न्हूगु फय् [बाखं]

शान्तराज शाक्य

थः म्ह्याय् नेहां प्वालाप्वाला थीगु हिसिचा दुगु न्हूगु कार चलेयानाः थःगु कम्पाउण्ड दुने दिकेहःगु खनाः झ्यालय् च्वनाच्वंम्ह मांम्ह अजूचाल। नेहां मोटर चलेयायेसः धयागु गबलें म्हगसय् तक नं म्हंगु खँ मखु । कारया न्ह्यःनेयागु सिटय् च्वनावःम्ह नेहाया पासा अमोघ न्ह्याबलें मोटर साइकल गयाः वइम्ह खः । वया कार मदु धयागु नेहाया मामं स्यू । थ्व कार वया हे न्यानाहःगु जुइ धयागु मामं अनुमान यात । ड्राईभर सिटं पिहावःम्ह म्ह्याय्यात स्वयाः मामं झ्यालं हे धयाहल – “छ नं मोटर चलय् याये सःगु ला नेहा?”

नेहां लिसः बी मलावं अमोघ कारं पिहांवल।
“बांलाः ला मां?”– अमोघं झ्यालय् च्वनाच्वम्ह नेहाया मांम्हेसिया ख्वालय् स्वयाः धाल।
“कार न्यानाहःम्ह अमोघ भाजु हे बांलाः, कार बांमलाइ ला !” – मामं झ्यालं लिसः बियाहल।
“जिगु कार मखु मां, नेहाया न्यानाहःगु ।” – अमोघं झ्यालय् मस्वःसे धाल।

अमोघया खँ न्यनाः नेहाया मां झन अजूचाल। छझाः ला खः ला मखु ला जुल। ख्याः यानाः जकं धाःगु ला धकाः वयागु ख्वालय् स्वल । अमोघया ख्वालय् अज्याःगु ख्याःया छुं चिं खनेमदु । नेहा व अमोघं कारया छचालं मिखा ब्वयाः खँ ल्हानाच्वन । इपिं सनाच्वंगु स्वयेबलय् कार नेहायागु हे खः थें च्वन । नेहा व अमोघ तलय् वन ।

नेहाया पासापिं मध्ये अमोघ नं छम्ह खः । बरोबर वयाच्वनीम्ह जुयाः अमोघ इमिगु छेँया दुजः थें हे खः । दक्व नापं भ्यलय् पुं । व नं थःगु छेँय् थें हे अन वयाच्वनी, वनाच्वनी । नेहा मदइबले मांपिं नापं खँ–खी ल्हाना च्वनी । मांबाःपिं नं खँ ल्हायेमाःपिं जुयाः म्हुतु पाउँक च्वनेम्वाः । व–थ्व मदयेक खँ ल्हानाच्वनी । नेहा दइबलय् न्हिच्छि न्हिच्छि च्वनावनी । गबलें बहनी बाचा इलय् तक नं निम्हं खापाखिपा तिनाः च्वनावनी । इमिगु पहः वया मांपिन्त मछिं थें च्वंसां ज्ञानं थुइ धुंकूम्ह म्ह्याय्यात थःपिंसं छु धयाच्वनेगु धकाः इमिसं मिखा तिसिनाच्वन । उकिसनं नेहाया अमोघ यःम्ह जुइ । व नापं हे ब्याहाः याइगु जुइ धकाः नं मौबौपिंसं छुं मधाः ।

कार दिकेहःगु कम्पाउण्ड दुगु जग्गा नेहाया कमाइनं न्याःगु । जग्गाय् छेँ नं वयागु हे कमाइनं दंगु खः । थौं व हे कम्पाउण्ड दुने दिकेहःगु कार नं वयागु हे कमाइनं न्यानाहःगु जुयाच्वन । नेहाया धुकुतिइ लुँहिति/वहःहिति हाः । वयात धेबाया मगाःमचाः मदु । थः याकःचियागु कमाइनं मालामाल/फालाफाल। उकिं पच्चीस लाख वंगु कार न्यायेत छुं थाकु मजू ।

