अर्थमन्त्री व व्यापारी स्वापूया छानबीन जुइमाः

अर्थ सचिव रामेशवर खनालं आकाझाकां मन्त्रालय त्वःता वंगु घटनां अर्थमन्त्री भरतमोहन अधिकारी व हाकुबजाः याइपिं व्यापारीतय् दथुइ कायम जुयाच्वंगु गलत स्वापूया आपालं खँ उजागर जुया वःगु दु। खास यानाः अर्थमन्त्री अधिकारीयात अर्थमन्त्री दयेकेगु लागिं व्यापारीतय् छगू पुचलं गुकथं 'लगानी' याःगु जुयाच्वन धइगु खँ सार्वजनिक जूगु दु। वय्कःयात अर्थमन्त्री दयेकाः वय्कःपाखें लबः कायेत व्यापारीतय् छगू पुचलं एमालेयात करोडौं दां 'चन्दा' बिउगु खँ पिहां वःगु दु। व्यापारीतय्पाखें काःगु चन्दाया ब्याज पुले कथं हे अर्थमन्त्री अधिकारीं नकली भ्याट बील दयेकाः राजश्व छले याःपिं व्यापारीतय्त यायेत्यंगु कारवाहीया प्रक्रिया पना बिउगु द्वपं वःगु दु। व्यापारीतय्के ध्यबा कयाः पार्टी चले यायेमाल धाःसा उकिया गज्याःगु मूल्य पुले माली धइगु खँया नमूना थ्व घटना खः। अर्थ सचिव खनालं उमित नं कारवाही यायेमाः धइगु पक्षयाम्ह खःसा अर्थमन्त्री कारवाही मयाकेगु पक्षय् लानाच्वंगु कारणं हे निम्हेसिया दथुइ मनमुटाव जुयाः सचिवं ज्या त्वःतेमाःगु खँ न्ह्यःने वःगु दु। अय् जूगुलिं अर्थ सचिवं ज्या त्वःतूगु थ्व मामिलायात अथें त्वःता छ्वयेगु पाय्छि जुइ मखु। थ्व प्रकरण लिउने सुलाच्वंगु मेमेगु पक्षयात कयाः दुग्यंक हे छानवीन यायेमाःगु आवश्यकता आः न्ह्यःने वःगु दु। देशय् भ्रष्टाचारी व अख्तियार दुरुपयोग याइपिंत कारवाही यायेगु लहर वयाच्वंगु इलय् थ्व प्रकरणय् नं उकथंया हे छानबीन यायेमाःगु खनेदु। यदि थ्व सरकार देशं धाथें हे भ्रष्टाचार उन्मुलन यायेमाः धइगु पक्षय् दुसा थ्व प्रकरणय् छानबीन याकेगु लुखा चायेका बीमाः ।

More Stories Like this