बैशाख १४ गते यायेत्यंगु बन्दया संकेत

संविधान जारी यायेगु पाय्छि लछि ल्यं दइगु ईया संकेत बी कथं नेवाः व तामांग जाति जानाः थ्वहे वइगु बैशाख १४ गते निगुलिं जातिया प्रदेश बन्दया आह्वान जूगु दु। नेवाः व तामांग जाति जानाः याःगु थ्व ज्याझ्वःया थीथी कथंया महत्व दुगु जुयाः थुकियात राज्यपाखें गम्भीर रुपं कायेमाःगु आवश्यकता दु। खतुं थ्व इलय् मनूतय्त बन्द, हडताल, जाम थेंज्याःगु ज्याझ्वः धइगु पटक्क हे मयये धुंकल, उकिं नेवाः व तामांग जाति जानाः यायेत्यंगु थ्व बन्दयात नं मनूतय्सं सकारात्मक रुपं मकायेफु। तर थुकिं देय्या भविष्य कीगु संविधान इलय् हे पिकायेगु लिसें स्वय्म नेवाः व तामांग जातिया स्वापूयात क्वातुकेगु सवालय् धाःसा ठोस पलाः छीगु जुयाः सम्बद्ध जातितय् लागिं थुकिया बिस्कं महत्व दु। थौंकन्हय् तामांग व नेवाः प्रदेशया सीमायात कयाः निगू पक्षीय संवाद न्ह्यानाच्वंगु दु। थज्याःगु इलय् छगू पक्षं थःपिनिगु प्रदेश बन्द थेंज्याःगु ज्याझ्वः याना बीबलय् गनं निसें गन तक बन्द यायेगु धइगु विवाद पिहां वयाः निगू पक्षया सौहार्दपूर्ण स्वापूयात स्यंकेगु ज्या यायेफु। उकिं तामांग जातिं यानातःगु बन्दया झ्वलय् नेवाःतय्सं नं समर्थन यानाः उकियात अझ सशक्त याना बिउगु सकारात्मक खँ खः। लिसें थुकिं छगू मेगु छु नं संकेत बी धायेबलय् जेठ १४ गते यदि संविधान जारी मजुल धाःसा उकिं नेवाः व तामांग थें मेमेगु जातीय पुचःतय्त नं आन्दोलित याना बी। थौं देशय् संविधान मवसें मगाः धकाः हालाच्वंपिं मुख्य पुचः धइपिं जातीय पुचःत हे खः। थुपिं आन्दोलित जुया वल धाःसा उकिया लिच्वः खतरनाक जुइ। बैशाख १४ या बन्दयात उकिया संकेत कथं थुइकेमाः ।

More Stories Like this