सन्दर्भ 'मिस नेवाः' धेंधेंबल्लाः

नरेन्द्रमान श्रेष्ठ 'गोंगजु'
मय्जु अन्जला नकःमि 'बांलाःम्ह मय्जु' या ताज त्याकेत ताःलात।थुगुसी नेवाः समुदायपाखें सौन्दर्य धेंधेंबल्लाः निगू जूगु खने दत। छगू 'मिस नेवाः' अले मेगु 'बांलाःम्ह मय्जु'। नेवाः समुदायय् दछिया निगू नेवाः सौन्दर्य धेंधेंबल्लाः जूगु थ्वहे न्हापांखुसी खः। दछिया निगू-निगू सौन्दर्य धेंधेंबल्लाः छाय् याये माल धाइपिं नं मदुगु मखु। लुमंके बहः जू, विगतय् नं दछिया निगू राष्ट्रिय स्तरया 'मिस नेपाल' जूगु खः। सन् १९९७ य् काठमाडौं जेसिसया ग्वसालय् 'मिस नेपाल' व हिडेन ट्रेजरया ग्वसालय् 'मिस वर्ल्ड नेपाल' जूगु खः। आः दछिया छगू जक सौन्दर्य प्रतियोगिता यायेमाः धइगु खँ वयाच्वंगु दु। थुकिया लागिं नेवाः मिसा सौन्दर्य धेंधेंबल्लाः याइपिंसं सहलह यायेमाःगु खनेदु ।

नेपालय् सन् १९९४ निसें सौन्दर्य प्रतियोगिता न्ह्याःगु खः। नेपाःया न्हापांम्ह 'मिस नेपाल' रुबि राणा खःसा हिडेन ट्रेजरया ग्वसालय् न्हापांखुसी जूगु 'मिस वर्ल्ड नेपाल' या ताज धाःसा मय्जु झरना बज्राचार्यं त्याकूगु खः। 'मिस नेपाल' य् त्याःम्ह मय्जु 'मिस वर्ल्ड' य् ब्वति काःवने न्ह्यः 'मिस एशिया प्याशिफिक' य् ब्वति काः वनेगु यानाच्वंगु खः। तर सन् १९९७ लिपा धाःसा काठमाडौं जेसिस व हिडेन ट्रेजर दथुइ सहमति जुसेंलि थौंतक छगू हे जक मिस नेपाल सौन्दर्य कासा जुयाच्वंगु दु ।

थौंकन्हय् धाःसा राष्ट्रिय जक मखु क्षेत्रीय व जातीय रुपं नं सौन्दर्य कासात जुयाच्वंगु दु। अझ थौंकन्हय् थीथी नामं वालय् छगू धइथें सौन्दर्य कासा जुयाच्वंगु झीसं खंकेफु। गथे कि 'मिस नेपाल', 'मिस टिन', 'मिस युनिभर्सिटी', 'मिस पोखरा', 'मिस कोशी', 'मिस मंगोल', 'मिस शेर्पा', 'मिस तराई', 'मिस तामाङ्ग', 'मिस नेवाः', 'बांलाःम्ह मय्जु' आदि। वास्तवय् थौंकन्हय् नेपालय् सौन्दर्य प्रतियोगिता यायेगु छगू लहर हे वयाच्वंगु दु। जातिया संस्कृति संरक्षण यायेगु आज्जुं ज्याझ्वः यानागु धकाः ग्वसाः खलकं धायेगु याःसां नं थौंकन्हय् गुलि नं सौन्दर्य प्रतियोगिता जुयाच्वंगु दु व फुक्क प्रतियोगितां व्यापारया न्हूगु कुलां लुइकाच्वंगु खंकेफु। प्रतियोगिता यायेबलय् धाःसा मिसातय्गु प्रतिभा, व्यक्तित्व व आत्म विश्वासया विकास यायेगु थःपिनिगु आज्जु खः धकाः सुं नं ग्वसाः खलकं धायेगु धाःसा त्वःफिकूगु मदु। ग्वसाः खलःया धापुती हे ब्वति काइपिंसं नं थःगु राय तयेगु याइ धइगु खँ धाःसा झीसं ल्वःमंके मजिउ ।

