जीवन छगू यात्रा : लङ्ग रुटया [बाखं]

हरिकृष्ण डंगोल

थौंकन्हय् सर ! मनी, हङग्री ...... धायेमाःगु अवस्थाय् जि मदु । छम्ह कुइरेया दयां बाय् मायावनाः बियाथकूगु दांप्वःया लिधंसाय् जि छुं दिं न्ह्यःनिसें लङ्ग रुटया बसय् यात्रा यानाच्वनागु दु । छुं दिं न्हापातक जि ठमेल, बसन्तपुर, झ्वःछेँया ल्याःचाः मदुगु सतक, गल्लीया यात्रा यानाच्वनागु खः । आः वयाः जि बसया यात्रा यानाच्वनागु दु । थ्व जिगु यात्रा गन थ्यंकेया निंतिं खः? गन थ्यनाः थ्व क्वचाइगु खः? जिं हे नं मस्यू । बस् जि चाःहिला च्वनागु दु, छगू थासं मेगु थासय् ।
नागबेली काःगु लँपुइ बस थःगु हे रफ्टारं न्ह्याः वनाच्वंगु दु । हर्न न्यायेकल कि सिकारु पाइलट तायेकीगु थ्व लँपुइ बसया ड्राइभरं अप्वः यानाः हर्न न्यायेकी मखु । थ्व बसया ड्राइभरं नं हर्न मन्यायेकू । बसया छपाः झ्याः पाखेया सिटय् जि दु । जि नापं छम्ह मिसा सहयात्री दु । थःगु सिटया नापसं छम्ह ल्यासेम्ह मिसा दुगुलिं जिके भचा मछाःपहः, भचा मछिंपहः वा जि भचा उसिंमसिं धायेमाःगु खः । मिसाया स्पर्सय् जिं थःत क्वाकेमाःगु खः, जिं थःके भचा चःति हायेकेमाःगु खः । तर जि थःगु तालय् हे सुम्क! मौन ! अपरिचित सहयात्री मिसाप्रति जिगु छुं आकर्षण मदु । धाये, मिसाया स्पर्सया अनुभूतिपाखें बेखवर जि ब्वाँय् वनाच्वंगु बसया लिसेंलिसें वा छझाः खनेदयाः हानं खनेमदइगु गुँ, पहाड व खुसिया लिसेलिसें ब्वाँय् वनाच्वनागु दु ।
पूर्वपाखे स्वयाः न्ह्याःवनाच्वंगु बसय् च्वनाः तिफ्याये मफुगु दृष्यत स्वस्वं न्ह्याःवनाच्वनाम्ह जि, जिगु गन्तब्य गन खः, जिं मस्यू । खालि बसय् च्वनेगु, बस स्टपय् क्वहाँवयेगु, हानं बसय् च्वनेगु । अले हानं हानं वहे तिफ्याये मफूगु दृष्यत स्वस्वं वनेगु । थथे बस, गुँ, पहाडया लिसें लिसें न्ह्यज्याःवनाच्वनागु ग्वःन्हु दत? जिं धाये मफू । ल्याःचाः मदुगु जीवनय् छु छु घटना, दुर्घटना जुल उकिया ल्याःचाः जिं मतया, तयेमफु । यद्यपि विगतया छुं घटना, दुर्घटनापाखें जि विमुख जुइफुगु नं मखु । लङ्ग रुटया बस थें जीगु जीवन, लङ्ग रुटया बस थें तुं जिं न्ह्यज्याना च्वना । उखेंथुखे । थुखेंउखे ।
रफ्टारं ब्वाँय् वनाच्वंगु बस ध्याच्च दित । बसया अपर्झट ब्रेकं जिगु छ्यं न्ह्यःनेच्वंगु सिटय् न्यात ।
- आय्या s s s ! अचानक जिगु म्हुतुं सः पिज्वल । जिं काचाक्क छ्यनय् ल्हाः तया । जिगु एकतमासया एकाग्रता भङ्ग जुल । सिटय् नापंच्वंम्ह मिसां जितः स्वल । बस च्याचि त्वनेत रोके याःगु जुयाच्वन ।
- च्या त्वंझायेगु मखु ला? म्हमस्यूम्ह मिसाया अप्रत्याशित न्ह्यसलं जि छझाः वाताहाँ जुल । यद्यपि न्ह्यसःया लिसः मबीगु असभ्यताया परिचायक खः । थ्व खँ जिं स्यू । येँया सतक बास व कुइरेतय्गु संगतं जिं थ्व खँ स्यना कयागु दु । उकिं जिं 'मखु' धयाः छ्यं जक संका ।
जिगु संकेतात्मक लिसः जक खनाः व मिसां जितः छकः क्वथिक स्वल । अले हानं धाल ।
- थन च्या मत्वन कि हानं च्या त्वनेत गनं दिकीमखु । जा नयेत जक दिकी । स्वघौ, प्यघौ द्यांलाना च्वनेमाली ।
