प्रमयात थौं माओवादीया अन्तिम न्ह्यसः- गृह मन्त्रालय बीगु कि मबीगु?
येँ (सन्ध्या टाइम्स)/प्रधानमन्त्री झलनाथ खनालं गृह मन्त्रालय माओवादीयात बीगु लागिं थौं न्हिछिया अल्टिमेटम बीगु खँ धाःगु दु। माओवादी उपाध्यक्ष नारायणकाजी श्रेष्ठं गृह मन्त्रालयया लागिं आः ताः ई पी फइगु अवस्था मंत धासें थौं न्हिछिया दुने नं यदि प्रधानमन्त्रीं गृह मन्त्रालय माओवादीयात मबिल धाःसा माओवादीं थः मन्त्रीत फुक्क लित सःतेफुगु ख्याच्वः नं वय्कलं बियादीगु दु ।
यदि प्रधानमन्त्री खनालं थौं नं गृह मन्त्रालय मबिल धाःसा वयां लिपा माओवादीं छु यायेगु ले धकाः न्यंगु न्ह्यसःया लिसलय् वय्कलं धयादिल, 'वयां लिपा जिमिसं गम्भीर निर्णय याये मालेफु ।'
अज्याःगु अवस्थाय् थःपिंसं यायेगु ज्या धइगु सरकारय् आः वनाच्वंपिं थः मन्त्रीतय्त नं लित सःतेगु जुइ धयादिल ।
गृह मन्त्रालय बी धाःगु हे कारणं माओवादी थ्व सरकारय् वंगु खः धासें यदि गृह मबीगु खःसा उकी च्वंच्वनेगुया औचित्य मदुगु खँ नं वय्कलं कनादिल ।
छुं जुयाः सरकारय् च्वनाच्वंपिं आःया मन्त्रीत लिहां वःगु अवस्थाय् नं सरकारयात माओवादीं बियातःगु समर्थन धाःसा जारी हे जुइगु खँ नं वय्कलं कनादिल। तर उगु समर्थन गज्याःगु प्रकृतियागु जुइ धइगु खँय् धाःसा पार्टीं बैठक च्वनाः निर्णय याइगु जानकारी वय्कलं बियादिल।
यदि प्रधानमन्त्रीं थौं तकया दुने नं गृह मन्त्रालय मबिल धाःसा कन्हय् हे पार्टीया बैठक च्वनाः गज्याःगु पलाः ल्ह्वनेगु धकाः निर्णय यायेगु जानकारी नं वय्कलं बियादिल ।
उखे माओवादी सचिव सीपी गजुरेलं धाःसा प्रधानमन्त्रीं गृह बीगु निश्चित जुल धयादीगु दु ।
गृहमन्त्री जुइम्ह सु?
एमालें माओवादीयात गृह मन्त्रालय बीगु खः लाकि मखु? बीगु खःसां गबलय् बीगु खः? थ्वहे आः तक निश्चित मजूनि, तर माओवादी दुने धाःसा आः तक बी हे मबिउनिगु गृहमन्त्रीया पदय् सु वनेगु धइगु खँय् हानं छक्वः विवाद पिहां वःगु दु। पार्टी अध्यक्ष प्रचण्ड गृहमन्त्रीया पदय् वर्तमान शान्तिमन्त्री वर्षमान पुनयात हे मन्त्रालय हीकाः हयेगु पक्षय् दुसा उपाध्यक्ष मोहन वैद्य धाःसा उगु पदय् देव गुरुङ्गयात यंकेगु पक्षय् दु। देव गुरुङ्गं गृह मबीगु खःसा सरकारय् वने मखु धायेधुंकूगु दु। पार्टी सचिव सीपी गजुरेल नं पुनया हे पक्षय् दु। महासचिव रामबहादुर थापां आः तक छुं न्ववाःगु मदुनि ।
