मजदूर युनियनतय् गलत प्रतिस्पर्धा

छुं ई न्ह्यः तिनि देय्या थीथी पार्टी समर्थित मजदूर युनियन व उद्यमितय् दथुइ आः प्यदँ तक कलकारखाना हे बन्द जुइ कथं हडताल बन्द मयायेगु धकाः सहमति जूगु खः। थुकिं यानाः औद्योगिक ख्यलय् छगू कथंया उत्साहया संचार नं जूगु खः। तर मजदूर युनियनतय् थवं-थवय्या कचवनं यानाः उगु सम्झौता ताः ई टिके जुयाः धाःसा च्वने मफुत। सम्झौता जूगुयां छुं ई लिपा हे पोखराया नांजाःगु फिसटेल लजया मजदूरतय्सं हडताल यानाः अन वयाच्वंपिं पर्यटकत नापं पिहां वनेमाःगु अवस्था वल। थ्व मजदूरतय्गु तसकं बांमलाःगु ज्या खः। देशय् पर्यटन वर्ष चले जुयाच्वंगु इलय् पाहां कथं ध्यबा पुलाः च्वनाच्वंपिं पर्यटकयात अथे बिचल्ली जुइक पितिना छ्वयेगु ज्यां विश्वन्यंकं हे नेपाः बारे नकारात्मक सन्देश वना बी। थुकिं नेपाःया पर्यटन उद्योगयात लिपा तकं लिच्वः लाकेगु ज्या याना बी ।

लिसें मजदूरतय् छगू पुचलं प्यदँ तक हडताल याये मखु धकाः सहमति यायेधुंकाः हानं मेगु पुचलं उकियात अस्वीकार यायेगु खःसा थ्व ला आः गबलें हे क्वमचाइगु विवाद जुयाः न्ह्याः वनीगु जुल। छगू युनियनं सम्झौता याइ, मेगु युनियनं उकियात तोडे याइ। हरेक युनियनया थःथःगु हे माग व मुद्दा दु। थःथःगु माग पूवंकाः थःपिंत स्थापित यायेगु झ्वलय् मजदूर युनियनतय्सं अनावश्यक माग समेत यानाः संस्थायात डुबे यायेगु ज्या याना बी। थुकिं स्वयम् मजदूर जक मखु, पुँजीपति व अन्ततः समग्र मुलुकया अर्थतन्त्रयात हे ध्वस्त याना बी। मजदूरतय् प्रतिस्पर्धा ला थःपिं ज्या यानाच्वनागु संस्थायात च्वन्ह्याकेगु ज्याय् जुइमाःगु खः। गलत थासय् जुयाच्वन ।

More Stories Like this