बिस्काः सम्पन्न यायेत प्रहरीया सक्रियता

नेपाःया हे छगू महत्वपूर्ण सांस्कृतिक नगरी ख्वप देय्या तःधंगु नखः बिस्काः म्हिगःनिसें शुरु जुल। बिस्काः ख्वपया जात्रा खःसां थ्व देय्न्यंकं हे नांजाः। तर वंगु छुं ई थुखेंनिसें बिस्काः जात्रा थवंथवय् जुइगु ल्वापुया सस्कृति थें जुया वःगु दु। उकिं मनूतय्सं बिस्काःयात ल्वापु पिकाइगु जात्रा थें नं तायेका हःगु दु। थुकियात पनेगु लागिं गुलि कुतः जुलं नं पने मफु ।

थुगुसी प्रहरीपाखें बिस्काःयात व्यवस्थित यायेगु लागिं ख्वपय् कडा सुरक्षा व्यवस्था याःगु दु। उलि जक मखु ल्वापुइ ल्हाः दुपिंत लिपा लिपा तकं मालाः कारवाही याये फयेमा धकाः थाय्थासय् सीसीटीभी तकं तयेगु ज्या जूगु दु। जात्रायात मर्यादित व व्यवस्थित यायेत प्रहरीपाखें क्यंगु थ्व उत्साहयात कुंखिनेथाय् गनं नं मदु। तर थुकिं जात्रा न्यायेकीपिं सर्वसाधारण मनूतय्त धाःसा छगू व्यंग्य याः थें अनुभूति बिउगु दु। छाय्धाःसां जात्रा पर्व सञ्चालन यायेगु धइगु जनताया स्वतःस्फूर्त ज्याझ्वः खः। उकिसनं जात्रा पर्व धार्मिक व सांस्कृतिक ज्याझ्वः जूगु कारणं थ्व अथें नं शान्त व सौम्य जुइमाःगु खः। उकी सामान्य उखेथुखे स्वयेगु बाहेक प्रहरीया छुं भूमिका मदयेमाःगु दु। तर थुगुसी बिस्काःयात व्यवस्थित यायेगु नामय् प्रहरीं गुकथंया सक्रियता क्यनाच्वंगु खः, थुकिं यानाः थथे भान जुयाच्वंगु मानौं थ्व सम्पूर्ण जात्राया व्यवस्थापन हे प्रहरीं यानाच्वंगु खः। जात्राय् वःगु विकृति पनेत प्रहरी थथे न्ह्यचिलेमाःगु आवश्यकता नं दु। तर जात्रा न्यायेकीपिंसं धाःसा धार्मिक सांस्कृतिक ज्याय् प्रहरीया भूमिकायात मदयेका छ्वयेत थःपिं हे गुलि फु उलि मर्यादित जुइगु कुतः यायेमाः। मखुसा प्रह्री हे जात्राया मेगु विकृति जुया बीफु ।

More Stories Like this