अन्तरिक्षय् मनू थ्यंगु न्यय्दँ क्यन

पृथ्वी पिने मनू वनेगु खँ थौंया जमानाय् समान्य जुइधुंकल । तर न्यय्दँ न्ह्यः तक थुगु खँ छगू असम्भव विषय जुयाच्वंगु खः । जब तत्कालीन सोभियत संघं सफलतापूर्वक अन्तरिक्षय् मनू सहित रकेट प्रक्षेपण यात, अनं लिपा मनूत नं पृथ्वी पिने वनेफइगु खँय् मनूत विश्वस्त जूगु खः ।

थौं स्वयां न्यय्दँ न्ह्यः सन् १९६१ अप्रिल १२ तारिखया न्हि कुन्हु मस्कोया स्थानीय ई कथं ९:०७ बजे सोभियत संघया अन्तरिक्ष यात्री युरि गार्गिन काजकस्थानं प्रक्षेपण याःगु रकेटय् च्वनाः अन्तरिक्षय् थ्यंगु खः ।

'भास्कोट १' नांया रकेटय् च्वनाः १०८ मिनेट तक अन्तरिक्षया यात्रा लिपा २७दँया गार्गिन अन्तरिक्षय् थ्यंम्ह व पृथ्वीयात चाःहिम्ह न्हापाम्ह मनू जूगु खः । गार्गिनया अन्तरिक्ष यात्रा लिपा थौं तकया दुने न्यासलं मल्याक अन्तरिक्ष यात्रीतय्सं अन्तरिक्षया यात्रा यायेधुंकूगु दु ।

अन्तरिक्षय् मनू थ्यंगु न्यय्दँ दुगु लसताय् थौं मस्कोय् छगू ज्याझ्वः यानाः अन्तरिक्ष यात्री युरी गार्गिनयात लुमंकूगु दु । रुसी राष्ट्रपति डिमिट्रि मित्भियाडेभं न्हापांगु अन्तरिक्ष यात्रायात 'क्रान्तिकारी' ज्याया संज्ञा बियादीगु दु ।

सन् १९६१य् मनू सहितया रकेट अन्तरिक्षय् प्रक्षेपण याये न्ह्यः सोभियत संघं सन् १९५७य् न्हापांगु खुसिइ 'स्पुन्तिक १' नांया स्याटेलाइत प्रक्षेपण याःगु खः । अन्तरिक्षय् मनू सहित रकेट प्रक्षेपण याःगु च्यादँ लिपा संयुक्त राज्य अमेरिकां मनू सहित प्रक्षेपण याःगु 'एपोलो ११' नांया रकेट न्हापांगु खुसिइ चन्द्रमाय् थ्यंकूगु खः ।

More Stories Like this