संविधान दयेकीपिनि हानं ल्वापु
उपसमितिया संयोजक हिलेगु खँय् कचमच
येँ (सन्ध्या टाइम्स)/संविधान जारी यायेगु ई निला जक ल्यं दनिबलय् संविधान दयेकीपिनि दथुइ हानं छक्वः कचवं ब्वलंगु दु।संविधान च्वज्याय् पिहां वयाच्वंगु विवाद समाधान यायेत म्हिगः स्वंगू तःधंगु दलया शीर्ष नेतातय् दथुइ च्वंगु बैठकय् कचकच जुयाः आः दुगु बांलाःगु वातावरण नं स्यनी थें च्वंगु खँ सूत्रं धाःगु दु ।
संविधानया मस्यौदा च्वइगु संवैधानिक समिति अन्तर्गतया उप समितिया संयोजक प्रचण्डं थः उगु उपसमितिइ च्वने लाइ मखुत, उकिं थःगु पार्टीपाखें उपाध्यक्ष प्रकाशयात संयोजक दयेके माली धकाः प्रस्ताव तयेवं कांग्रेस व एमालेया नेतातय्सं विरोध याःगु खः। प्रचण्डं थम्हं ई बी मफयाः उपसमितिइ च्वने फइ मखु धाःगु खःसां वास्तवय् वय्कलं उपसमितिइ च्वनाः फटाफट निर्णय यात धकाः पार्टीया उपाध्यक्ष मोहन वैद्यं विरोध याःगुलिं वय्कलं थः मच्वनेगु खँ धयादीगु खः। थ्व उप समिति विवादास्पद बुँदा बारे निर्णय यायेत हे गठन याःगु खः। आः थुकिया संयोजक सु जुइगु धइगु खँय् हे विवाद पिहां वःगुलिं आः संविधानया विवाद ज्यंकेगु ज्याय् हानं छक्वः समस्या पिहां वइगु अनुमान याना हःगु दु। उपसमितिं आः राज्य पुनर्संरचना बारे निर्णय यायेमाःगु खः ।
माओवादीया मजदूर विवाद झन तच्वल
सिन्धुपाल्चोकया सुकुटे धाःगु थासय् आरामदायी बैठक च्वनाः नुगः यचुका वःपिं माओवादी नेतात येँय् थ्यनेवं हानं ल्वायेगु शुरु जूगु दु। माओवादी मजदूरतय् दथुइ पिहां वःगु समस्या समाधान यायेत म्हिगः च्वंगु पार्टीया बैठकय् मजदूर संगठनत भंग यायेधुंकाः आः गठन जुइगु महाधिवेशन तयारी समितिया संयोजक सु जुइगु धइगु खँय् विवाद पिहां वःगु दु। अध्यक्ष प्रचण्डं उकिया संयोजक शालिकराम जमकटेलयात दयकेगु धकाः कुतः यानादीगु खःसां निम्हं उपाध्यक्षपिं मोहन वैद्य व डा. बाबुराम भट्टराईनं शालिकरामयात संयोजक दयेके दइ मखु धकाः विरोध यायेवं मजदूर विवाद हानं थाति लाःगु खः ।
उखे माओवादी मजदूर दथुइ पिहां वःगु थ्व ल्वापुं यानाः छुं न्हि न्ह्यः तिनि थीथी पार्टीया मजदूर युनियन व उद्योगीतय् दथुइ आः वइगु प्यदँ तक बन्द हडताल यायेगु मखुत धकाः जूगु सम्झौता अलपत्रय् लाः वंगु दु। उगु सम्झौताय् माओवादीपाखें प्रचण्ड पक्षीय मजदूरतय्सं सही याःगु खः ।
