मंकाः न्यूनतम ज्याझ्वः हइगु

सरकार संचालनया नितिं संयन्त्र दयेकेत सहमति

येँ (झीगु स्वनिगः)

एकीकृत नेपाल कम्युनिष्ट पार्टी (माओवादी) व नेकपा (एमाले)या शीर्ष नेतातय्गु दथुइ मधेसी जनअधिकार फोरमलिसे सहलह यानाः वर्तमान सरकारया मंकाः न्यूनतम ज्याझ्वः याकनं हयेगु खँय् सहमति जूगु दु । एमालेया सिंहदरवारय् च्वंगु संसदीय दलया ज्याकुथिइ निगू दलया शीर्ष नेतातय्गु मंकाः मँज्या च्वनाः अथे सहमति याःगु खः । उगु मुँज्याय् एकीकृत माओवादी व एमालेया दथुइ सरकार गठनया नितिं जूगु न्हय्गू बुँदाया सहमति कथं हे आः सरकार संचालनया नितिं उच्च स्तरीय राजनीतिक संयन्त्र दयेकेगु खँय् नं सहमति जूगु खः ।

अथे हे निगू दलया दथुइ पूर्ण बजेट हयेगु खँय् सकारात्मक जूगु दु । पूर्ण बजेट बैशाखया स्वंगूगु वालय् हइगु संभावना दु धकाः धाःगु दु । एकीकृत माओवादीया न्वाकु नारायणकाजी श्रेष्ठ प्रकासं पूरक बजेट हयेगु ई म्हो जूगुलिं आः पूर्ण बजेट हयेत थःपिं सकारात्मक जुयागु खः धकाः संचारकर्मीतय्त धयादीगु दु । अथे हे उगु मुँज्याय् आः याकनं हे सरकारयात पूर्णता बिइगु खँ जूगु नापं मधेसी जनअधिकार फोरम नाप नापं सरकारय् दुहां वइगु मेमेगु चिचीधंगु दलया नेतातलिसे नं सहलह ब्याकेगु खँ जूगु खः । म्हिगः शुक्रवाः जूगु उगु मुँज्याय् एकीकृत माओवादी नायः पुष्पकमल दाहाल प्रचण्ड, न्वाकुपिं मोहन बैद्य किरण, नारायणकाजी श्रेष्ठ प्रकास, प्रधानमन्त्री नापं एमालेया नायः झलनाथ खनाल, वरिष्ठ नेतात माधवकुमार नेपाल, केपी शर्मा ओली, मूछ्याञ्जे ईश्वर पोखरेलपिन्सं ब्वति कयादीगु खः ।

एकीकृत माओवादी व एमालेया दथुइ सरकारया पूर्णता बिइगु खँय् कचमच जुल धकाः थीथी संचार माध्यमतपाखें बय्बय् यानाच्वंगु अवस्थाय् निगू दलया शीर्ष नेतातय्गु मंकाः मुँज्या च्वनाः सरकार संचालन, बजेट नापं सरकारया सपूर्णता बिइगु सवालय् अथे सहमति जूगु खः ।