खतुं 'मिस नेपाल' या उद्देश्य न्ह्यागु हे जूसां थुकिया छगू भिजन दु। 'मिस नेपाल' या ताज त्याकेत ताःलाःम्ह मय्जु नेपाःया प्रतिनिधित्व यानाः अन्तर्राष्ट्रिय सौन्दर्य प्रतियोगिताय् ब्वति काःवने खनी। अथे हे फर्स्ट रनरअप 'मिस एशिया प्यासेफिक' व सेकेन्ड रनरअप 'मिस अर्थ' य् ब्वति काः वनी। तर मेमेगु क्षेत्र व जातीय स्तरय् जुइगु सौन्दर्य प्रतियोगिताया धाःसा खास भिजन मदु।
नेवाःतय् दथुइ जूगु 'मिस नेवाः' व 'बांलाःम्ह मय्जु' नं नेवाः समुदायया मिसातय्गु निंतिं न्ह्याकूगु ज्याझ्वःत खः। खतु 'मिस नेपाल' य् नं नेवाः मिस्तय्सं ब्वति मकाःगु मखु। झरना बज्राचार्य, निरु श्रेष्ठ, उषा खड्गी, पायल शाक्य, सदीक्षा श्रेष्ठ थेंज्याःपिं नेवाः मिसातय्सं 'मिस नेपाल' या उपाधि तकं त्याकूगु दु। तर 'मिस नेवाः' व 'बांलाःम्ह मय्जु' या विशेषता धइगु थ्व निगुलिं सौन्दर्य प्रतियोगितां नेवाः समाज व नेवाः संस्कृतिया उत्थानया निंतिं तःधंगु भूमिका म्हिताच्वंगु दु। थ्व निगुलिं सौन्दर्य प्रतियोगिताया नेवाः ख्यलय् तःधंगु महत्व दु ।

'मिस नेवाः' सौन्दर्य धेंधेंबल्लाः २०६२ सालंनिसें शुरु जूगु खः। उगु सौन्दर्य कासा नेप्लीज फेसन होमया ग्वसालय् जूगु खःसा न्हापांम्ह 'मिस नेवाः' जुइत मय्जु सबिता श्रेष्ठ ताःलाःगु खः ।

'मिस नेवाः' व 'बांलाःम्ह मय्जु' ज्याझ्वलं वाःचायेकेमाःगु छता खँ छु धाःसा थुगु ज्याझ्वलं नेवाः भाय्, जाति व संस्कृतिया म्हसीका न्ह्यब्वइगु जूगुलिं थुकिया निर्णायकपिंसं नेवाः संस्कृति, भाषा व रहनसहन बारे दुग्यंक जानकारी दुम्ह प्रतिस्पर्धीयात हे छनोट यायेमाःगु खनेदु। न्हापांगु 'मिस नेवाः' ज्याझ्वः क्वचायेवं हे छगू लय्पतिं "मिस नेवाःको अंग्रेजी मोह" धकाः च्वल। अथे हे वंगु 'मिस नेवाः' ज्याझ्वलय् नं गुलिखे निर्णायकत हे नेवाः भासं खँ ल्हाये मसःपिं पिहां वल। उगु ज्याझ्वलय् ब्वति काःपिंसं नेपालभाषां न्ह्यसः तयेत इनाप याःबलय् निर्णायक वाताहां च्वनेमाःगु स्थिति वःगु खः। थुज्वःगु विषयय् ग्वसाः खलकं विचाः यायेमाःगु खनेदु। यदि 'मिस नेवाः' ज्याझ्वलय् ब्वति काःपिं व निर्णायकं हे नेवाः भाय् ल्हाये मसःसा अज्याःगु ज्याझ्वःया छु महत्व दइ? न्ह्यागु हे जूसां न्हापांखुसी जूगु 'बांलाःम्ह मय्जु' जुइत ताःलाःम्ह मय्जु अन्जला नकःमियात आपालं भिंतुना देछाया ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया