आकाझाकां मन्त्रीतय् नां घोषणा

येँ (सन्ध्या टाइम्स)/प्रधानमन्त्री झलनाथ खनालं म्हिगः बहनी थः सल्लाहकारतय् हे होश हवास मदयेक एमालेपाखें सरकारय् वनीपिं मन्त्रीतय् नां यकःति रुपं घोषणा यानादिल। मन्त्रीतय् घोषणा यायेगु ज्या थुलि अव्यवस्थित रुपं जुल कि वय्कलं म्हिगः बहनी एमालेपाखें मन्त्री जूपिं नां घोषणा यानादीगु इलय् वय्कःया प्रेस सल्लाहकार सूर्य थापा बीबीसीयात अन्तर्वार्ता बिसें मन्त्रीतय् नां कन्हय् जक घोषणा जुइ धकाः जानकारी बियाच्वनादीगु खः ।

प्रधानमन्त्री खनालं न्याम्ह मन्त्री सहित न्हय्म्ह राज्यमन्त्रीतय् नां घोषणा यानादीगु खः। प्रमपाखें एमालेया मन्त्रीतय्त थौं हे सपथ ग्रहण याकीगु धकाः सुथंनिसें तयारी जुयाच्वंगु खःसां नां घोषणा यायेगु ज्या बहनी लिबाक वयाः तिनि जूगुलिं थुकिया लागिं नं माओवादीलिसे ताःहाकः हे 'लफडा' जूगु अनुमान सूत्रं याःगु दु ।

प्रम खनालं म्हिगः न्हिनय् हे सपथ ग्रहणया लागिं कुतः यानादीगु खःसां माओवादीं गृह मन्त्रालय थःपिंत थ्वहे इलय् बीमाः धकाः दावी यायेवं विवाद जुयाः छुं हे निर्णय याये मफुगु खः ।

प्रेस सल्लाहकार थापां बीबीसी यात आः नां घोषणा व सपथ ग्रहण कन्हय् जक जुइ धकाः जानकारी बियादीगु खः।
म्हिगः हे बहनी 'सन्ध्या टाइम्स'लिसे खँ ल्हासें भाजु थापां नां म्हिगः घोषणा जूसां थौं सरकारी बिदा जूगुलिं सपथ ग्रहणया ज्या धाःसा कन्हय् जक जुइगु खँ कनादिल।
सरकारय् एमालेया मन्त्रीत जक निं वंगु कारणं आः माओवादीया बाँकी मन्त्रीत गबलय् वनी धइगु खँ झन् हे अस्पष्ट जूवंगु दु ।

गृह मन्त्रालय माओवादीयात बीगु लागिं सेना समायोजनाया खाका तयार यायेमानिगु खँ प्रधानमन्त्री खनालं धयादीगु दु। म्हिगः बहनी आकाझाकां एमालेया मन्त्रीतय् नां घोषणा यायेगु ज्या माओवादीलिसे खँ मिले मजुयाः जूवंगु खः धाःगु दु ।

राज्यमन्त्री जुइवं हे आक्रमण
छखे प्रधानमन्त्री झलनाथ खनालं थःगु मन्त्रिमण्डलय् दुथ्याःपिं मन्त्रीतय् नां सार्वजनिक याःगु हे इलय् लाक्क राज्य मन्त्री कथं नां पिहां वःम्ह भाजु गोकर्ण बिष्टयात सामाखुसिया थःगु हे छेँ न्ह्यःने छथ्वः मनूतय्सं सांघातिक आक्रमण यात ।

निगः मोटरसाइकल गया वःपिं प्यम्ह मनूतय्सं वय्कःयात जःगु ल्वाभलं पालाः बिसिउँ वंगु खःसा उपिं सु खः धइगु खँ धाःसा प्रहरीं सीके मफुनि। आक्रमणय् लानाः छ्यं व ल्हातय् घाः लाःम्ह भाजु बिष्टयात तुरुन्त हे मनमोहन अस्पतालय् भर्ना याःगु खः। म्हिगः हे वय्कःया अवस्था खतरामुक्त जुइधुंकूगु खँ डाक्टरं धाःगु दु। मन्त्रिमण्डलया दुजः कथं नां पिहां वःसां घाःपाः जूगु कारणं वय्कःया सपथग्रहण धाःसा आः छुं ई लिपा हे जक जुइ फइगु खँ धाःगु दु ।