जेठ १४ लिपा राष्ट्रपति सक्रिय?
कांग्रेसं संविधान स्वीकार मयाइगु संकेत
येँ (सन्ध्या टाइम्स)/राष्ट्रपति डा. रामवरण यादवं थौंकन्हय् याना हयाच्वंगु गतिविधि व भूमिकां राजनीतिक दलतय् दथुइ थीथी कथंया आशंका ब्वलंका हःगु दु ।
आः वइगु जेठ १४ गते संविधान जारी मजुल धाःसा छु यायेगु धकाः मनूत लिसे सहलह ब्याकाच्वनादीम्ह राष्ट्रपति यादवं दुई तिहाई बहुमतं संविधान पारित यायेगु पाय्छि जुइ मखु धकाः पिने न्ववायेगु याना हःगुलिं थ्व वय्कलं राष्ट्रपतिया रुपय् सिबें नं कांग्रेस कार्यकर्ताया रुपय् न्ववानादीगु खनेदु धयाहःगु दु ।
थौंकन्हय् सरकारयाके दुई तिहाई बहुमत दु। यदि चाहे जुल धाःसा थ्वहे सरकार जक जानाः नं दुई तिहाई बहुमतया लिधंसाय् न्हूगु संविधान जारी यायेफु। थ्व सरकारं जारी याइगु संविधानयात विरोध याइगु पार्टी नेपाली कांग्रेस जक हे जुइ। उकिं संविधानय् कांग्रेसया नं समर्थन कायेमाः धइगु आशयं राष्ट्रपतिं थथे न्ववाना हःगु दावी सूत्रया दु ।
संविधान दुई तिहाई बहुमतं पारित याये जिउ धकाः अन्तरिम संविधानय् हे च्वयातःगु दु। उकिं आः दुई तिहाई बहुमतं संविधान जारी याये मजिउ धायेगुया अर्थ संविधानया अःखः वनेगु खः धकाः नं सूत्रं धाःगु दु। सूत्रया आशंका कथं जेठ १४ लिपा यदि दुई तिहाईनं संविधान जारी यात धाःसा थःपिं सक्रिय जुइगु भूमिका दयेकेत राष्ट्रपतिं थज्याःगु अभिव्यक्ति बियाच्वंगु खः। वंगु लछिया दुने वय्कःया भारतं वःपिं निगू स्वंगू पुचलं नापलाना वनेधुंकूगु दुसा वयां लिपा हे वय्कःपाखें थज्याःगु अभिव्यक्ति शुरु जूगु खः ।
