थाय्थासय् जुयाच्वंगु आक्रमणया संकेत छु?

सम्पादकीय

देय्या थीथी जिल्लाय् गोली प्रहार आदि थेंज्याःगु घटनात जुयाच्वंगु हे इलय् राजधानी येँय् नकतिनि हे जक राज्यमन्त्री नियुक्त जुयादीम्ह भाजु गोकर्ण बिष्टयात सांघातिक आक्रमण जूगु दु। थःलिसे छुं हे सरोकार मदुपिं व छुं कालबिल हे यायेम्वाःपिं मनूतय्सं वय्कःयात आक्रमण याःगु खनेदु। थ्व छगू देय्या गृह प्रशासनय् वयाच्वंगु ग्यानापुगु हाथ्या ला ख हे खत, उकिया नापनापं देय्न्यंकं हे थज्याःगु आक्रमण यानाः देशय् आतंक मच्चे यायेत छुं पुचः सांगठनिक रुपं हे सक्रिय जुयाच्वंगु खः लाकि धइगु आशंका समेत यायेमाःगु अवस्था वःगु दु। मखुसा छुंतां म्वायेक थज्याःगु आक्रमण सुं नं मनूयात थुकथं जुयाच्वने म्वाःगु खः ।

देशय् याकनं हे न्हूगु संविधान जारी यायेगु तयारी जुयाच्वंगु दु। यदि संविधान जारी जुयाः उकियात जनतां स्वीकार यात धाःसा संविधान विरोधी तत्वतय्सं देशय् खलबल पिकायेत स्वइगु निश्चित दु। छुं जुयाः संविधान पिहां मवल धाःसां नं उकियात कयाः जनतां प्वंकीगु आक्रोशया लबः कयाः मेगु तःधंगु घटना यायेत नं छुं तत्वत सक्रिय जुयाच्वंगु दयेफु। उगु इलय् तःधंगु घाराघुरु यायेगु तयारी कथं हे थज्याःगु छिटफुट घटनात आः हे यानाच्वंगु नं जुइफु। उकिं थ्व घटनायात सामान्य रुपं कायेगु पाय्छि मजू ।

थ्व इलय् देशय् गृह प्रशासन स्वइम्ह मन्त्री नं मदु। प्रधानमन्त्री स्वयमं गृह नं स्वयाच्वंगु दु। तर प्रधानमन्त्रीं गृह स्वयेगु पाय्छि मजू धकाः न्हापा नं खँ पिहां वयाच्वंगु खः। उकियात पुष्टि यायेगु कथंया घटनात आः जुया वःगु दु। उकिं नं सरकारं गृह प्रशासन चुस्त यायेत तुरुन्त हे माःगु पलाः ल्ह्वनेमाःगु दु ।

More Stories Like this