खाडीया आन्दोलनं नेपाःया लायेफुगु लिच्वः
थौंकन्हय् खाडीया थीथी देशय् न्ह्यानाच्वंगु प्रजातान्त्रिक आन्दोलनं यानाः नेपाः थेंज्याःगु देशयात लिच्वः लायेफुगु खँयात कयाः एशियाली विकास बैंकं चिउताः प्वंकूगु दु। खतुं उगु देशलिसे नेपाःया अज्याःगु छुं क्वातुगु स्वापू दुगु मखु। तर नेपाःया लखौं मनूत उगु देशय् ज्यामि जुयाः ज्या याः वनाच्वंगु कारणं आन्दोलनं यानाः उमिगु रोजगारीइ लिच्वः लाये फइगु खँ पिहां वःगु दु। यदि खाडी लागाय् ज्या याः वनाच्वंपिं नेपाःमित लिहां वयेमाःगु अवस्था जुल धाःसा उकिं नेपाःयात निगू कथंया मार लाः वनी। छगू ला ज्या मदयाः लिहां वःपिं ज्यामित नेपालय् नं छुं हे ज्या मदयेकाः च्वने माली। उमिसं छुं याये खनी मखु। मेगु, उमिसं नेपालय् छ्वया हयाच्वंगु खर्बौ तकाया रेमिटेन्स नं बन्द जू वनी। उमिसं छ्वया हइगु रेमिटेन्स थौं नेपाःया अर्थतन्त्रया हे छगू अभिन्न अंग जुइधुंकूगु दु। नेपाःया अर्थतन्त्रं थी मफुपिं गांगांया आपालं जन समुदाययात विदेश वनाच्वंपिं उमि छेँजःपिंसं छ्वया हइगु ध्यबां कःघानाच्वंगु दु। यदि थ्व बन्द जुल धाःसा नेपालय् आर्थिक जक मखु सामाजिक खलल समेत वयेफुगु खतरायात बिचाः यायेमाःगु अवस्था दु ।
खाडी लागाय् थौंकन्हय् न्ह्यानाच्वंगु आन्दोलनं आः गज्याःगु रुप काः वनी धायेफुगु अवस्था मदु। यदि थ्व आन्दोलन नेपाःया अत्यधिक ज्यामित ज्या यानाच्वंगु साउदी अरब, कतार थेंज्याःगु देशय् तकं न्यनावन धाःसा नेपाःया लागिं धाथें हे तःधंगु पहाड कुतु वया बी। थज्याःगु खँय् एशियाली विकास बैंकं चिउताः प्वंकू थें नेपाःया सरकार वा गुगुं नं राजनीतिक पार्टीं आः तक बिचाः तक नं याःगु मदुनि थें च्वं ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
