खाडी आन्दोलनं नेपाः संकटय्
चिकं व ज्यामि समस्या बारे एडीबी चिन्तित
येँ (सन्ध्या टाइम्स)/थौंकन्हय् मध्यपूर्वया थीथी देशय् छगूयां लिपा मेगु प्रजातान्त्रिक आन्दोलन न्ह्यानाच्वंगुलिं उकिं वहे देय्यात छुं हानी मयाःसां नेपाःयात धाःसा तःधंगु हे आर्थिक मार लाकेफुगु खँ एशियाली विकास बैंक (एडीबीं) धाःगु दु ।
निदँ न्ह्यः विश्वन्यंकं वःगु आर्थिक मन्दीया लिच्वः बरु नेपाःयात मलाः, छाय्धाःसां नेपाःया अर्थतन्त्र विश्व बजाःलिसे तप्यंक सम्बन्धित मजू। तर आः मध्य पूर्वय् जुयाच्वंगु राजनीतिक आन्दोलनं धाःसा नेपाःयात प्रत्यक्ष रुपं हे लिच्वः लाकीगु खँ नं एडीबीं धाःगु दु। मध्य पूर्वय् जुयाच्वंगु थ्व आन्दोलनं नेपाःयात खास यानाः निता कथं लिच्वः लाकीगु खँ नं एडीबीं धाःगु दु
।
छगू ला थहां वनाच्वंगु चिकंया भावं नेपाःयात तःधंगु मार लाकी। मेगु, खाडीइ ज्या याः वनाच्वंपिं नेपाःमित ज्या मदयाः लिहां वयेमाःगु अवस्था वया बी। नेपाःया श्रम शक्ति थौंकन्हय् मुक्कं हे खाडी मुलुकय् निर्भर जू वनेधुंकूगु दुसा अनं वइगु रेमिटेन्स आः नेपाःया मूल आर्थिक स्रोत समेत जुइधुंकूगु दु। थज्याःगु अवस्थाय् अन जुइगु छुं नं कथंया अस्थिरताया लिच्वः नेपाःयात प्रत्यक्ष रुपं हे लाइगु खँ नं एडीबीं धाःगु दु ।
अथे हे थहां वनाच्वंगु चिकंया भाः नेपाःया लागिं मेगु समस्या जुइगु खँ नं धाःगु दु। छाय्धाःसां आः हे नं नेपाःया आयल निगम चिकंया बिक्रीपाखें तःधंगु आर्थिक मारय् लानाच्वंगु दु। उकिसनं अप्वयाच्वंगु लोड शेडिंगं यानाः नेपाः थप पेट्रोलियम पदार्थ झिके यायेत बाध्य जुयाच्वंगु दु। आन्दोलनया कारणं न्हिंन्हिं धइथें थहां वनाच्वंगु चिकंया भावं नेपालं मुंकातःगु राजश्व उकी जक पर्कु पर्कुं फुके मालीगु अवस्था वयेफु धाःगु दु ।
ट्युनिशियां शुरु जूगु थ्व प्रजातान्त्रिक आन्दोलन आः बहराइन तक थ्यनेधुंकूगु दु । थ्व आन्दोलन अन गपाय्हाकः न्ह्याइगु खः व अनं लिपा हानं मेगु गुगु देशय् थ्यनीगु खः व आः धाये मफइगु अवस्था जुइधुंकूगु दु। एडीबीं नं थ्व आन्दोलनं आः गज्याःगु मोड काइगु खः धाये मफु धइगु हे अनुमान याःगु दु। अज्याःगु अवस्थाय् नेपाःयात जुइ फुगु समस्या नं झन हे ताःहाकः जुइगु खँ नं धाःगु दु। आन्दोलन ताःहाकः जुयाः ज्यामित लिहां वयेमाल धाःसा उपिं गन वनेगु व नेपाः हे लिहां वल धाःसां नं गय् यानाः तयेगु धइगु बारे छुं बियाः मजुयाच्वंगु खँ नं एडीबीं इंगित याःगु दु ।