अफिसं लिहांवःम्ह नेहाया अवकाश कायेत्यःम्ह बौम्हं प्वालाप्वाला थिनाः न्हाय्कनय् थें थःगु ख्वाः खनेदुगु न्हूगु कार खनाः कार छचालं मिखा चाःहीका स्वल। थौंतक सुनानं कम्पाउण्ड दुने कार दिके महःनि । अथे कार ज्वनावइपिं थःथितिपिं नं सुं मदुगु लुमना वल। थौं थपाय्सकंगु कार ज्वनाः सु वःगु जुइ धकाः आश्चर्य चायाः च्वलापतिनं छकः कारया बडीइ हुयास्वत । कारया बडी चुलुया “चुइंक्क” सःवल। थुबलय् झ्यालं कलाःम्ह हालाहल – “नेहाया न्यानाहःगु का बाःम्ह ...... ।”

कलाःम्हेसिया सलय् लसता पिज्वः । बुरां झ्यालय् थस्वया कलाःम्हेसिया ख्वालय् छकः स्वल। कलाःम्ह मुसुकायेका च्वंगु खन । बुरा नं ख्वाः मुसुकायेका कमाइ बःलाःम्ह म्ह्याय् नं न्यानाहयेत छु बेर धयाथें मतिइ लुइकाः लुखाखलु हाचां गायाः तलय् वन ।

नेहाया कमाइ खनाः वया मांबौपिनि गर्वं न्हाय् तःपु ।

बौम्ह नेपाल सरकारया अफिसया शाखा अधिकृत जूसां वं छुं यायेमफु । वयागु कमाइ छेँ खर्च व काय्यात ब्वंकेत हे मगाः । उकिसनं थःपिं बूगु थाय् विराटनगरं सरुवा जुयाः काठमाडौंलय् बालं च्वनेमाःबलय् धेबां धेबा मजुल। खर्च यायेत हे सिसिकःकः धाः । याकःचिया कमाइनं कोथा बाहाः पुलाः निम्हत्यपू व मस्तय्त स्कूल/कलेजय् ब्वंकाः नं छेँ खर्च यायेमाःबलय् महिनाया अन्तिम वालय् थ्यनीबलय् ला खर्च यायेत वाथावाथा कनीगु । न्ह्याबलें छगू हे पसलय् जक सामान न्याइगु जुयाः पसल्यां थिंकाः बीगुलिं जक इमि अन्तिम वालय् तरे जुयावया च्वंगु ।

इमि अज्याःगु अवस्था जुया कलाःम्हं धुच्चापतिं भाःतम्हेसित कचकच यायेगु मत्वःतू । थः पासापिं काठमाडौं सरुवा जुयाः गुलिचां मदुवं थन हे जग्गा न्यानाः छेँ दने धुंकल, छ जुलं “व हे सुका व हे मुलु” धकाः भाःतम्हेसित क्वाक्वा त्यानाच्वनी । थौंया जमानाय् इज्जतया निंतिं जूसां न्ह्याथे यानाःसां काठमाडौंलय् छेँ छकू दनेमाः । काठमाडौंलय् छेँ मदुम्हेसिया इज्जत दइमखु धकाः कलाःम्हं न्वानाच्वनी । केहेँया भाःत काठमाडौं सरुवा जुयाः दँबदँ दुबलय् नगरय् च्वंगु जग्गा न्यानाः उकिइ बांलासे च्वंगु बंगला दंगु बाखं न्यंकाच्वनी । थः भाःत जुलं “कतःपिन्सं लुँ काःथाय् खि तक नं कायेमफुम्ह” धकाः नं क्वह्यंकाः ध्याके धुंकल। तर नेहाया बौम्हं उखेपाखे ध्यान मब्यू । काठमाडौंलय् छेँ मदुसां थःपिनिगु गामय् थःपिन्त माक्व जग्गा दु हे दु । थः याकः काय्यात गा हे गाः धयाच्वनी । उकिं वं भंसार, राजस्व, मालपोत, गुथि, यातायात थें ज्याःगु अफिसय् सरुवा जुयावनेगु कुतः मयाः । गुलि दु उलिं हे सन्तोष जुयाच्वन । थः भाःतया अज्याःगु खँ न्यना ग्वःकः ला ल्वापु जुइ धुंकल। अय्सां भाःतम्हं थःगु बिचाः मम्हू । भाःतम्ह भचा सोझा धाये ला, भचा आध्यात्मिक धाये अथवा म्हाउ मदुगु धाये ला ! वयागु स्वभाव अज्याःगु जुयाच्वन ।

