चार्जेबल प्रधानमन्त्री !

रत्नकाजी शाक्य 'करोडपति'

हे प्रभु बिजुली दर्शन बिउ रे
जलश्रोत धनी देशया इज्जत बचे याना बिउ प्रभु
चौध घण्टा लोडसेडिङ्गय् जनता खिउँक च्वनेमाः
लां-लां लः मवःसां जनता सुम्क च्वनेमाः
देशय् न्ह्याथे हे जूसां नेतातय्त कुर्सी हे माः
हे प्रभु ........

देशय् ब्रायन एडम्स वयाच्वंगु इलय् थौंकन्हय् डिस्को र्‍यापया जमानाय् बिजुली झ्याप्प जूगुलिं जिं भजन हाला बिया। देश थौं मतच्याः थल युगय् थ्यनाच्वंगु दु। पोलिटिकल भजन हालादिल धइदीमते। न्ह्याक्व ध्याचू नकूसां मछाः धइगु भ्याः भचा हे मदु। नेतातय् न्हाय्पं चस्मा झुण्डे यायेत जक खः छुं चीज न्यनेत मखु, ध्यनाः बांछ्वया बिउसां जिउ। आखिर चौध घण्टा लोडसेडिङ्ग जूसां नेपाल ला जलश्रोतया धनी देश ख हे खः थें। लोडसेडिङ्गया जमानाय् न्ह्यागु नं चार्जेबल जुइमाः। चार्जेबल ब्याट्री, चार्जेबल प्रधानमन्त्री। उकुन्हु न्यतालय् छत्थु दाःबलय् तिनि चार्ज जुल। अझ नं फूल चार्ज धाःसा मजूनि थें च्वं। थथे हे नेतातय् न्यतालय् दायाः हजारौं हजार मेघावाट बिजुली पिकाये दःसा गुलि जिउ ! झलनाथ वयाः झलमल जुइमाःगु झन अलमल धकाःसा जुल। झलनाथ प्रधानमन्त्री जुइसात १२ घण्टा जुयाच्वंगु लोडसेडिङ्ग १४ घण्टा जुल। प्रधानमन्त्री जूगु लसताय् निघौ लोडसेडिङ्ग बोनस वःगु थें च्वं ।

जिगु छेँया न्ह्यःने छगू इलेक्ट्रोनिक पसः दु। गुलि गुलि लोडसेडिङ्ग अप्वल उलि-उलि वया मारामार व्यापार जुइगु। गुलिचां मदुबलय् गपाय्खागु छेँ दनेधुंकल। जय भिमसेन मखु जय लोडसेडिङ्गया भजन याइगु का वं ला। लक्ष्मीपूजा मखु लोडसेडिङ्ग पूजा माने याइ। यक्व चार्जेबल ब्याट्री मीगुलिं जिमिसं चार्जेबल साहुजी धायेगु। सामान ओरिजनल खःला? धकाः न्यंसा ओरिजनल धइगु शब्द हे ओरिजनल मखु धाइगु। मस्यंतलेयात लाइफ ग्यारेण्टी बी। ख नं खः लाइफयागु ग्यारेन्टी सुनां बी फइ? तिन्हिनय् हे गोलीं कयेकीगु जमानाय् ।

बिजुलीया भर मदु, इन्भर्टरया भरोसाय् च्वनेमाःगु अवस्था जुयाच्वंगु दु। इन्भर्टर धाये ला इण्डियाया भरपर धाये। ध्यबा दुपिनि ला ततग्वःगु इन्भर्टर अले मदुपिनि धाःसा व हे मतच्याः थल। जिमि ला लोडसेडिङ्ग थें हे मच्वं धकाः फुइँ याइपिं नं दु। उबलय् महेन्द्र मल्लं सुया छेँनं कुँ पिहां मवः, भुतू मच्याः धकाः तलेजुइ च्वय् वनाः स्वः वनी हं। कुँ पिहां मवःगु छेँय् वनाः फुक्कं बन्दोबस्त याना बी हँ। आः नं अथे हे अर्थमन्त्री धरहराया च्वय् वनाः लोडसेडिङ्गबलय् नं सुया छेँ झलमल मत थी अन वनाः आय स्रोत जाँचे याः वंसां छुं पाइ मखु। थ्व इन्भर्टर, जेनेरेटर, ब्याट्री अर्बौं फुकेगु ध्यबां गुलि मेघावाट बिजुली पिकायेत गाइ जुइ। थ्व दुगु इन्भर्टर, झ्यातुगु झ्यातुगु जेनेरेटर व सतह कम जूगु जलाशयय् क्वफानाः लःया सतह थकायेगु ला व क्वं नं च्याफि क्वफानाः लःया सतह कम जूगु थलय् लःया सतह थकाः थें .....।

