सेना समायोजनाय् खने दुगु तुयूगु जः

शान्ति प्रक्रियाया दकलय् प्रमुख पंगः जुयाच्वंगु सेना समायोजनाया ज्या आः सकारात्मक दिशाय् न्ह्याः वनीगु संकेत पिहां वःगु दु। माओवादी लडाकुयात छु मोडालिटीं समायोजन यायेगु धकाः विवाद जुयाच्वंगु खःसा आः नकतिनि नेपाली सेनां तयार याःगु छगू मोडालिटीयात माओवादीं नं स्वीकार यायेगु धाःगु कारणं लडाकु समायोजनं मूर्त रुप काइगु संकेत खने दयावःगु खः ।

नेपाली सेनापाखें हःगु मोडालिटीइ सेना, प्रहरी, सशस्त्र प्रहरी व माओवादी लडाकु समेत तयाः छगू न्हूगु फोर्स दयेकेगु व उकियात नेपाली सेना मातहत तयेगु धइगु खँ दुथ्याः। माओवादीं धयाच्वंगु खँ नं थ्व स्वयां खास हे फरक मजू। माओवादीं थःपिनि लडाकुयात सुरक्षाया थीथी निकायय् समायोजन यायेगु वा बिस्कं फोर्स दयेकेगु धाःगु खः। आः सेनां तयार याःगु मोडालिटीइ देशय् दक्व हे सुरक्षा निकायया मनूत ल्वाक छ्यानाः बिस्कं युनिट दयेकेगु व उकियात सुरक्षा लिसें विकास निर्माणया ज्याय् नापं सक्रिय यायेगु खँ उल्लेख जुयाच्वंगु दु। थ्व दकलय् उचित उपाय खः। थुकी विवाद जुइफुगु छगू हे विषय छु दु धायेबलय् अज्याःगु बिस्कं युनिटय् माओवादी लडाकुत ग्वःम्ह तयेगु? नेपाली सेनां फयांफछि म्हो जक तयेत स्वयेफु। प्रस्तावय् थ्व युनिटय् १०-१२ द्वः जक संख्या तयेगु धाःगु दु। प्यंगू निकायं बराबर मनू हयेबलय् माओवादीया स्वद्वः प्यद्वः जक लडाकु दुथ्याके फइ। झिंच्याद्वः लडाकुपाखें स्वद्वः प्यद्वः जक कायेगु धायेबलय् माओवादीयात स्वीकार्य जुइत थाकुइफु। उकिं थुकिया बारे विस्तृत रुपं सहलह यायेगु आवश्यक जुइ। अथे खःसां सहमतिया लँपु चाःगु धाःसा थुकिया बांलाःगु पक्ष जूगु दु ।

More Stories Like this