हानं छक्वः राष्ट्रपतिया विवादास्पद अभिव्यक्ति

राष्ट्रपति डा. रामवरण यादव थःपिनि अभिव्यक्ति व थीथी कथंया गतिविधिं यानाः हानं छक्वः विवादय् लाःगु दु। खास यानाः जेठ १४ गते संविधान मवल धाःसा छु यायेगु वा उगु संविधानयात गुगुं छगू दलं अस्वीकार यात धाःसा छु यायेगु धकाः वय्कलं प्वंकादीगु अभिव्यक्ति देशय् विद्यमान संविधानयात मल्वःगु जक मखु, वय्कःया थ्व अभिव्यक्तिया लिउने छु खँ सुलाच्वंगु दु धकाः मनूतय्त मालेत तकं बाध्य याना बिउगु दु ।

अन्तरिम संविधानय् दुई तिहाई बहुमतं संविधान पारित याये जिउ धकाः स्पष्ट च्वयातःगु दु। तर राष्ट्रपतिं दुई तिहाई बहुमतया संविधानयात जनतां स्वीकार याइ मखु धकाः अभिव्यक्ति बीगु आःया संविधानयात अस्वीकार यायेगु खः। थौंकन्हय् संसदया दुई तिहाई वामपन्थी पार्टीत जानाः सरकार गठन याःगु व उमिसं आः संविधान नं जारी यायेफुगु सम्भावना खंकाः हे राष्ट्रपति यादवपाखें थज्याःगु अभिव्यक्ति वःगु खः लाकि धकाः आशंका जुइगु अस्वाभाविक मखु। वामपन्थीतय् बहुमतं तयार याःगु संविधानयात नेपाली कांग्रेसं स्वीकार याइगु सम्भावना मदुसा उकियात भारतं नं स्वीकार याये मखु धइथेंज्याःगु संकेत वयाच्वंगु दु। संविधानसभाया माग यानाः झिदँ तक जनयुद्ध याना वःगु पार्टी माओवादीं तकं दुई तिहाई बहुमतं पारित याःगु संविधान स्वीकार याये धकाः आँट याना वःगु अवस्थाय् नेपाली कांग्रेस थेंज्याःगु जनमतयात हे विश्वास याइगु पार्टीं दुई तिहाईया मतयात स्वीकार याये मखु धायेगु पाय्छि मखु। राष्ट्रपतिं बरु कांग्रेसयात दुई तिहाई बहुमतं पारित याःगु दस्तावेज स्वीकार यायेमाः धकाः थुइका बीगु ज्या यानादीगु बांलाइगु खइ ।

More Stories Like this