अजम्बर सुं मखु..पिहां वये मखुनि

नर्मदेश्वर प्रधान

खँयाखँय्

रुपक। जिथाय् वइ। ख्वाः खिउँ। छाय् थें मसिउ। तमं चूर खने दइ। सुंलिसे खटपट जुल ला? छाय् थें? न्यनेमास्ति वइ। न्यने ला? मन्यने ला? दोमन जुइ। आखिर। न्यने। "छु जुल छन्त थौं? ख्वाः कुतुं वइ थें च्वं।" रुपकं लिसः बी ,"अंकल, थौं ला जिं तं प्वंका छ्वया। वये हे म्वाः...। आम्कन हे च्वँ धयाछ्वया। ताहाः खँ मल्हाना। फोन तया बिया। जिं ला मिखां हे मखन...। अति जुल। धाइ नापं "अतिसर्वत्र वर्जयते"। रुपकया तं वःगुया कारण जिं सिउ। ख न खः। लां लां दयेधुंकल। रुपक थन याकःचा। लछि ति कायलिसे च्वँ। कलाःयात रुपकं अष्रलियाय् त्वःता वइ। थः लिहां वइ। स्वला-प्यला दयेधुंकल। रेखां लिहां वयेगु खँ हे मल्हाः। रुपकं मय्जुयात ताकेता याइ। 'लिहां वा। छेँ छेँ थें मच्वन। न नयेगुया ठेगान, न द्यनेगुया ठेगान। गबलें चाउचाउ नये। द्यने। गबलें बजि भ्वाःतिने। सन्तोष काये। छन्हु मखु। निन्हु मखु। छेँय् वये। मसां थें। झिझां दनी। म्वाः लच्छि अप्व च्वँ। वने मते। कायं गनी। वइबलय् च्वँ। कायया मांम्हेसित आग्रह जुइ। तर निला फुइ। पिहां वयेत। रेखां आनाकानी यानाच्वनी। रुपकं फोन याइ। समस्या कना छ्वइ। याकनं वा। धया छ्वइ। हाला छ्वइ। कलाःम्हं उलि गम्भीर मजू। वयेगु खँ ल्हाना हइ मखु। ई वनी। लछि। निला। स्वला। धाधां लांलां वनी। रुपकयात ख्वये ला न्हिले ला जुइ। कलाःया पहः असह्य जुइ। रुपक जिथाय् वइ। "मय्जु गबलय् लिहां वइगु जुल।" जिं न्यने। हायेके। "न्ह्याबलय् वःसां छु? जितः मतलब मदु।" ....वं तं प्वंकी।
छन्हु। रुपकं जिम्ह मय्जुयात धाइ, "अन्टी, छकः फोनं ब्वः बिया छ्वया बी माल। भम्चायात। काय्चा थन याकःचा। भम्चां वास्ता याःगु मखु। लिहां वयेगु खँ ल्हाःगु हे मखु।" रुपकं अन्टीयात दुःख प्वंकी। अनुनय-विनय याइ। अन्टीम्हं वयात हायेकी, "निम्हतिपूया खँय् जिमिसं न्ववाये मजिउ। छिं हे क्वातुकेमाः...।"

इलय्-ब्यलय् तिरिमय्जुं धयाच्वनी, "गुलित मग्याः। रेखा। याकःचा मिजं त्वःताः।....आरामं। मन तयेक। तापलय्। मिजंतय् छु भाः? व नं स्व ले। ज्या याःवइम्ह ल्यासेम्ह हं। सुथय् सुथय् वइ हं। भुतू क्वथा सफा याइ। वनी हं। खँ न्यने। लुमं लुमं हे ग्यासें वइ। रेखा गय् मग्याःगु? गय् धन्दा मदुगु वया? छु छुं मती खँ लुइकी। रेखायात ब्वः बियाच्वनी। रुपकयात जिं नं गुबलय् हायेके। सतर्क याये। ख्याये। "रुपक, होश या न्हैं। छं कलाः ला मसुर हे खनिं का। नुगः छाःम्ह। गुलित मग्याःम्ह।"
"अंकल। मनइगु विषं दः थी ला? जितः नं ग्याना वइ। व ज्या याइम्ह मय्जु। भचा चञ्चल ।

