सभासद् पासवानं कुर्सी वांछ्वल

राज्य पुनर्संरचनाया सवालय् तःधंगु दल-चीधंगु दल ल्वापु

येँ (सन्ध्या टाइम्स)/न्हूगु संविधान दयेकेगु निंतिं दकलय् अप्वः विवाद जुयाच्वंगु राज्य पुनर्संरचनाया सवालय् सहलह यायेत च्वंगु बैठकय् चिचीधंगु दल व ततःधंगु दलया सभासद्तय् दथुइ ल्वापु जुयावःगु दु ।

संविधानसभाया मेमेगु विषयगत समितियात कयाः सहलह जूगु इलय् सुम्क च्वनाच्वंपिं मुस्मां, थारू व दलितया नापनापं जनजाति सभासद्तय्सं राज्य पुनर्संरचनाया सवालय् धाःसा सः थ्वयेका हःगु खः। राज्यपाखें बहिष्करणय् लाका तःपिं समुदायया प्रतिनिधित्व यानाच्वंपिं सभासद्त संविधानसभाया संवैधानिक समितिइ कडा रुपं प्रस्तुत जुयावःगु दु ।

थौं सुथय् च्वंगु संवैधानिक समितिया बैठकय् दलित जनजाति पार्टीया सभासद् विश्वेन्द्र पासवान तसकं आक्रमक रुपं प्रस्तुत जूगु खः। थःगु खँ तंतं तम्वयाः वय्कलं थः फ्यतुनाच्वंगु कुर्सी हे ल्ह्वनाः प्यतँजाःगु झ्यालं क्वय् वांछ्वया हःगु खः। सिंहदरवारय् च्वंगु पुलांगु संसद् भवनय् थौंया थ्व बैठक जूगु खः ।

बैठकय् थीथी सभासद्तय्सं न्ववानाच्वंगु खःसा थःपिनिगु माग आः तक नं ततःधंगु दलया नेतातय्सं पूरा मयात धासें तं पिकयाः सभासद् पासवान उकथं आक्रमक रुपं प्रस्तुत जूगु खः। वय्कलं सीमान्तकृत समुदाय, दलित, मुस्मां, जनजाति नापं लिउने लानाच्वंगु समुदायया माग पूरा मजुइकं बैठक हे न्ह्याके बी मखु धासें उकथं तं पिकयादीगु खः ।

बैठकय् दुथ्याःम्ह छम्ह सभासदं 'सन्ध्या टाइम्स' लिसे खँ ल्हासें सभासद् पासवानं तं पिकयाः 'आः कि जिमिगु माग पूरा यायेमाल, कि मखुसा जिगु हिबाः वइ तर थ्व बैठक संचालन याके बी मखु' धयादीगु खः। पासवानं थःपिनि माग पूरा यायेमाल धकाः सः तयादीगु इलय् मुस्मां सभासद् सरदुल मियाँ हक तसकं हालादीगु खः। अथे हे चिचीधंगु दलया सभासद्तय्सं नं पासवानया मागयात समर्थन यानादीगु खः। विशेष यानाः ततःधंगु दलतय्सं नेपाःया जनजाति, दलित, मुस्मां, नापं लिउने लानाच्वंगु समुदायया अधिकार सुनिश्चित मयायेगु कथं न्ह्याः वनाच्वंगु व ततःधंगु दलया नेतातय्सं जक न्ववानाः चीधंगु दलतय्गु मागयात संवोधन मयाःगु खँ न्ह्यथँसें अथे सभासद्त आक्रमक रुपं प्रस्तुत जुयादीगु खः। थौंया उगु मुँज्याय् ततःधंगु दल एकीकृत माओवादी, नेपाली कांग्रेस व एमालेया सुं नं शीर्ष नेतात उपस्थित जुयामदी। आः संवैधानिक समितिया मेगु मुँज्या २२ गते च्वनीगु जूगु दु ।

म्हिगः नं संवैधानिक समितिया बैठक च्वंगु खःसा उगु बैठकय् नं सभासद्पिं पासवान, हक व थारू सभासद् रुक्मिणी चौधरी आक्रमक रुपं प्रस्तुत जुसें छलफलया निंतिं बियातःगु भ्वं तकं खुनाः, टेबलय् दायाः हंगामा याःगु खः। थःपिनि माग पूरा याये हे माः धकाः ततःसलं सः तयेवं म्हिगः हे बैठक हे दिकाः थौं सुथय् तकया निंतिं स्थगित याःगु खः। म्हिगःया मुँज्याय् एमालेया नेता भीम रावलं जातीय अग्राधिकार नापं आत्मनिर्णयया अधिकार विरुद्ध न्ववानादीगु खःसा वय्कःया धापू लिपा हे दलित, मुस्मां व थारू सभासद्तय्सं हंगामा यानाः बैठक हे स्थगित याना बिउगु खः ।