विश्वकपय् भारतयात लःल्हाःगु ट्रफी नक्कली!

२८दँ लिपा विश्वकप क्रिकेटया उपाधि त्याकूगु भारतय् छुं दिंया लसता लिपा हे विवाद सुरु जूगु दु । थुगुसि विवादया विषय जूगु दु - विश्वकप क्रिकेटया फाइनलय् भारतयात लःल्हाःगु ट्रफी ।

भारतीय राजधानी न्हू दिल्लीं पिहांवइगु 'मेल टुडे' नांया पत्रिकां भारतयात लःल्हाःगु ट्रफी नक्कली जूगु दावी यासें सोमवाः बुखँ पिथंगु खः । उगु पत्रिकां धाथेंया ट्रफी मुम्बइ भान्सारय् लानाच्वंगु धासें उगु ट्रफी नक्कली जूगु खँ धाःगु दु ।

पत्रिकाय् च्वयातःगु दु, 'भारतीय कप्तान महेन्द्रसिंह धोनीयात लःल्हाःगु, वयाः टिममेटतय्सं घय्पुगु व हलिंन्यंक च्वंपिं करोडौं फ्यानतय्सं लसता प्वंकूगु ट्रफी नक्कली खः ।'

भारतय् ट्रफीया विषयलय् विवाद जुइवं अन्तर्राष्ट्रिय क्रिकेट परिषद (आइसीसीं) उगु बुखँ फ्यगं जूगु धासें वांखडे रंगशालाय् भारतयात लःल्हाःगु ट्रफी सक्कली हे जूगु दावी याःगु दु ।

उखे भारतीय क्रिकेट कासामितय्सं थुगु खँय् दुःख प्वंकूगु दुसाः भारतीय क्रिकेट फ्यानतय्सं आइसीसीया अध्यक्ष सरद पावरयात पुताला च्याकाः विरोध प्रदर्शन तकं याःगु दु ।

आइसीसीया उगु खण्डन लिपा मेल टुडे पत्रिकां मंगलवाः हानं मेगू बुखँ पिथना उगु ट्रफी नक्कली हे जूगु दावी याःगु दु । पत्रिकां न्ह्यथंगु दु, 'सन् १९९९, २००३ व २००७य् अष्ट्रेलीयायात ल:ल्हा:गु ट्रफी सक्कली खः, उगु ट्रफीया क्वाये विश्वकप त्याकूगु फुक्कं देय्या नां च्वयातःगु दु । तर, भारतयात लःल्हाःगु ट्रफीइ अज्या:गु नां मदु ।'



सन् २००७य् अष्ट्रेलीयायात ल:ल्हा:गु ट्रफी



सन् २०११य् भारतयात ल:ल्हा:गु ट्रफी

More Stories Like this