अपरिचित थ्व ल्यासे मिसाया जि प्रति थ्व छाय् च्यूताः? म्हमस्यूम्ह मिसाया ख्वाः स्वस्वं जिं थःगु मनय् खँ ब्याका । मनय् खँ ल्हाकाच्वनेगु ई थ्व मखु । जिं स्यू, वया नाप न्ह्यसः लिसः कासा म्हिताच्वनेगु धइगु मस्याःगु कपाः स्याकाच्वनेगु खः । जितः कपाः स्याकाच्वने मयः । अथें नं जिगु जीवनय् यक्व मनूतय्सं च्यूताः क्यंगु दु, दया, माया याःगु दु । अले, सुना नं इनाप याःगु खँय् म्हाः नं धाये मसःम्ह जि । उकिं लिसः बियाच्वनेगु स्वयां वनाप सुम्क वनाछ्वःसा पारजुइ धैकथं जि वनाप वनाछ्वयाः, कुइरेतय्नाप ल्यूल्यू वं थें । छगू रेष्टुराँय् दुहांवनाखतं व मिसां निगू कप च्या व सेल निपा-निपा, आलु तरकारीया अर्डर बिल ।
च्या त्वना । जिं वयात स्वयाः, वं जितः स्वल ।
- छि गन झायेत्यनागु? सखे शुन्यता मिसायात मयः। वं शुन्यता त्वाःथलेगु कुतः यात ।
- मस्यू । जिं धया ।
- छेँय् लिहाँझायेत्यंगु जुइका मखु ला? हानं वं न्यन ।
- खः ......। मचायेक हे जिगु म्हुतुं पिहांवल ।
जिं स्यू, जि छेँय् लिहाँवनेत्यनाम्ह मखु । दँ दँ सतक छाप जुयाः म्वानाच्वनाम्ह जि, जिगु छेँय् गन, छु थासय् लाः जिं हे मसिइ धुंकल । मचाबलय्या छगू न्हि श्याम नाप बुटवलं येँय् वयाम्ह जिं थुलि हे स्यू, जिगु छेँ बुटवलय् खः । तर गन खः, गनथाय् दु जिं मस्यू । तर थौं जि पूर्वपाखे स्वयाः वनाच्वनागु खः । जिगु छेँ थुखे हे लाः ! यद्यपि तःदँ न्ह्यःनिसें जिगु निंतिं छेँ धइगु सतः, फलचा वा सुनानं ब्वनायंकूसा होटल वा सुयागुं छेँ जुयाच्वंगु दु । गन चा बास जुल जिगु छेँय् अन हे खः । तर जिं व मिसायात छुं मधया।
- छ्यनय् तःसकं न्याः थें च्वं । फ्वंगः हे खनेदु । मिसाया सः हानं तायेदत । अले सिटय् छ्यं न्यानाः 'आया s s s धइगु शब्द जितः हानं लुमना वल ।
जितः लुमंकथं थ्व दर्दनाक शब्द श्यामं जितः प्वाथय् दाःबलय् जिगु म्हुतुं न्हापां पिहाँवःगु खः । येँय् न्हापांगु चाबासय् जितः श्यामं दाःगु खः । जिं थ्व खँयात गुबलें ल्वमंके मफु ।
येँय् जिगु जीवनया न्हापांगु व चाबास । बुटवलं बसय् च्वनाः जि श्यामनाप न्हापां येँय् वयागु । येँया झिलिमिली जीवनय् जि न्हापां दुस्वःवइगु । श्यामं जितः येँया वातावरणलिसे भ्यलय्पुंके हःगु । सुथय् वयापिं जिपिं बहनी बसपार्कय् थ्यन । चिरमांया घृणित ब्यबहार सहयायेमफया ४५ सालय् बौया म्हिचां न्यातका धेबा खुयाः श्यामनाप येँय् वयाम्ह जि ।
जि वयागु दिं कुन्हु जनबाहाः द्यः सालिगु दिं जुयाच्वन । जमलं भोटाहिटी सालीगु । बसपार्कं जिपिं तप्यंक भोटाहिटी वया । द्यःयात उखेंथुखें छानाहःगु धेबा बँय् नं कुतुंवइगु । श्यामं व धेबा लायेत वन । धेबा लायेत व द्यःया क्वय् उखेंथुखें ब्वाँय् वनाच्वन । जिं वयागु क्रियाकलाप जक स्वयाच्वना । जि न्हापां येँय् वयाम्ह । जि धेबाः लायेत न्ह्यचिले मफु । अन श्याम थें ज्याःपिं मेपिं नं दु । बहनी लिबाक्कतक श्याम धेबा कुतुंवःगु लाना हे च्वन । तर जि धाःसा नयेपित्यानाः च्वनेफुगु हे मखु । श्यामं व दिं कुन्हु धेबा लानाः नीतका, स्वीतका ति हे धेबा मुंकल जुइ । वं धेबाः लाये गाकाः जितः मःमः नकल । अले द्यनेत वं जितः भोटाहिटी लिक्कसं च्वंगु छगू फल्चाय् यंकल । जिं न्ह्यः वयेकेत स्वया, तर मल्ताया उसुगु बासं जि ताउत द्यःने फूगु मखु । गुबलय् न्ह्यः वल जिं मचा । सुथय् श्यामं जितः झाटापाटा यानाः थन । थनाखतं वं जिके न्यन - छं जिगु धेबा कया ला?
- अहँ । जिं मकाया भावं छ्यं संका । तर वं पत्याः मयाः । हजि, जिगु धेबाः धाधां वं जिगु प्वाथय् छत्थु दाल । जिं 'आय्या s s s' धकाः चिल्लाय् दनाः हाला । दाःगु सहयाये मफयाः जिगु मिखाय् ख्वबि लः लः धाल । श्यामं जिगु ख्वबि खनाः खः वा जिगु चिल्लाय् दंगु सः खनाः खः वं लिपा छुं मधाः । तर वं जितः त्वःताः वनाछ्वत । जि याकःचा प्वाथय् ल्हाः तयाः ताउत व फल्चाय् सुम्क दनाच्वना । येँय् जि याकःचा जुयागु न्हापांगु दिं ।
- छाय् ! छु खँय् दुबिना च्वनागु? मिसाया सलं जि हानं झसङ्ग वन । टेबुलय् च्वंगु ख्वाउँगु च्यां जितः स्वयाच्वन । जितः च्या त्वने मास्ति मवल । जि दना ।
- छाय् च्या त्वनेगु मखुत ला?
अहँ ! भावं जिं छ्यं संका । धेबाः बीत काउण्टरय् वना ।
- जिं बी धुन । वं धाल ।
जिं छुं मधया । निम्हं लिहाँवयाः थःथःगु सिटय् फेतुना । जि नापं व, व नापं जि । न्हाचःतक अपरिचितम्ह व मिसा, अले व मिसापाखे छुं हे ध्यान मवंम्ह जि, आः वयाः, छाय् खः, जितः भचा मछिं थें जुयावल, भचा क्वाःलखं लू थें जुयावल । वयागु स्पर्स जितः क्वाः थें च्वनावल । वयापाखें जिं थःत अलग्ग तयेत स्वयाः । तर वलिसे जि झंनझंन सतिना वं थें जुल । जिगु ख्वाः ह्याउँया वः थें जुल ।
- छाय् छु जुल?
छुं नं मजू भावं जिं छ्यं जक संकाः लिसः बिया ।
- छाय् जि खनाः ग्यात ला?
मतिइ हे मतइगु वयागु न्ह्यसलं जि थारा न्हुल । खः सुं नं मिसापिन्सं जि नाप सत्तिकेत स्वल कि जितः भचा गरखेसे च्वना वये यः । जिगु ख्वाः ह्याउँया वये यः । अले जितः मेरिना म्याम लुमना वये यः ।
मेरिना म्याम ! जिगु कुमारत्वया शीलभङ्ग याःम्ह न्हापांम्ह मिसा ! छम्ह सतक मचाया निंतिं न्हापांगु यौनाभूति ! जि उबलय् झिंछदँ, झिंनिदँति जक दुगु खः । ल्वःमंकेत स्वःसां ल्वःममनीगु थ्व जिगु जीवनया न्हापांगु दुःखद वा सुखद जीवनया अनुभूति जुयाबिल ।
जितः आः नं लुमं, मेरिना म्यामनापया न्हापांगु चा बास !
छन्हु जि डेन्ड्रराइटया वास काकां ठमेलया दुवातय् च्वनाच्वनागु । डेन्ड्रराइट त्वनाच्वनागु इलय् मेरिना म्याम जिगु न्ह्यःने दंवःगु । अले मुसुकाःगु ख्वालं जिगु छपाः फोटो काःगु खः । लिपा जिगु ख्वाःपालय् थःगु नायुगु ल्हाःतं माया यायां न्यंगु खः।
- नये पित्यात ला?
जिं छ्यं जक संकाः 'खः' धया ।
वं जितः छगू रेष्टुरेण्टय् ब्वनायंकल । वं जितः साःसागु नकल । अले थःलिसें तुं जितः छगू होटेलय् ब्वनायंकल । जितः म्वःल्हुकल । अले जिगु सफागु नांगागु म्हया थीथी ब्वहलय् वं थःगु नायुगु ल्हाःतं मालिस याकल । जिगु ख्वाः ह्याउँया वन।
- छाय् जि खनाः ग्यात ला? मेरिना म्यामं न्यनं ।
जिं मखु भावं छ्यं जक संका । लिपा वं छु छु यात, छु छु ...... । मछालाः खः वा मेरिना म्यामया स्पर्शं खः जिगु ख्वाः झंझं ह्याउँया वन । अले मेरिना म्यामं जिगु कुमारत्वलिसे म्हितेफक्व म्हितल ।
वं जितः तन्हु तक थः नापंतुं तयाः साःसाःगु नकल । जि नाप ख्याः यात, म्हितल । अले छन्हु वं जितः छखाः छेँय् यंकल । अन मेपिं नं मिसा व मिजं मस्त दुगु खः । खुकू, न्हय्कू ति कोथा दुगु व छेँय् थीथी मचा सफू, म्हितेगु ज्वलंत नं दुगु ।
मेरिना म्यामं जितः अफिस थें च्वंगु छगू कोथाय् यंकल ।
- काः आः हानं छम्ह हया । मेरिना म्यामं धाल ।
- जि हे जिल नि । व मिसां लिसः बिल ।
- मिस्टर ज्याक्सन निरीक्षण यायेत कन्हय् वइगु हँ ! मखु ला?
- खः?
- कासा निरीक्षण ज्वःछि थुमित थन बांलाक तयाति।
- हस् ।
मेरिना म्याम लिहांवने न्ह्यः हानं छकः जिगु न्यतालय् चुप्पा नल । अले वं 'जि हानं वये, बांलाक च्वनाच्वँ' धाधां वनाछ्वत । जि व वंगु स्वयाच्वना । अनं लिपा मेरिना म्याम नाप जिगु स्वापू मन्त ।
- हानं छाय्, छु खँय् घुरेय् जुयागु? छ ला ...... धाधां व मिसां जिगु ल्हाः ज्वन, अले वास्या वास्या यात । वं जिगु ल्हाः ज्वनाः वास्यावास्या यासेंलिं जि छकः हानं झस्के जुया ।
जिं व मिसायात स्वया । स्वयाः च्वना । मेरिना म्याम व थ्व मिसा ! अले ...... अले ...... सीता !
सीता जिमि सतक पासा । जि प्रति वया तःसकं माया, मतिना दु । व चिरिमांया कसा सहयाये मफयाः छेँय् नं बिस्युंवःम्ह । जिपिं ज्वलिंज्वःया पासापिं । जि उबलय् झिंन्यादँति दुगु खः । व अथे हे झिंप्यदँति दत जुइ ।
छन्हु बहनी ठमेलया सतक पेटिया अंगलय् लिधनाः जि याकःचा च्वंच्वनागु । सीता वल । उबलय् जिगु छ्यं तसकं स्यानाच्वंगु । छुं याये मंमदया च्वंगु । बस् लोडसेडिङ्गया इलय् फाटफुट् च्यानाच्वंगु जःलय् खनेदइगु, कार व मनूत स्वस्वं त्वःलय् जुयाच्वनागु । व वयाः जिगु ल्हाः ज्वन । अले न्यन - छाय् ख्युंगु थासय् च्वनच्वनागु? छु खँय् घुरे जुयाच्वनागु? धाधां जिगु ल्हाः वास्यावास्या यात ।
सीताया न्ह्यसःया लिसः जिके मदु । छम्ह खाते नामं सुशोभित जुयाच्वंम्ह जि, सतक मचायाके लिसः दइगु नं छु? छु खँय् घुरे जुइगु? छु खँयात कयाः घुरे जुयाच्वनेगु? छु खँयात कयाः नुगले स्याकेगु? घुरे जुइगु कारण मदइगु मखु ! तर लिसः बीगु छु? छम्ह सतक मचां सतक मचायात छु लिसः बीगु? यद्यपि मनय् धाःसा यक्व खँ वालीगु । उबलय् नं जिगु मनय् यक्व खँ वात्तुवाःगु खः । सीतायात लिसः बी मास्तिवःगु खः -
सतक पेटी स्याक्क न्ह्यः वयेकाच्वनेबलय् पुलिसं थ्वाइगु खँयात कयाः घुरेय् जुयागु !
बगलिमारे यानाः, फ्वनाः वःगु धेबा दादातय्सं लाकाकाःगु खँय् घुरेय् जुयागु !
तिनिख्यःया शौचालय् वनाः बुरातय्गु ...... मुख मैथुन याः वनेमाःगु खँय् घुरेय् जुयागु !
होटेलय् वनाः थीथी मिजं व मिसातय्त यौन सन्तुष्टि बीत सास्ती नयेमाःगु खँय् घुरेय् जुयागु !
सतक पासा श्यामचा नसागुलु जुजुं वनाः एड्सं थियाः सीगु खँय् घुरेय् जुयागु !
रमायात पुलिसतय्सं लँय् हे सामुहिक बलात्कार याःगु खँय् घुरेय् जुयागु !
पित्याः प्वाः लंकेत डेन्ड्रराइट, लाकांया पालिस नयेमाःगु खँय् घुरेय् जुयागु !
सतक पासापिसं हे छन्त (सीता) लँय् सामुहिक बलात्कार यायेत स्वःगु खँय् घुरेय् जुयागु !
थीथी एन.जी.ओ.लय् निरीक्षण वइगु झ्वलय् कतांमरी जू वनेमाःगु खँय् घुरेय् जुयागु !
छ्यंग्वः खाकेत धेबा बियाः जुलुसय् यंकीगु खँय् घुरेय् जुयागु !
मूल्यहीन जीवन म्वायेमाःगु खँय् घुरेय् जुयागु !
...... ...... !
तर जिं सीतायात छुं लिसः मबिया । सतक जीवनया अनुभवं मचा वैंशय् वयस्क जुयाम्ह जि, जिगु बिचाः इमिगु स्वयाः पाः । जिं थथे तायेकागु दु । मेपिं सतक मस्त थें फुक्का जुयाः म्वायेमफु जि, जिगु घेरा सीमित ।
सीतां न्यंगु न्ह्यसःया छुं लिसः बी फुगु स्थिति मदुसेंलि जिं सीतायात स्वयाः फिस्स न्हिला जक बिया । सीता लय्ताल । लय्तानाः जितः वं कसिक्क घय्पुल । जिं थःगु स्यानाच्वंगु छ्यं वया नुगःपाय् याउँक दिकाबिया । सीताया नुगःपाय् जिं थःत तंका बिया । जितः गुबलय् न्ह्यः वल खः, जिं मस्यू ।
जि न्ह्यलंचाःबलय् सीता जिथाय् मदु । अले व दिं लिपा सीतायात जिं गुबलें नाप नं मलाः । गुम्हेस्यां वयात पुलिसं यंकल धाइ । गुम्हेस्यां गुण्डातय्सं ज्वनावन धाइ । गुम्हेस्यां भारतय् यंकल धाइ । गुम्हेस्यां छम्ह कुइरें यंकल धाइ । धाः खँ यक्व दु । वंम्ह सीता हानं लिहांमवः । सीताया अभावय् जिं थःत याकःचा तायेका । धाये, सीता बिनाया जिगु जीवन निरस थें जुयाबिल । सीतायात जिं ल्वःमंके फुगु मखु ।
- छाय् ! छु खँय् थपायसकं दुबे जुयाच्वना? बसया सहयात्री मिसां हानं छकः जिके न्यन ।
जिं छुं लिसः मबिसें वयात स्वयाः मुसुक्क न्हिला बिया । व नं मुसुक्क न्हिल ।
द्यः खिउँया वने धुंकल । बस थःगु हे रफ्टारय् ब्वाँय् वनाच्वंगु दु ।
मुसुहुँ न्ह्युन्ह्युं व मिसां जिगु ल्हाः कसिक्क ज्वन । जिं नं वयागु ल्हाः कसिक्क ज्वना । वयात छकः क्वथीक स्वया । निश्चय नं थ्व मिसा मेरिना म्याम मखु ! अले बसया मद्धिम प्रकाशय् जिं वयागु नुगःपाय् थःगु छ्यं याउँक दिका । जितः ताल व मेपिं सुं मखु, जिमि सतक पासा सीता खः । सीता !

साभार : बाखं दबू ल्याः ४।

More Stories Like this