सेनाया प्रस्ताव माओवादीं ययेकल

सेना समायोजन याकनं क्वचाइगु संकेत

येँ (सन्ध्या टाइम्स)/माओवादीया लडाकुयात गय् यानाः समायोजन यायेगु धकाः जुयाच्वंगु विवादया दथुइ नेपाली सेनां पेश याःगु छगू प्रस्तावयात माओवादीं नं सकारात्मक रुपं काःगु खँ सीदुगु दु ।

थौंकन्हय् सिन्धुपाल्चोकया सुकुटे धाःगु थासय् जुयाच्वंगु माओवादी स्थायी समितिया बैठकय् नं थुकिया बारे चर्चा जूगु खः। उकी सेनापाखें आः नकतिनि न्ह्यःने हःगु प्रस्ताव सकारात्मक जूगुलिं वहे दिशाय् थःपिं वने फइ धइगु निष्कर्ष पिकाःगु खँ धाःगु दु ।

माओवादीया लडाकु समायोजन सम्बन्धी खँ वल कि हे नकारात्मक लिसः बीगु याना वयाच्वंगु नेपाली सेनां उकुन्हु तिनि प्रधानमन्त्रीयात छगू प्रस्ताव न्ह्यब्वसें नेपाली सेनाया मातहत सेना, प्रहरी, सशस्त्र प्रहरी व लडाकु समेत तयाः न्हूगु हे युनिट (महानिर्देशनालय) गठन याये फइ धइगु खँ न्ह्यथंगु खः। प्रधानमन्त्री पाखें नेपाली सेनां छ्वयाहःगु उगु प्रस्तावयात माओवादीया वरिष्ठ नेतातय्थाय् छ्वया बीधुंकूगु दु। म्हिगः सुकुटेय् च्वंगु माओवादी स्थायी समितिया बैठक उकियात कयाः नं सहलह जूगु खः ।

सूत्रं बिउगु जानकारी कथं सेनां छ्वया हःगु उगु प्रस्तावयात गथे खः अथे हे स्वीकार यायेगु धकाः माओवादीं निर्णय याःगु मदुनि। अथे खःसां नेपाली सेनापाखें वःगु थ्व प्रस्तावं यानाः सेना समायोजन सम्बन्धी विवाद याकनं समाधान जुइगु जुल धइगु संकेट धाःसा वःगु खँ नेतातय्सं धाःगु दु। सेनाया उगु प्रस्तावयात कयाः माओवादीं सहलह याइगु व उकियात छुं भचा जक च्वय् क्वय् यानाः सेना समायोजन यायेफुगु दावी नं सूत्रं याःगु दु। माओवादीपाखें ग्वःम्ह लडाकुयात उकी तयेगु धइगु खँय् भचा समस्या जुइफुगु खँ धाःगु दु ।

सेनाया प्रस्तावय् छु दु?
नेपाली सेनां सरकारयात अज्याःगु प्रस्ताव छ्वया हःगु खँ छुं न्हि न्ह्यः तिनि सार्वजनिक जूगु खः। उकी सेना, प्रहरी, सशस्त्र प्रहरी व माओवादीया लडाकु समेत तयाः मेगु हे छगू फोर्स (महानिर्देशनालय) गठन याये फइ धइगु खँ उल्लेख यानातःगु दु। उगु फोर्सयात सुरक्षा तथा राष्ट्रिय विकास निर्माणया ज्याय् लगे यायेगु धकाः नं उकी च्वयातःगु दु। थ्व फोर्सय् १०-१२ द्वः तक जवानत तये जिउ धकाः नं धयातःगु दु। थुकी वइपिं जवानतय् छातीया नाप अनिवार्य जुइ म्वाःगु नं सेनां धाःगु दु। तर मानव अधिकार उल्लंघनया ज्याय् नां वयाच्वंपिं मनूतय्त धाःसा थुकी तये मजिउगु खँ नं प्रस्तावय् उल्लेख दु ।