न्हापांगु जरिमाया सिरपाः काःम्ह मिजं च्वमि: विमल ताम्राकार

कृष्ण प्रजापति
विमल ताम्रकार धायेवं ख्वपय् जक मखु स्वनिगः व स्वनिगलं पिने नं चिचीधंगु सफूत पिथनाः नेपालभाषा ख्यलय् थःगु बिस्कं म्हसीका स्थापित यायेफुम्ह व्यक्तित्व कथं कायेगु याः। आः वयाः राष्ट्रिय स्तरया उम्ह व्यक्तित्वं जापानी भाषां हे निगू सफू पिथनाः नं थःगु प्रतिभा न्ह्यब्वयादीगु दु। न्हापा हे नेपालभाषां च्वयाः पिथनेधुंकूगु 'खुसि व किसि', 'मल्ल जुजु व किसित' व 'ब्यांचा व किसि' नांगु स्वंगू सफूयात जापानी भाषां पिथनाः जापानय् वितरण यानादीगु खः। म्ह भचा किसि थें हे तःधिकःम्ह वय्कलं थथे जापानी भासं किसिलिसे स्वापू दुगु स्वंगू मचा बाखं सफू पिथनादीगु खःसां आः तक वय्कलं कुतः पिकाकपाखें जक सच्छि व स्वीनिगू व थःगु सफू मेमेगु प्रकाशनपाखें नं पिथनेगु यानाच्वनादीगु दु। याकःचिया कुतः नं सार्थक जुजुं वनाच्वंगु खँय् धाःसा वय्कः तसकं हे सन्तुष्ट खनेदु ।

मां धनलक्ष्मी ताम्राकार व अबु धुरवनारायण ताम्राकारया काय कथं नेपाल संवत १०८४ कौलागा ३० लक्ष्मीपुजा कुन्हु ख्वपया टिबुक्छेँ त्वालय् बूम्ह खः विमल ताम्राकार। वय्कलं थीथी सफू मुनेगु झ्वलय् ख्वपया हे दकलय् पुलांगु सफू पसः पुस्तक सदनय् थ्यंकाः नेपालभाषाया महाकवि चित्तधर हृदयया डायरी सफू नं धलकय् दुथ्यानाच्वंगु खंकल। थ्व नेपाल संवत ११०५ पाखेया खँ खः। अबलय् हे जक नेपालभाषा प्रति ध्यान क्वसालाः वय्कलं नातिबज्रया सफू धुकुती वनाः चित्तधर हृदयं च्वयातःगु उगु दायरी सफू न्यानाः ब्वनाः नेपालभाषा प्रति थःगु ममता अप्वयेकादीगु खः। वय्कः च्वसापासां पिथनातःगु आधुनिक हाइकू सफूपाखें अझ प्रभावित जुयादिल। नेपालभाषाया थीथी गतिविधिइ नं संलग्न जुइगु झ्वलय् विराट गुथि व नेपाल साहित्य मन्दिरया थीथी ज्याझ्वलय् नं ध्यान तयाः लगे जुयादिल ।

वय्कः नेपाल लिपि स्यनेज्याय् नं स्यल्लाःम्ह ब्यक्तित्व खः। तसकं बांलाक आखः चिनेगु यानादीम्ह वय्कलं नेपालय् जक मखु जापानय् च्वनादीगु इलय् नं अन नेपाल लिपि स्यनादिल। न्हापां ख्वपया इनाचोया पासा पुस्तकालयपाखें चले याःगु नेपाल लिपि कक्षाय् वय्कः प्रशिक्षक कथं ज्या यानादीगु खः। लिपा अन हे मदन श्रेष्ठपिंसं कयादीगु कक्षाय् नं ग्वाहालिमि कथं ज्या यानादिल।पेशा कथं वय्कः छम्ह टुरिष्ट गाइड खः। तर अथे खःसां वय्कःया ध्यान धाःसा नेपाल लिपि, नेपाल संस्कृति नापं नेपालभाषा साहित्य ख्यलय् न्ह्याबलें क्वसालाच्वंगु दु। अथे जुयाः हे वय्कलं नेपालभाषां जक न्यागू बाखं सफू पिथनेधुंकूगु दु। उकी दकलय् न्हापांगु म्हिचा बाखं सफू कथं पिथंगु 'फिसः' खः। तिबः प्रकाशनपाखें नं वय्कःया 'लिच्वः लकसं ब्वलंगु' नांगु सफू पिथने धुंकूगु दु। मचा बाखं लागाय् आपालं च्वसा न्ह्याःम्ह विमल ताम्राकारं 'लुँध्वाखा', 'लिपि पौ', 'लहना' व 'योमरी' नांगु प्यंगू साहित्यिक पत्रिकाया सम्पादन नं यानादीधुंकूगु दु। विडम्वनाया खँ थ्व फुक्कं पत्रिका आः पिहां वये फयाच्वंगु मदु ।

कुतः पिकाकपाखें आः तक थीथी सफू पिकायेत च्वमि थःगु हे व विमल ताम्राकारं थःगु ब्यक्तिगत ध्यबा तयाः हे सफूत पिथनेगु ज्या न्ह्यानाच्वंगु दु। अथे जुयाः हे वय्कः निदँ तक जापानय् च्वनादीसां कुतः पिकाकपाखें पिहां वइगु सफू पिहां वयेगु क्रम धाःसा त्वाःमदः। अन च्वनादीगु इलय् नं वय्कःया 'चकनेत स्वयेबलय्' नांगु मौलिक कविता मुना व 'सैन्य भन्जन' नांगु नेपालभाषाया पुलांगु थ्यासफूया देवनागरी आखलं रुपान्तर सफू पिथंगु दु।
जापानी भाषा सयेकाः थप गाइड यायेत अःपुगु तायेकादीम्ह वय्कः जापानी भाषा सयेकेत हे जापान झाःगु खः। अथे खःसां थन धाःसा मेपिंत वय्कलं आः तक जापानी भाषा स्यनेगु ज्या यानादीगु मदु। न्हापांनिसें हे यानाच्वंगु तम्वःज्या व थःगु गाइड लजगालं हे थीथी सफू पिथनेत दां मुंकेगु ज्या यानादीम्ह वय्कलं थुगुसी ख्वपय् नीस्वंगु जरिमाया लुमन्ति सिरपाः कयादीगु खः। थ्व सिरपाः न्हापा मिसा च्वमिपिंत जक मीगु खःसां थुगुसीनिसें मिजं च्वमियात नं बीगु शुरु जूगु खः। उगु सिरपाः काःम्ह वय्कः न्हापांम्ह मिजं च्वमि जुयादीगु दु। ज्याझ्वलय् वय्कलं तयार यानादीगु 'कुतः पिकाकःया पिथना धलः' नांगु सफू नं विमोचन जूगु खः। आः थःत सिरपाः कथं वःगु झिद्वः तका दां नं वय्कलं सह प्राध्यापक डा. तुयूबहादुर महर्जनं च्वयादीगु 'स्तरीय नेपालभाषाया रुपय् येँ यलया भाषिका' नांगु सफू पिथनेत खर्च यायेगु घोषणा यानादीगु दु ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया