नकली भ्याट बील दयेकूपिंत कारवाही या
नकली भ्याट बील दयेकाः राजश्व छले याःपिं व्यापारीतय्त कारवाही यायेगु खँयात कयाः संसदया सार्वजनिक लेखा समितिं फाइल झिके याःगु दु। थ्व बारे स्वनातःगु छानबीन पुचलं नकली भ्याट बील दयेकाः राजश्व छले याःपिं व्यापारीतय् नां नं तयार याना तयेधुंकूगु दु। तर कारवाही न्ह्याकेगु ज्या धाःसा सरकारं यानाच्वंगु मदु। कारवाही मयाःगु कारण सरकारयाके आँट मदयाः मखु। कारवाही यायेमाःपिं धकाः नां पिहां वयाच्वंपिं व्यापारीतपाखें मेगु हे कथंया लबः कायेगु उद्देश्य मन्त्रीतय्सं तयातःगु कारणं हे उमित कारवाही मयासे तयातःगु जुयाच्वन धइगु खँ आः वयाः सी दया वःगु दु। अर्थ सचिव रामेश्वर खनालं आकाझाकां बियादीगु राजीनामां थ्व खँ उजागर जूगु खः। अर्थमन्त्री भरतमोहन अधिकारीं उकी नां दुथ्याःपिं व्यापारीत पाखें आर्थिक लाभ कायेगु ज्या याःगुलिं कारवाही मन्ह्यानाच्वंगु खँ सार्वजनिक जुइवं आः कारवाही न्ह्याकेगु चर्चा नं जूगु खः। नकली भ्याट बील दयेकाः करोडौं तका बराबरया राजश्व हिनामिना याःपिं मनूत मध्ये छम्ह सत्तारुढ पार्टीया सभासद् लिसें व्यापारी विनोद चौधरीया नां नं लानाच्वंगु दु। यदि थुकी सरकारं कारवाही न्ह्याकल धाःसा सभासद् चौधरीयात पदमुक्त यायेगु ज्या समेत एमालें यायेमाः। सभासद् थेंज्याःगु पदय् च्वनाः नं राजश्व ठगी थेंज्याःगु घच्चायापुगु ज्या याःगुलिं उमित ला झन हे कडा कारवाही जुइमाः। भ्याट बील छले याःपिं व्यापारीतय् नां सरकारं सार्वजनिक मयाःसां उमिगु नां बजारय् धाःसा वयाच्वनेधुंकूगु दु। यदि आः नं उमित कारवाही मयात धाःसा सरकारय् च्वनेगु नैतिकता थुमिके दइ मखु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
