार्डया नां हे पूर्वीय भासं अर्थात संस्कृतं तयातःगु धयादिल । लीनहार्ड धइगु ह्रदयसलीन जुइगु वा मेपिनिगु नुगलय् च्वनेगु अर्थ कथं दुगु वय्कःया हे सफुली न्ह्यथनातःगु खँया जानकारी बियादिल ।

सभा क्वचायेकेगु झ्वलय् नायः भाजु पद्मरत्न तुलाधरं थ्व बिचाः मुँज्या यायेत विशेष हःपाः बियादीम्ह च्वसापासाया पुलांम्ह नायः व थौंकन्हय् अमेरिकाय् च्वंच्वनादीम्ह डा. कमलप्रकाश मल्लयात सुभाय् देछायादिल । लीनहार्ड मदुगु सुचं दकलय् न्हापां डा. मल्लजुं हे बियादीगु खः । नापं वय्कलं अंग्रेजी भासं छ्वयाहयादीगु बिचाः हनापौ वा शोक प्रस्ताव मुँज्याय् डा. तेजरत्न कंसाकारं ब्वनाः न्यंकादीगु खः ।

प्रो. सिग्फ्रेड लीनहार्ड म्हसीका भाजु भूषण प्रसाद श्रेष्ठं न्ह्यब्वयादीगु थुगु बिचाः मुँज्याय् मदुम्ह लीनहार्डया किपाय् स्वां देछायाः श्रद्धांजली देछायेगु नापं छगू मिनेट मौन धारण यानाः ज्याझ्वः न्ह्याःगु खः । भाजु लीनहार्ड सन् १९२४ अगष्ट २९ य् जन्म जुयाः २०११ मार्च ६ कुन्हु स्वीडेनय् मदुगु खः ।

More Stories Like this