नेहा मचाबलय्निसें भुनुभुनु म्ये हालाः जुइगु बानी । वयाके म्ये हालेगु खुबि दुगुलिं स्कूलया प्राध्यापकं वयात अभिभावक दिवसया ज्याफ्वलय् म्ये हायेके बिल। नेहां हाःगु म्ये न्यना सकलें आश्चर्य चाल। वं उलि बांलाक म्ये हाली धकाः सुनां हे मतिइ मतःगु जुल। अन दुपिं संगीत सम्बन्धी ज्ञान दुपिंसं नेहां तालिम कयाः न्ह्याःवन धाःसा वयागु भविष्य बांलाइ धकाः सकसिनं छप्वाः म्हुतुं थें धाल। सकसिगु आग्रहं वं संगीतय् ध्यान बिल। तालिम नं काल।

नेहाया सः न्हियान्हिथं बांलाना वल। वयागु म्ये थी थी एफ.एम.य् हायेका हइगु जुल। म्हो इलय् हे नेहाया नां बय्बय् जुल। नेहा गथे गायिका जुल अथे हे वयागु स्टेज शोया निंतिं नं इनाप वल। १८ दँ दुम्ह नेहाया सः जक बांलाःगु मखु, वयागु म्हथां, ख्वाः सकतां आकर्षक जू । ल्वःवनापुसे च्वं । वयागु ब्यक्तित्व जक आकर्षक जूगु मखु, व नासलं नं ली । वयागु बोलीं मनूत प्रभावित जू । बांलाःगु सलय् बांलाःगु रुपरंगं व छकलं थहांवल।

वयागु खुबिया कारणं देशया थी थी नाइट क्लबय् स्टेज शो यायेगु हृवःताः चूलात । इलय् ब्यलय् हङ्ककङ्क, लण्डन, न्यूयोर्क, अस्ट्रेलिया थें ज्याःगु थासय् नं स्टेज शो यायेत इनाप वल। थथे छगू देश धुंकाः मेगु देशं वया प्रोग्रामया माग वयाच्वन ।

नेहायात धेबा कमेयायेगु धयागु छुं थाकुगु ज्या मखया च्वन । लखं–लख धेबा ला वयागु ल्हाःया खिति थें जुल। च्वलापतिं व म्हालपतिं छकः ल्वाकल कि लखं–लख धेबाया वा गाः थें जुइगु जुल। व हे धेबां जग्गा न्यात । व हे जग्गाय् छेँ नं धस्वाकल। व हे छेँ दुगु कम्पाउण्डय् थौं प्वालाप्वाला थीगु न्हूगु मोडेलयागु कार दिकेहल।

३० दँ दये धुंकूम्ह नेहा आः मचा मखये धुंकल। व जख्खु ल्यासे जुइ धुंकल। वयाके समाजय् छु गथे जुइ माः धयागु ज्ञान दये धुंकल। अज्याःगु खँय् मांबौ नं चिन्ता कायेम्वाःले धुंकूसां ल्यासेया बैस पुलाः वनेत न्ह्याःवनाच्वम्ह म्ह्याय्या ब्याहाः याना बीमाःगु चिन्तां धाःसा मांबौपिन्त लिनाहया च्वन । मांम्हं इलय् ब्यलय् ब्याहाया खँ न्ह्यथनी, तर नेहां खास ध्यान मब्यू । लमित नं दुहां वयेगु म्हो जुयावने धुंकल। नेहां थ्व खँ ध्यान मब्यूगुलिं मांबौया टेन्सन धाःसा यथावत जुयाच्वन ।

