जोशी समाजया न्हापांम्ह मिसा ज्योतिष

सुरेश

रति जोशी धायेबलय् छगू इलय् नेपालभाषाया पत्रपत्रिकाय् आपालं आर्थिक च्वसु च्वयाः भाषासेवा यानादीम्ह भाषिक कार्यकर्ता धकाः मनूतय्सं म्हसिउ। वय्कः नेपालभाषाया साहित्यकारपिं शशिकला मानन्धर, श्रीलक्ष्मी श्रेष्ठ, सुलोचना मानन्धर आदिपिनि समकालीन च्वमि खः। उगु इलय् पिहां वइगु नेपालभाषाया पत्रिकात इनाप, पासा, मित्याः आदि पत्रिकाय् वय्कःया आर्थिक च्वसुत पिहां वःगु दु ।

अर्थशास्त्रया विद्यार्थी जूगु ल्याखं वय्कलं राष्ट्रिय वाणिज्य बैंकय् जागिर नं नयादिल। बैंकय् जागिर जुइधुंकाः बैंकया स्मारिकाय् नं वय्कःया आपालं आर्थिक च्वसुत पिहां वःगु दु ।

स्वीदँ ताःहाकःगु जागिर लिपा आः वय्कः रिटायर्ड नं जुयादीधुंकूगु दु। तर जागिरं रिटायर्ड जुइधुंकाःया जीवन धाःसा वय्कलं थ्व म्हसीका स्वयां तसकं पाक्क हनेत्यंगु दु। वय्कः आः न बैंकर खः, न आर्थिक च्वमि। आः वय्कः छम्ह ज्योतिषी खः। थुकियात वय्कःया न्हूगु म्हसीका धायेमाली ।

बैंकया जागिरं रिटायर्ड जुइ त्ययेकाः वय्कःया मनय् छगू न्ह्यसः लुल, रिटायर्ड धुंकाः छु यायेगु? वय्कलं मतिइ तयादिल, जातं वय्कः जोशी खः। नेवाः जोशीतय्सं याइगु ज्या धइगु ज्योतिषी जुल। थःछेँय् वय्कःया बाज्या नांजाःम्ह हे ज्योतिष जुयाच्वन। वय्कःया अबु ज्योतिष मखुसां थुकी दख्खल दुम्ह लानाच्वन। ज्योतिषीया सामान्य ज्ञान वय्कलं अबुपाखें हे सयेकादिल। संयोग छु जुल धायेबलय् बैंकय् वय्कःया विभागय् छम्ह ज्योतिष नं दुगु जुयाच्वन। वय्कःया नां खः ज्यो. विजयनाथ गौतम। गौतमपाखें वय्कलं ज्योतिषशास्त्रया अध्ययन सम्बन्धी यक्वं जानकारीत कयादिल। वयां लिपा वय्कलं बाल्मिकी क्याम्पसय् खुलाया संस्कृत भाषाया अध्ययन यानादिल। अन वय्कलं आपालं ज्योतिष गुरुपिं म्हसीकादिल। आचार्य गुरुपिंके ट्यूशन कयाः वय्कलं ज्योतिषी सयेकादिल। थुकथं झिदँ तक वय्कलं थीथी थासय् वनाः ज्योतिष विज्ञान अध्ययन यानादिल ।

आः बैंकं रिटायर्ड जुइधुंकाः वय्कलं ज्योतिषशास्त्रयात व्यावसायिक रुपं हे सञ्चालन यानादीगु दु। येँया पाकोय् वय्कःया थःगु हे छेँय् वय्कलं ज्योतिषी परामर्श सेवा सदन चायेकाः ज्योतिषी ज्या याना च्वनादीगु दु। वय्कलं फलित ज्योतिषी, वास्तुशास्त्र, जातः स्वयेगु व च्वयेगु आदि फुक्कं ज्या यानादी ।

नेपालय् ज्योतिषत यक्व दुसां मिसापिं ज्योतिषतय् ल्याः धाःसा ल्हाःया पतिं ल्याः खायेत हे मगाः। नेवाः जोशीतय् समाजय् ला वय्कः हे न्हापांम्ह मिसा ज्योतिष खः। जोशी समाजय् वय्कलं छम्ह ज्योतिषया ल्याखं हे सदस्यता कयादीगु दु ।

नेपालय् मिसापिं ज्योतिषतय् ल्याः अप्वयेकेगु ताः तयाः वय्कलं 'राष्ट्रिय महिला ज्योतिष संघ' गठन यायेगु कुतः नं याना च्वनादीगु दु। अन्तर्राष्ट्रिय महिला ज्योतिष संघय् धाःसा वय्कलं न्हापा हे सदस्यता कया तयेधुंकल। थ्व संस्थाया मू ज्याकू भारतया राजस्थानय् दु। भारतय् धाःसा कुल ज्योतिषत मध्ये ७० प्रतिशत मिसापिं जुयाच्वन।
छगू इलय् ला ज्योतिष विज्ञानय् मनूतय् आस्था म्हो हे जुया वनेधुंकूगु खः। तर थौंकन्हय् धाःसा थुकी मनूतय् रुची व विश्वास हानं जाया वयाच्वंगु खँ वय्कलं कनादी ।

थौंकन्हय् छेँ छखा जक दनेमाःसां वास्तुशास्त्र कथं पाय्छि जू मजू स्वयेत मनूतय्सं ज्योतिष क्यनेगु याइ। अथे हे छुं न्हूगु ज्या शुरु यायेमाःसां नं मनूतय् ज्योतिषलिसे परामर्श कायेगु चलन जुया वःगु दु। ज्या यायेगु बारे ज्योतिषं छु सल्लाह बी? वय्कलं धयादी, 'थुकी ज्योतिषया सल्लाह कायेगु बांलाः हे जुइ। छाय्धाःसां मनूतय्त निगू कथंया दशां कयाच्वंगु दइ। छगू बांलाःगु दशा, मेगु बांमलाःगु दशा। बांलाःगु दशा जुयाच्वंगु इलय् ततःधंगु ज्या याःसा फलिफाप जुइ। बांमलाःगु दशा जुयाच्वंगु इलय् यक्व लगानी यायेगु ज्या यायेगु उपयुक्त जुइ मखु। थज्याःगु सल्लाह ज्योतिषं बी ।'

छगू इलय् नेपालभाषां आर्थिक च्वसु च्वयादीम्ह खःसां २०४४ सालय् इहिपा लिपा वय्कःया च्वयेगु बन्द जुल। झिदँ धइथें वय्कलं छुं हे च्वयामदी। आः रिटायर्ड लिपा रति जोशी श्रेष्ठया नामं वय्कलं ज्योतिषशास्त्र विषयय् नेवाः भासं हानं नियमित रुपं च्वयेगु शुरु यानादीगु दु।
पेशा व रुची हिउसां नेवाः भाय्या सेवा यायेगु वय्कःया इच्छा धाःसा महिउनि। वय्कः थौंकन्हय् नेवाः देय्गुथि मिसा पुचःया दुजः कथं नं सक्रिय दुसा छगू इलय् वय्कलं गथु पुचःया दुजः जुयाः नं ज्या यानादीगु खः ।

More Stories Like this