निन्हुया दुने पूर्णता बीगु सहमति
कांग्रेस व एमाले संसदीय दलया बैठक
येँ (सन्ध्या टाइम्स)/वर्तमान गठबन्धन सरकारया प्रमुख निगू दलया शीर्ष नेतातय् दथुइ निन्हुया दुने हे सरकारयात पूर्णता बीगु सहमति जूगु दु। थौं सुथय् प्रधानमन्त्री निवास वालुवाटारय् प्रधानमन्त्री झलनाथ खनाल व माओवादीया अध्यक्ष प्रचण्डया दथुइ उकथं सहमति जूगु खः ।
निम्ह नेताया दथुइ थःथःगु पार्टीया स्थायी समितिइ वःगु खँ नापनापं पार्टीया मेमेपिं नेतातय्गु धापूयात कयाः नं सहलह जूगु खँ प्रधानमन्त्रीया प्रेस सल्लाहकार सूर्य थापां संचारकर्मीतय्त कनादिल। भेटवार्ताया झ्वलय् निगुलिं दलया स्थायी समितिपाखें सरकारयात पूर्णता बीगु नितिं थःथःपिंत जिम्मा बिउगु जानकारी नं कालबिल याःगु खः।
निन्हुया दुने हे सरकारय् वइगु मेमेगु दल मधेसी जनअधिकार फोरम, नेकपा (संयुक्त), माले समाजवादी नापं चिचीधंगु दललिसे नं मन्त्रालय इना कायेगु खँ क्वःछिनाः सरकारयात पूर्णता बीगु सहमति नं जूगु खः। निम्ह नेतातय् दथुइ थ्यंमथ्यं निघौ तक वार्ता जूगु खःसा वार्ताय् एमालेपाखें उपप्रधानमन्त्रीपिं भरत मोहन अधिकारी व कृष्णबहादुर महरा नापं माओवादीया उपाध्यक्ष मोहन बैद्य किरण नं उपस्थित जूगु खः ।
थ्वहे दथुइ प्रमुख प्रतिपक्षी नेपाली कांग्रेस व सत्तापक्ष एमालेया थौं न्हिनय् ब्यागलं ब्यागलं कथं संसदीय दलया ज्याकुथी बैठक च्वनीगु जूगु दु। सरकारं हयेत्यंगु पुरक बजेटया विषयय् सहलह ब्याकेत नापं थःथःपिनि भूमिकाया खँ ब्याकेत हे अथे निगुलिं दलया सिंहदरवारय् च्वंगु संसदीय दलया ज्याकुथी बैठक च्वनेत्यंगु खः। विवादय् वयाच्वंगु पुरक बजेट बारे अन सहलह जुइगु खँ धाःगु दु ।
