बैशाख १४ नेवाः-ताम्सालिङ बन्द
नेवाः ताम्सालिङ मंकाः संघर्ष समिति नीस्वन
येँ (सन्ध्या टाइम्स)/ संघीय गणतान्त्रिक नेपाःया न्हूगु संविधान जारी यायेगु दिं क्वःछिनातःगु ई सिबें लिछ न्ह्यः वइगु बैशाख १४ गते नेवाः व तामाङतय्सं मंकाः प्रस्तावित नेवाः व ताम्सालिङ प्रदेश बन्द आह्वान याःगु दु ।
नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समितिया मंकाः बैठक थौं सुथय् च्वनाः नेवाः व ताम्सालिङ प्रदेश बन्द यायेगु निर्णय याःगु खः । ताम्सालिङ संयुक्त संघर्ष समितिं वइगु चैत्र ३० गते ताम्सालिङ नापं नेवाः प्रदेश बन्द यायेगु धकाः घोषणा न्हापा हे यानातःगु खःसां उगु इलय् नेवाःतय्गनेवाःतय्सं हनीगु थीथी कथंया नखःचखः लानाच्वंगु नापं तामाङतय्सं नेवाः प्रदेश तकं बन्द यात धाःसा उकी बांमलाःगु लिच्वः लायेफु धकाः नेवाः स्वायत्त राज्य मंकाः संघर्ष समितिं इनाप याःगुलिं उगु बन्द ज्याझ्वः लिछ्यायेगु अले नापं जानाः हे बन्द यायेगु धकाः तःगु प्रस्तावयात ताम्सालिङ संयुक्त संघर्ष समितिं स्वीकार यानाः सहलह जू कथं अथे आः बैशाख १४ गते नेवाः ताम्सालिङ बन्द यायेगु खँ क्वःछिउगु खः ।
अथे बन्द ज्याझ्वः ताःलाकेगु निंतिं नेवाः स्वायत्त राज्य मंकाः संघर्ष समितिइ दुथ्याःगु १० गू घटक व ताम्सालिङ संयुक्त संघर्ष समितिइ दुथ्यागु ७ गू घटकया छम्ह छम्ह प्रतिनिधि दुथ्याकाः नेवाः ताम्सालिङ संयुक्त संघर्ष समिति तकं दयेकेगु ज्या थौंया मुँज्यां याःगु दु ।
थ्वहे दथुइ नेवाः व तामाङतय्सं मंकाः कथं ऐतिहासिक रुपं बन्द ज्याझ्वः यायेत्यनागु खँयात कयाः कन्हय् छगू पत्रकार सम्मेलन यासें जानकारी बीगु जूगु दु ।
क्वःछिनातःगु ई जेष्ठ १४ गते हे संघीय लोकतान्त्रिक गण्तान्त्रीक नेपाःया न्हूगु संविधान जारी यायेमाःगु, संघीयता, लोकतन्त्र व गणतन्त्रयात सुनिश्चितता यायेमाःगु, नेवाः-ताम्सालिङ अखण्डित प्रदेशया सुनिश्चितता यायेमाःगु, नेपाःया आदिवासीया भूमिइ गुगुं नं नामं प्रदेश दयेके मजिउगु नापं थीथी कथंया मागः यानाः अथे नेवाः ताम्सालिङ बन्दया आह्वान याःगु खः ।
लिपांगु इलय् वयाः प्रस्तावित नेवाः व ताम्सालिङ प्रदेशया सवालय् सीमाया समस्या समाधान यायेगु नितिं छुं ई न्ह्यवंनिसें हे नेवाः स्वायत्त राज्य मंका: संघर्ष समिति व ताम्सालिङ संयुक्त संघर्ष समितिया दथुइ सहलह ब्याकेगु निंतिं आधिकारिक प्रतिनिधित हे च्वनाः खँ ब्याकाच्वंगु दु ।
नेवाः स्वायत्त राज्य मंका: संघर्ष समितिइ थीथी राजनीतिक दलया भातृ संगठनत घटकया रुपय् गुगु कथं दुथ्यानाच्वंगु दु । अथे हे ताम्सालिङ संयुक्त संघर्ष समितिइ नं घटकत दुथ्यानाच्वंगु दु ।
