न्हापां मंकाः न्यूनतम ज्याझ्वः

येँ (सन्ध्या टाइम्स)/वर्तमान सरकारयात पूर्णता बीगु सवालय् हाकनं गृह मन्त्रालययात कयाः हे एमाले व माओवादी दथुइ कचवं पिहां वयाच्वंगु जूसां नं आः याकनं हे सरकारपाखें न्हापां मंकाः न्यूनतम ज्याझ्वः तयार याइगु जूगु दु ।

उकिया नितिं एकीकृत माओवादी व एमालेया प्यम्ह/प्यम्ह नेतातय्गु मंकाः कार्यदल नं दयेकूगु दुसा उगु कार्यदलं सम्भवतः थौं हे न्यूनतम ज्याझ्वः तयार याइ धाःगु दु ।

सरकारया मंकाः न्यूनतम ज्याझ्वः तयार जुइ धुंकाः जक सरकारयात पूर्णता बीगु कथं न्हूपिं मन्त्रीतय्त सपथग्रहण याकेगु खँ जूगुलिं म्हिगः एमालेया न्हूपिं मन्त्रीतय्त सपथ ग्रहण याकेगु तयारी याःगु खःसां ज्या मजूगु खँ एमालेया छम्ह नेतां धयादीगु दु ।

कार्यदलं थौं हे सरकारया न्यूनतम ज्याझ्वः तयार याये फत धाःसा उकियात याकनं हे अन्तिम रुप बी धाःगु दु।
अथे हे सरकारया न्यूनतम ज्याझ्वःया नितिं एकीकृत माओवादी व एमालेया नेतातय्सं मधेसी जनअधिकार फोरमया नेतातलिसे नं सहलह ब्याकेगु ज्या याःगु दु।
म्हिगः माओवादी व एमालेया शीर्ष नेतातय्गु दथुइ न्हापां सरकारया न्यूनतम ज्याझ्वः तयार यायेगु सहमति जूकथं हे उगु प्रक्रिया न्ह्याकूगु खः ।

स्थायी बैठक त्वःताः प्रचण्ड दोलखाय्
वर्तमान सरकारया मू घटक एकीकृत माओवादीया स्थायी समितिया बैठक हे मच्वँसे पार्टी अध्यक्ष प्रचण्ड थौं दोलखापाखे वंगु दु ।

सरकारय् वनीपिं मन्त्रीतय्गु नां धलः तयार यायेत थौं स्थायी समितिया बैठक सःतातःगु खःसां थौं हे सुथय् अध्यक्ष प्रचण्ड दोलखापाखे वंगु खः। वय्कः मदुगुलिं बैठक नं स्थगित जूगु दु। काभ्रेया चौंरी गाविसय् च्वंगु छगू स्कूलया स्वर्ण जयन्ती समारोहय् मूपाहां जुइत वय्कः उखे वंगु खः। अथे हे थौं दोलालघाट महोत्सव नं प्रचण्डं हे उलेज्या यानादीगु ज्याझ्वः दु। थौं सनिलय् जक महोत्सव उलेज्याझ्वः जूगुलिं माओवादी स्थायी समितिया बैठक अनिश्चित जूगु खः ।

'गृह माओवादीया बीगु जुइ मखु'
वर्तमान सरकारया नेतृत्व यानाच्वंगु एमालेया सचिव नापं पुलांम्ह संचारमन्त्री शंकर पोखरेलं आःया अवस्थाय् गुगु नं हालतय् माओवादीयात गृह मन्त्रालय बीगु जुइ मखु धकाः धयादीगु दु ।

थौं सुथय् पर्वतय् संचारकर्मीतलिसे खँ ल्हासें नेता पोखरेलं शान्ति प्रक्रिया पूमवंगु अवस्थाय् माओवादीयात गुगु नं हालतय् सुरक्षा सम्बन्धि मन्त्रालयया जिम्मेवारी बीगु जुइ मखु धयादीगु खः ।

वय्कलं प्रधानमन्त्री त्वःतेफुगु पार्टीं गृहमन्त्री छाय् त्वःते मफयाच्वंगु खः धकाः न्ह्यसः नं तयादिल ।