नेहाया मामं वयात ब्याहाया खँ मल्हाःगु यक्व दत । ब्याहा यायेमाल धकाः धाःबलय् नेहां थुकिइ मांपिंसं चिन्ता कयाच्वनेम्वाः, आः जि मचा मखुत धकाः लिसः बिसांनिसें मांम्हं वयात छुं मधाःगु खः । नेहाया यःम्ह दुगुलिं हे अथे धाःगु जुइ धकाः मन तयाच्वन । अमोघ जक बरोबर छेँय् वयाच्वनीगुलिं नेहाया यःम्ह व हे जुइ धकाः मांबौपिं धुक्क च्वनाच्वन । तर नेहां अज्याःगु छुं संकेत मक्यं, हानं अमोघयाके न्यनेकने याना स्वःबलय् वं नं नेहा थः पासा जक खः, मेकथं मखु धाल।

थौं नं अमोघया न्ह्यःने नेहाया मामं खँया खँय् याकनं ब्याहाया खँ क्वःछ्यु धकाः धया थकल। मांम्हेसिया खँयात नेहां न्हिलाः पार यानाछ्वत । मांया खँ न्यनाः अमोघया ख्वालय् छगू कथंया ह्यूपाः वल। वया मनय् छुं खँ बुयावःगु नेहां खन । थ्व खँ अमोघं चाः ला मचाः ला मस्यू । तर मांम्ह पिहांवनेखतं अमोघं धयां हे त्वःतल – “जिगु नं छेँय् ब्याहाया खँ पिहांवया च्वन । छं इच्छा दःसा ओ.के. यानाछ्वये नेहा, छं छु बिचाः?” ― उखुन्हुंनिसें धाये धकाः मनय् तयातःगु खँ अमोघं धयाछ्वत ।

“छ प्रति जिगु प्रेम दु । तर छ नापं जिगु ब्याहा संभव मजू । थ्व जिं न्हापा हे धाये धुनागु खः । छं नं लुमंनि हे जुइमाः ।” – नेहा गम्भीर जुयाः खँ स्वाना यंकल – “आः थ्व बारे खँ मन्ह्याकूसां जिउ ।”

नेहाया खँ न्यनाः अमोघ छकः बिचारमग्न जुल। वं नेहाया खँ लुमंकेगु कुतः यात । यक्व न्ह्यः छकः नेहा व अमोघया ब्याहाया बारे खँल्हाःबल्हाः जूगु खः । उबलय् नेहां ब्याहाया बारे थःगु धारणा तछ्यानाः प्रस्ताव तःगु लुमंसे वल। मतिइ हे मलू कथंया धारणा न्यनाः अमोघ आश्चर्य चाःगु खः । उबलय् अमोघं नेहाया प्रस्तावयात स्वीकार यायेमफुगु अभिब्यक्ति ब्यूगु नं खः । अनं लिपा इमिगु सम्बन्ध मित्रताय् हे सिमित जुयावन ।

थौंया नेहाया लिसः अमोघं बांलाक थुल। थ्व बारे वं हानं लिसा कयाच्वनेगु आवश्यक मतायेकल। थ्व खँयात इमिसं गम्भीर कथं मकासे साधारण कथं हे काल।

च्वनेमाःगु ई तक च्वनाः अमोघ वन । अमोघ वने धुंकाः नेहां मेल चायेकल। तःगुमछि मेल वयाच्वन । दक्व धया थें वया संगीत फ्‍यानतय्गु जुयाच्वन । उकिइ मध्ये छगू प्रभातयागु मेल नं दु । प्रभात निदँ न्ह्यः न्यूयोर्कय् थःगु सांगीतिक शो क्यंवंबलय् म्हस्यूम्ह खः । प्रभातया मांबौपिं नेपाली खःसां व धाःसा अन हे बूम्ह जुयाच्वन । प्रभातया मांबौपिं नारायणगोपालया फ्‍यान जुयाच्वन । प्रभातयात धाःसा नारायणगोपालया म्ये स्वयाः नं न्हूगु पिढीया नेपाली म्ये अप्वः यः । प्रभातया यःपिं नेपाली गायक, गायिका मध्ये छम्ह नेहा नं लानाच्वन । वयागु कलेक्शनय् नेहाया थीथी म्येचाः दु । थ्व खँ प्रभातं वयात थःगु छेँय् ब्वना यंकूबलय् क्यंगु खः ।

प्रभातं नेहायात विशेष इनाप यानाः छगू फाइभ स्टार होटलय् लञ्च नकाहःगु खः । घौ निघौ नापं च्वना खँ ल्हाःबलय् प्रभावया ब्यक्तित्वं नेहायात आकर्षण यात । खँया खँय् मानव जीवनय् ब्याहाया खँ पिहांवःबलय् प्रभातं थः थौंया तनावग्रस्त जमानाय् मचाखाचा दयेका जुइगु इच्छा मदुगु खँ कंगु खः । प्रभातया बिचाः न्यनाः नेहां थःगु सोच नाप प्रभातया सोच बिलकुल ज्वःलाःगु वाःचायेकूगु खः । वं उघ्रिमय् थःगु बिचाः नं थ्व हे दुगु खँ प्रभातयात सहर्ष कंगु खः । इमिगु थज्याःगु सोच ज्वःलाःगुलिं उबलय् इपिं निम्ह न्हापांनिसें म्हस्यूपिं थें छकलं आकर्षण जुल। छकलं प्रेमबन्धनय् लात । गुकिया कारणं उखुन्हु चच्छि इपिं थःगु लसता कालबिल यायेगु ज्याय् ब्यस्त जूगु खः । कन्हय् खुन्हु प्रभातं थःपिनिगु बिचाः ज्वःलाःगु लसताय् धकाः लुँयागु नेकलेश छमाः वयात उपहार बियाहःगु खः ।

नेहां नेपालय् व नेकलेश बरोबर तियाजू । गनं पार्टीइ वनीबलय् व हे नेकलेश क्वखाया वनीबलय् वयात छगूकथं आनन्द महसूस जू । व नापं प्रभात दुगु थें ताइ । पासापिन्त प्रभातं उपहार ब्यूगु धकाः बखान याना जुइ ।

प्रभातया ई–मेलय् थुगुसी थः नेपालय् वयाः मोहनी नखः हंवयेगु खँ च्वयातःगु जुयाच्वन । नापं थः वयेगु ई क्वःछीत जानकारी बीगु खँ नं च्वयातल। प्रभातया ई–मेल ब्वनाः नेहां तुरुन्त लसकुस यानाः रिप्लाई सेन्ट यात ।

प्रभात सदांया निंतिं नेपालय् हे च्वनेगु योजना दयेकाः नेपालय् लिहांवल। व आःयात वया मांबौयागु छेँय् हे च्वनेगु यात । प्रभात नेपालय् न्हापांगु खुसिइ वःगु जूसां वं थःयात याकः तायेके म्वाल। वयात नेहाया साथ दु । गुगुं नं अवस्थाय् नेहा प्रभातया छेँय् वये वनेत स्वतन्त्र दु । वयागु निंतिं प्रभातया लुखां चच्छि न्हिच्छिं लसकुस यानाच्वन ।