उकुन्हु अर्थ आवर धकाः ग्लोबल वार्मिङया बारे चेतना जगे यायेत विश्वन्यंकं एक घण्टा मत स्यायेगु घोषणा याःगु खः। थ्व हिसाबं नेपाःयात सिरपाः हे बी माःगु खः, धाये म्वायेक न्हिं १४ घण्टा मत स्यानाच्वंगु दु। विश्वया ध्यान नेपाःपाखे गय् मवंगु? आः छु स्वःस्वःथाय् खिउँसे च्वं, अले ध्यान वनीगु नं गथे। बरु अपराधीतय् लिमलाः का। चान्हय् नं न्हिनय् नं निगू-निगू शिफ्ट ज्या यायेमाः। छु याये नेतातय् अहंकारं देश अन्धकार जुल ।

विद्युत प्राधिकरणयात नं छु धायेगु? धात्थें धायेगु खःसा थौंया इलय् थुकिया नां विद्युत प्राधिकरण मखु सेड्युल प्राधिकरण धकाः तयेगु ला? न्ह्याथेसां थ्याक्क टाइमय् मत स्यानाः कर्तव्य पालना यानाच्वंगु हे दु। उकिं हाकिमतय्सं निखा प्यखा छेँ दन धकाः नुगलय् स्याके माःगु मदु। एकाइसौं शताब्दीइ नं नेपाःमि खिउँक च्वनेमाःगु खनाः विदेशी कम्पनी, दातृ निकाय व विद्युत उत्पादन याना बी धकाः वइ तर इपिं खाली ल्हाः लिहां वनी। इमिसं छु सिउ झीथाय्यापिं नेतातय्त न्हय्गू पुस्ता तक गाक्क चार्ज यायेमाः धकाः। अज्याःगु प्रविधि ला इमिथाय् विकास जूगु हे खइ मखु ।

लोडसेडिङ्ग झीथाय् जक मखु जापान थेंजाःगु देशय् ला उखुन्हु वःगु तःभुखाय् व सुनामीं यानाः लोडसेडिङ्ग याये माल धयाच्वंगु दु। अन थें झीथाय् भुखाय् ब्वःसा अन १० हजार मनू सीगु खःसा झीथाय् १० हजार मनू बचे जुइ, सीपिनिगु ल्याःखाये माली मखु। अथे ला नेतातय् सत्तामुखीं ततःधंगु रेक्टर स्केलया भुखाय् ब्वःगु झीसं मचाःगु मखु।
उकुन्हु सरकारं एसएलसी जाँचयात ध्यानय् तयाः निघौ लोडसेडिङ्ग क्वपाल। थथे एसएलसीया चिन्ता कायेमाःगु हे मखु। कापी जाँचे याइगु नं खिउँक हे खःथें। आः ला सरकारं विद्युत संकटकाल हे घोषणा यायेधुंकल। प्यदँया दुने लोडसेडिङ्ग हटे यायेगु बचं बिल। आः धाःसा सरकारं बल्ल धात्थें खःगु खँ ल्हात। प्यदँया दुने २४ घण्टा हे मत वइ मखु। लोडसेडिङ्ग ला अथें हे हटे जुइ नि। २५०० मेघावाट विजुली पिकायेगु हं। हचुवा तालं जू म्हिते थें उर्जा मन्त्री धाये ला लंगुर बुर्जा मन्त्री धाये ला, लाःलाःथे योजना दयेकल। खालि महशुलय् भोल्टेज अप्वयेकेगु त्वहः जक खः। बरु उर्जा मन्त्रालयया पलेसा चार्जेबल तथा इन्भर्टर मन्त्रालय छगू दुसा जनतायात राहत जुइ। आः थथें ला मन्त्रालय बाँडफाँड मन्त्रालय छगू निं दकलय् हथाय् जुयाच्वंगु दु ।

थथे माःगु छता हे ज्या याःगु मखु। आः स्व ले, सुगतरत्नयात कारवाही यात। आः हानं जुजुया छ्यं दुगु नोट चले मजुइगु धाल। आः जुजुया छ्यं दुगु नोट ला बैंकय् हिउ वने धाये का। पूर्व जुजुयात गन वनाः हिउ वनेगु? बरु म्याद फुनाः नं एक्सपायरडेट अझ एक वर्ष थपे जूगु लेबल तयाः नं म्याद फुइत्यंपिं नेतातय्त 'बाइ वन गेट वन फ्रि' यानाः स्टक क्लियरेन्स याना छ्वयेगु ला? अति हे जुल झीथाय्। न झीथाय् नं व फेशबुक क्रान्ति धाःगु यायेगु ला? जि ला जिउ, तर छु याये मत हे मदु !

ovalism@gmail.com

More Stories Like this