गृहयात कयाः हानं कचमच
न्हापां सेना समायोजनया क्यालेण्डर: प्रम
येँ (सन्ध्या टाइम्स)/वर्तमान सरकारयात पूर्णता बीगु सवालय् हाकनं गृह मन्त्रालययात कयाः हे एमाले व माओवादी दथुइ कचवं पिहां वःगु दुसा थुकिं यानाः हे सरकारयात पूर्णता बी मफयाच्वंगु खँ धाःगु दु ।
विशेष यानाः माओवादीं ७ बुँदे सहमतिया भावना कथं गृह मन्त्रालय आः हे थःगु पार्टीया नेता देव गुरुङयात बीमाःगु प्रस्ताव तयाच्वंगु दुसा प्रधानमन्त्री खनालं धाःसा आःयात गुरुङयात बिना विभागीय मन्त्री निं दयेकाः अनौपचारिक रुपं गृह मन्त्रालय स्वकेगु अले सेना समायोजनया क्यालेण्डर तयार जुइवं वय्कःयात पूर्ण रुपं गृह मन्त्रालयया जिम्मा बीगु प्रस्ताव तयाच्वंगु दु। तर देव गुरुङ्ग स्वय्मं उगु प्रस्तावयात अस्वीकार याःगुलिं सरकारयात पूर्णता बीगु ज्याय् समस्या वयाच्वंगु खँ धाःगु दु ।
लिपांगु इलय् वयाः माओवादीयात नं गृह मन्त्रालय प्रतिष्ठाया विषय जुया बिउगुलिं माओवादीं अडान कयाच्वंगु खः धाःगु दु ।
उखे वर्तमान सरकारय् दुहां वइगु मधेसी जनअधिकार फोरमं नं प्यंगू मन्त्रालय माः धकाः अडान तयाच्वंगुलिं हे समस्या ब्वलना वयाच्वंगु खः धकाः एमालेया छम्ह नेतां धयादीगु दु ।
थौं एमालेया न्हूपिं मन्त्रीतय्त जक सपथ ग्रहण
सरकारयात पूर्णता बीगु सवालय् एकीकृत माओवादीलिसे कचमच जुयाच्वंगुलिं एमालें थौं थःगु भागय् लाःपिं मन्त्रीतय्त जकसां सपथ ग्रहण याकेगु योजना दयेकूगु दु।
थौं हे सनिलय् एमालेया मन्त्रीतय्त प्रधानमन्त्री झलनाथ खनालं सपथ ग्रहण याकादीगु ज्याझ्वः तयातःगु दु। थःगु पार्टीपाखें मन्त्री जुइपिनि नांधलः प्रधानमन्त्रीं तयार यानादीधुंकूगु दु ।
एमालेया छम्ह नेतां कनादी कथं थौं उर्मिला अर्याल, रघुवीर महासेठ, नरेश खरेल, गोकर्ण बिष्टयात मन्त्री दयेकेगु तयारी प्रधानमन्त्रीं यानाच्वंगु दु ।
एकीकृत माओवादी व मधेसी जनअधिकार फोरम लिसे जूगु सहमति कथं एमालेया भागय् स्थानीय विकास, सामान्य प्रशासन, सिंचाई व वन मन्त्रालय लाःगु दु। प्रधानमन्त्रीया प्रेस सल्लाहकार सूर्य थापां संचारकर्मीतलिसे खँल्हासें एमालेया भागय् लाःपिं मन्त्रीतय्त जक जूसां थौं सपथ ग्रहण याकेगु तयारी याःगु जानकारी बियादीगु दु ।