रेफ्रिजेरेटरय् तया तइगु कोक, फान्टा मज्जां त्वना तइ। छक्वः निक्वः ला छुं मधया। तःक्वः जुइ। न्यने, "कोक, फान्टा त्वना ला छं?" "सर, उकुन्हु साप तांन्वयाः भचा त्वनागु।" छुं मखुथे याउँक लिसः बी। कोक फान्टाया खँ मखु। ज्या याइम्ह थम्हं कयाः त्वनी। मेपिंत जिं त्वंकल फर्मे यात धया बी। झिखा छेँय् वनीम्ह। मनूतसें छु धाइ? जि ला गालय् लाइ। ग्यासें वइ ।

"व हे ला धइगु रुपक।" इलय् हे होश यायेमाः। मय्जुयात कडा नक्सां धया छ्वयेमाल। छ नं कलाः खनाः ग्याः थें च्वं। मखुगु खँय् ग्यायेमाः। तर माःबलय् ख्याये नं सयेकेमाः।" रुपकयात जिं नं पम्प तये। उकुन्हु। रुपक छेँय् वनी। कलाःम्हेसित वं ख्याच्वः बी। "वयेगु खः लाकि मखु? मखुसा मखु धा। मालंमाः थे जुइ।" फोनं रुपकं धम्की बी। रुपक जिथाय् वइ। खँ कनी। उकुन्हु रुपकया ख्वाः खिउँ। आक्रोशित, सुं लिसे ल्वानावःम्ह थें ।

रुपक तःन्हु दत जिथाय् मवःगु। निन्हु मपाक्क वयाच्वंम्ह। मवः। कलाः मदु। दिक्क चाल ला? पोखरा वनेमाल धयाच्वंगु। वन ला? वंसा ला धयावनेमाःगु। छाय् मवंगु? रेखा मदु। रुपकया मन भःभःन्हू जुइ। थातय् मलाः जुइ। रेखा लुमनी। अजू चाइ। गय् मन च्वंगु वया। मिजं थन याकःचा। वयेम्वाः ला व थन। मन मच्वं। मती वइ। रुपकयात फोन याये। छेँय् दु खनी। रुपकं फोन ल्ह्वनी। गन बेपत्ता? "अंकल, जि छेँय् हे। स्वन्हु दत। गनं पिहां मवनागु। क्वथाबास।"

"अष्टेलियाया छु हाल दु?

रेखा वइगु खँ मदु ला?" जिं न्यने। "अंकल, उकुन्हु जिं तमं फोन याना। कन्हय् कुन्हु हे रेखा लिहां वल। आश हे मयानागु। लुरुलुरु वइच्वन। सोझा म्हुतुं गन जी। तं क्यँसेंलि तिनि ज्या जुल।" रुपकं फुर्ति यात। "का जिल। तर कलाः लिहां वयेवं छाय् छेँनं पिहां मवयागु? न्हूगु ब्याहा ला छं? गन तन धकाः चिन्ता जिमि थन। कलाः वःगु खँ धयाहःगु मखु। गुलि फुर्सद मदुगु। कलाः न्ह्यःने दयेवं।" रुपकयात न्याका। "छन्हु निन्हु लिपा वये।" रुपकं उखेरं धया हइ। "रुपक, पलख खँ न्यँ। अखबारय् ब्वनागु छगू बुखँ। ब्याहा मयाःपिनि आयु ताहाः जुइ हं। ब्याहा याःपिं स्वयां ब्याहा याःपिनि आयुया मिटर फास्टनक्सां चाःहिली हं। क्वथाय् च्वनेत होश या ।"

"आयु ला सकसियां चाःहिली। ब्याहालिसे थ्वया छु स्वापू?" रुपकं न्यनी ।

"खः। आयुया मिटर ला सकसियां चाःहिली। तर विज्ञतसें धाइ - ब्याहा याःपिनि आयुया मिटर खूब चाहिली हं। फय्लिंचा थें। क्वथाय् च्वनेत होश या रुपक !" जिं ख्याः याना छ्वये। रुपक जिल्ल जुइ। व गन ग्याइ। अःखः धया हइ, "अंकल, आयुया मिटर न्ह्याक्व हे ब्वां वंसां, फास्ट जूसां, पर्वाह तये मखु। अजम्बर सुं मखु.....। निन्हु प्यन्हु पिहां वये मखुनि.....।"

More Stories Like this