अन्ततः संविधान मवइगु हे जुल का मखुला?

न्ह्याथे यानाः नं जेठ १४ गते संविधान जारी यायेमाः धकाः लगे जुयाच्वंपिं राजनीतिक पार्टीया नेतातय्सं हे आः वयाः वकुन्हु संविधान वइ मखुत धकाः खुल्ला रुपं धयाहःगु दु। एकीकृति माओवादी, नेपाली कांग्रेस व नेकपा (एमाले)या जिम्मेवार नेतातय्सं हे आः जेठ १४ गते संविधान वइ मखुत धया हःगु कारणं राजनीतिक पार्टीत आः संविधान बीगु सिबें मबीगु हे लँय् वनेधुंकल धइगु खँ प्रस्ट जूगु दु। वास्तवय् जेठ १४ गते संविधान जारी यात हे धाःसां नं अपूर्ण व मुख्य बुँदा हे मदुगु संविधान जक बी फइ धकाः न्हापा नं खँ पिहां वःगु खः। तर पार्टीया उगु खँय् जनतापाखें दवाव वयेवं पार्टीतय्सं खः थें च्वंक छुं भचा ज्या याःगु नं खः। तर पूवंके धाःसा मफुत। तसकं दुर्भाग्यया खँ ला थ्व दु कि नेतातय्सं संविधान दयेकेगु ज्या यायां हे दयेके सिमधःगु मखु। दयेकु दयेकुं हे ई मगाःगु नं मखु। संविधान दयेकेगु सिबें सरकार दयेकेगु ज्याय् अप्वः केन्द्रित जूगु कारणं थथे जूवंगु खः। उकिं थ्व नेतातय्के संविधान दयेकेत ई मगात धकाः जनता समक्ष क्षमा फ्वनेगु अधिकार नं मदु। सरकार दयेकेगु ज्याय् तक्यनाच्वंपिं राजनीतिक पार्टीतय् कचवं आः तक नं क्वचाःगु मदुनि। थ्व दौरानय् सरकार दयेकेगु खँय् नेतातय् दथुइ तःक्वः हे बैठक च्वन, तर संविधान दयेकेगु ज्याय् वयाच्वंगु कचवंयात गय् यानाः समाधान यायेगु धकाः गबलें छक्वः हे शीर्ष नेतात बैठक च्वंगु मदु। संविधानया छुं छुं विधाय् अझ नं विवाद दनि। तर उगु विवाद चीकेगु सवालय् गबलें सहलह जूगु जनतां मसिउ। उकिं संविधान दयेके मफुगु सिबें नं मदयेकेगु षडयन्त्र जकं दलतय्सं यानाच्वंगु मखु ला?

More Stories Like this