नेहाया छेँय् वःम्ह अमोघं नेहा नापलाये मखं । नेहाया मां याकःचा च्वनाच्वन । नेहा मदुसां मांम्हनापं खँ ल्हाये हे माल। मांम्हं अमोघयात नेहा दुहांमवःगु निन्हु दये धुंकल, प्रभात वःसांनिसें वया लिमलाः धकाः कन । नापं ग्वःन्हु ग्वःचाः ला छेँय् दुहांमवःगु नं कन । नेहा ग्वःन्हु ग्वःचाः छेँय् दुहांमःवःगु खँ मांम्हं कंसां अमोघया ख्वालय् छुं कथंया म्हूपाः मवः । वं थुकियात सहजरुपं न्यन । सहजरुपं ब्यवहार यात । अमोघं स्यू, नेहाया कोथा पासा धयाम्ह म्हिगः थः जूसां थौं प्रभात धकाः ।

खँया खँय् मांम्हं न्ह्याक्व धाःसां नेहायात ब्याहा याके मफुगु गुनासो नं न्यंकल। नापं छं छकः नं धया ब्यु धकाः इनाप यात । मांया खँ अमोघया निंतिं न्हूगु मखु । थ्व खँ वं न्हापांनिसें स्यू ।

“नेहां मांनं धाःथें न्ह्यःने लाःम्ह मिजं नापं ब्याहा याइमखु मां !” – अमोघं धाल।
“हां !” – मां नं खँ पांमथू थें च्वनाः न्यन । अमोघया खँ मांया निंतिं छु धाःगु छु धाःगु जुल। काचाक्क थुइके मफयाः अमोघया ख्वालय् आश्चर्यनक्सां स्वल।
“खः मां, नेहाया न्ह्यःने लाःपिं मिजं नापं ब्याहा यानाच्वने मंमदु ......।” – अमोघं खँ स्वानायंकल – “वया मेपिनि थें ब्याहा यानाः मचाखाचा दयेकाच्वने नं मंमदु । ब्याहाः यानाः मचाखाचा दयेके मयःपिं नाप जक वया ब्याहाः जुइ । अज्याःपिं मिजं वं मालाच्वंगु दु ।”

“छु धयागु, अमोघ छं !?” – मां अजूचाल।

“खः मां, नेहाया बिचाः झीगु बिचाःनाप मिलय् मजू । वया बिचाः अंग्रेजीत नाप मिलय् जू, अंग्रेजत थें जुइगु नेहाया इच्छा खः ।” अमोघं मांया ख्वालय् क्वथीक स्वल। अमोघया खँ मांम्हं छकलं पत्याः यायेमफुत । थ्व छु धाःगु धया थें च्वन । छकः नेहां ब्याहाः यानाः मचाखाचा दयेका च्वनेगु न्ह्याइपुगु खँ मखु धाःगु लुमंसे वल। उकिं हे नेहां ब्याहाः मयाःसे च्वनाच्वंगु जुइ धयागु मतिइ लुल। मांयात अमोघया खँ खः थें तायावल। मांया मनस्थिति थुइकाः अमोघं धाल – “जिं न्हापा हे नेहानापं ब्याहा याये धकाः धाये धुन । उबलय् नेहां ब्याहाः धुंकाः मचाखाचा मदयेकेगु मञ्जुरी दःसा जक जि नापं ब्याहाः जुइफइ, मखुसा जुइमखु धकाः धाल। उकिं नेहानापं जिगु ब्याहाः मजूगु खः । नेहां अथे धाःसां वया जि धाःसा यः । नेहायात जिं थः भाःपाः च्वँ धकाः धाल। उकिं जि वयाथाय् इलय्ब्यलय् वयाच्वनागु ।”

अमोघया खँ न्यनाः मां सासः ल्हाये ल्वःमंम्ह थें वाताहां च्वन । मांया नुगलय् छगू कथं पीडा जूगु अमोघं चाल। मांया पहः अमोघयात तसकं असहज थें ताल। पलख छु याये छु धाये जुल।

अमोघया खँ न्यनाः मांया मतिइ थ्व नेपालीतय् समाजय् अंग्रेजतय्गु देशं वःगु न्हूगु फय् थें ताल।

साभार : बाखं दबू ल्याः ४।

More Stories Like this