क्रिकेट, दक्षिण एशिया व नेपाः

क्रिकेटया विश्वकप कासा नकतिनि क्वचाल। थुगुसी दक्षिण एशियाली देशय् जूगु जूगु थ्व श्रृंखलाया अन्तिम कासाय् निगू दक्षिण एशियाली देश हे लाःगु कारणं विश्वकप नं दक्षिण एशियाय् हे थात। नेपाः नं दक्षिण एशियाली पुचःया हे छगू मुलुक जूगु कारणं थ्व नेपाःया लागिं नं लसताया खँ खः। थुकी नेपालं विश्वकप सुनां ल्ह्वन धइगु खँय् अपाय्च्वः चिउताः तयेमाःगु खने मदु ।

वास्तवय् थुगुसी जूगु विश्वकपं हानं छक्वः थ्व पुष्टि याना बिउगु दु कि थ्व लागाया लागिं क्रिकेट छगू कासा जक मखु, निगू देय् दथुइ स्यनाच्वंगु राजनीतिक समस्या समाधान यायेगु छगू शिष्ट माध्यम नं खः। भारत व पाकिस्तानया राजनीतिक नेतातय्सं क्रिकेटया छगू कासायात उकथं प्रयोग यानाः 'क्रिकेट कुटनीति' यात हानं छक्वः थाय् बिउगु खः। उकथं हे भारत व श्रीलंका दथुइ जूगु कासायात नं निगू देय् दथुया स्वापू अझ क्वातुकेगु अवसरया रुपय् निगू देय्या नेतातय्सं छ्यःगु खनेदत। शायद थज्याःगु कारणं यानाः नं जुइमाः, दक्षिण एशियाय् क्रिकेटयात 'महान कासा' धायेगु याः।

गन तक नेपाःया खँ दु, वंगु छुं दशक न्ह्यवंनिसें नेपालं नं क्रिकेटय् तःधंगु विकास याना वःगु खनेदु। नेपालं मेगु कासाय् मखुसां क्रिकेट छगुली चाहिं विश्वकप म्हितूगु स्वये खनी धकाः थ्वहे पुस्ताया मनूतय्सं आशा याना हःगु समेत न्यने दयाच्वंगु दु। क्रिकेटया विश्व महारथीत थःगु हे जःखः दुगु ल्याखं नेपालं उकिया लबः काये फत धाःसा थौंया पुस्तां यानाच्वंगु थ्व आशा सत्यय् महिली नं धाये फइ मखु। थ्व ल्याखं नं विश्वकप दक्षिण एशियाय् हे लाःगु थ्व अवसर नेपाःया लागिं सुखद जूगु दु ।

More Stories Like this